Samuɛli 1, 1 - Bibeli do fee

Ana í bɔ kpasɛ̃i Ilaaɔ̃ ilui Siloo

¹ Inɛ gɔ í wɛɛ iyi à ya kpe Elikana, inɛi Efaraimui í jɛ. Ilui Ramai í wa, si ilɛi Sufu bi iri kutai Efaraimu ŋa. Nŋui í jɛ amai Zerohamu, Zerohamu mɔ amai Elihui, Elihu mɔ í jɛ amai Tohu, Tohu mɔ amai Sufui.

² Elikanau í nɛ abo minji. Inɛ akã à ya kpoo Ana, inɛ akã mɔ Penina. Penina í nɛ amu ŋa amma Ana kù nɛ baa akã.

³ Nɔ adɔ̃ fei mɔkɔu í ya bɔ Siloo koo tɔɔ Aɔ̃ Lafɛ̃ɛi lele do ilɛ, nɔ ku ceaa kuwee. Siloo bɛi Ɔfini do Fineɛzi amai Elii ŋa à wa, à waa jɛ woo weei Aɔ̃ Lafɛ̃ɛ ŋa.

⁴ Ajɔ iyi Elikana í ce kuweeɛu fei í ya na Penina do amaɛ ŋa ikpɛ̃ iyi í jɛ tu ŋa si ijɛi kuweeui.

⁵ Amma zaka bɛi í na Penina, minjiɛi í ya na Ana, domi Anai í bi í re, baa do iyi Aɔ̃ Lafɛ̃ɛ í coo gbɛnda.

⁶ Nɔ waati kãma fei iguɛ Penina í ya maa dɛdɛ anuɛi ku ba ku kɔ̃ idɔɛ si na iyi í jɔ̀ kù nɛ ama.

⁷ Nɔ adɔ̃ fei bii à bɔ kpasɛ̃i Aɔ̃ Lafɛ̃ɛ, bɛɛbɛi Penina í ya maa fɔ inɔɛ ku jɔ̀ ku maa kpata kaa jɛ nkãma.

⁸ Ŋɔi mɔkɔɛ í ya beeɛ ku ni, Ana, na mii í ce ì waa kpata i kù waa jɛ nkãma. Bɛirei í ce ì wɛɛò inɔ kufɔ. N kù re ama mɛɛwa bi titɛɛ?

⁹ Adɔ̃ nŋu gɔ iyi à jɛ à tã ŋɔi Ana í dede í bɔ kpasɛ̃i Aɔ̃ Lafɛ̃ɛ. Elii, woo weeu, wa buba kɔkɔi andɛi ileu.

¹⁰ Do inɔ kufɔ nla nlai Ana wa kpata wa tɔɔ Aɔ̃ Lafɛ̃ɛ.

¹¹ Ŋɔi í cea Aɔ̃ Lafɛ̃ɛ kuwã í ni, Aɔ̃ Lafɛ̃ɛi lele do ilɛ, cɔ bɛi ǹ wɛɛò inɔ kufɔ nla nla. Maà gbɛjɛm, amma ce araarem. Bii ì muum ama inɛmɔkɔ an soo má n daɛ si awɔ ku maa ceɛ icɛ si kuwɛɛɛ fei. Nɔ a kaa ja iriɛ ajɔ kãma.

¹² Si bɛi kutɔɔi Ana í kpɛ, ŋɔi Elii wa cɔɔ.

¹³ Ana wa ce kutɔɔɛi si idɔɛ. Nŋui í jɔ̀ Elii kù waa gbɔ ide kãma baa do iyi í yɛ gɛlɛɛ wa yaya. Elii í tamaa bɛi atɛ̃ wa kpaai.

¹⁴ Nɔ í sɔ̃ɔ í ni, hee waati yoomai ì bi i jɔ̀ atɛ̃u ku kpaɛ. Dede i bɔ bii gɔ hee bii atɛ̃u í nya.

