Ruutu 4 - Bibeli do fee

Boazi í ba nyaanzei Elimelɛki ide ku fɔ

¹ Waati iyi Boazi í to inɔ ilu ŋɔi í koo í buba andɛ koofai iluu. Ŋɔi inɛ iyi í jɛ nyaanzei Elimelɛki í re Boaziu í naa wa lɔ gbakã, inɛ iyi Boazi í sɔ̃ Ruutu ideɛu. Nɔ Boazi í kpoo í ni, wãanɛ, naa wa, naa buba ihɛ̃, nɔ inɛɛu í jɛsi í naa í buba.

² Nɔ Boazi í kpe inɛ mɛɛwa si inɔi inɛ ngboi ilu ŋau í ni, i buba ihɛ̃ ŋa. Nɔ aŋa mɔ à buba.

³ Ŋɔi í sɔ̃ nyaanzei Elimelɛkiu í ni, isà ì mà iyi Naomi í baa hai ilɛi Moabu ya. Wee nsɛi wa dɛ iko iyi í jɛ ti Elimelɛki nyaanze nwau ku ta.

⁴ Ŋɔi í jɔ̀ ǹ lasabu ǹ ni an sɔ̃ɛ, nɔ si lasabum ǹ bi ku jɛ i yaa si wajui inɛ ngbo ŋau ihɛ̃ do si wajui inɛ ŋa iyi í jɛ iju nŋa ihɛ̃ fei. Bii ì bi i ce iyi ì nɛ kpãai ku ce, coo. Bii i kù bi mɔ jɔ̀ n gbɔ, domi si anyii awɔ amui ǹ nɛ kpãai ku yaɛ. Ŋɔi inɛɛu í jɛ í ni, ǹ bi.

⁵ Nɔ Boazi í sɔ̃ɔ má í ni, bii ì ya ikou hai bi Naomi aa so Ruutu inɛi Moabu jaaɔ̃i Maloni gbakãi ku jɛ aboɛ ku ba iriɛ ku maà ku, nɔ ikou mɔ ku gbe si inɔ kpasɛ̃i mɔkɔɛ iyi í kuu.

⁶ Ŋɔi inɛ iyi í nɛ kpãai ku yaɛu í jɛ í ni, debɛi bii bɛɛbɛi, n kaa n yɔkɔ n yaa, domi ǹ wa n ce njo n maà n na n kpa tubum. Soo ku jɛ tɛɛ domi n kaa n yɔkɔ n yaa.

⁷ Tako wo si ilɛi Izirɛli, bii inɛ ŋa à waa ya ngɔgɔ hai bi kpaasi gɔ, walakɔ bii à waa kpaasi amani nŋa gɔ, inɛ akã í ya bɔ baataɛi ku na kpaasiu. Inɛ nŋu bɛi í ya jɛ sɛɛda iyi á jɔ̀ a mà iyi à gbɔ si njɛ mbɛ.

⁸ Ŋɔi í jɔ̀ inɛ iyi í nɛ kpãai ikou ku ya í sɔ̃ Boazi í ni, ya ndɛɛ. Nɔ í bɔ baataɛ í so í naa.

⁹ Ŋɔi Boazi í sɔ̃ inɛ ngbo ŋau do inɛ ŋa iyi à wa bɛ feiu í ni, iŋɛ fei ì jɛ sɛɛda ŋa nnyi iyi ǹ ya andi mii iyi í jɛ ti Elimelɛki do ti Kilioni do Maloni amaɛ ŋau hai bi Naomi,

¹⁰ nɔ gbakã an so Ruutu inɛi Moabu jaaɔ̃i Maloniu ku baa ku jɛ abom. Si bɛɛbɛ, mii