¹⁵ Ŋɔi Ana í jɛaa í ni, aawo. Atɛ̃ kù waa kpam. Ǹ wɛɛò inɔ kufɔ nlai amma n kù mɔ atɛ̃. Ǹ wa n sɔ̃ Aɔ̃ Lafɛ̃ɛ inɔ kufɔm nii.

¹⁶ Maà cɔm bɛi inaabo laalɔ, domi inɔ kufɔ nlam do ara kuro iyi ǹ wa n gbɔ nŋui í jɔ̀ ǹ wa n ce kutɔɔ hee nsɛi.

¹⁷ Ŋɔi Elii í jɛaa í ni, koo do laakai ku sũ. Nɔ Ilaaɔ̃ ku muuɛ mii iyi ì tɔɔɛ.

¹⁸ Ana í jɛaa í ni, awɔ mɔ, mum do inɔ akã. Ŋɔi í nɛ nɔ í jɛsi nŋu ku jɛ nɔ kù wɛɛò inɔ kufɔ má.

¹⁹ Daadaakɔu Elikana do inɛi kpasɛ̃ɛ ŋa à dede à koo à tɔɔ Aɔ̃ Lafɛ̃ɛ à bɛi à bɔ ide nŋa Rama. Si anyiɛ nɔ Elikana do Ana à tɔtɔɔ sɛ̃ɛ nɔ Aɔ̃ Lafɛ̃ɛ í gbɔ kutɔɔi Ana.

Kubíi Samuɛli do keekeɛ

²⁰ Ŋɔi Ana í ba asĩ si adɔ̃u nɔ í bí ama inɛmɔkɔ nɔ í kpoo Samuɛli í ni, hai bi Aɔ̃ Lafɛ̃ɛi ǹ tɔɔɛ.

²¹ Si anyii nŋu Elikana í dede má í bɔ Siloo do inɛi kpasɛ̃ɛ ŋa fei a ba a cea Aɔ̃ Lafɛ̃ɛ kuweei adɔ̃u do ti kuwã iyi í tako í ceu wo.

²² Ana kù too mɔkɔɛ amma í sɔ̃ɔ í ni, waati iyi an kpoto amau an kooɛ n koo n na Aɔ̃ Lafɛ̃ɛ ku ba ku ceaa icɛ hee do ajɔ fei.

²³ Ŋɔi Elikana í jɛaa í ni, í sĩa. Si bɛi awɔ takaɛ ì yɔɔ iyi í sĩa, degbe hee bii ì kpotoɛ. Aɔ̃ Lafɛ̃ɛ ku kɔ̃ kuwãɛ. Na nŋu, Ana í gbe Rama bɛ wa na amau amɔ hee ku la.

²⁴ Iyi í kpotoɛ, do iyi í wɛɛ keeke fei, í bɔòɛ kpasɛ̃i Ilaaɔ̃ Siloo bɛ. Ana do mɔkɔɛ à mu ama kɛtɛi adɔ̃ mɛɛta do iyafũ saaki akã do bɔgɔ batai atɛ̃ vɛ̃ɛ.

²⁵ Ŋɔi à kpa kɛtɛu à ceò kuwee nɔ à gbã amau à bɔò bi Elii.

²⁶ Ŋɔi Ana í sɔ̃ Elii í ni, lafɛ̃ɛm, ì waa ye gigii inaabo gɔ iyi wa ce kutɔɔ wo kɔkɔɛ? To, hee do kuwɛɛɛ fei, amui.

²⁷ Aɔ̃ Lafɛ̃ɛ í gbɔ kutɔɔm. Ama iyi ǹ tɔɔu nŋui ihɛ̃.

²⁸ Na nŋu, ǹ bi n na Aɔ̃ Lafɛ̃ɛ ku ceaa icɛ si kuwɛɛɛ fei. Ŋɔi aŋa fei à gulɛ à saabu Aɔ̃ Lafɛ̃ɛ.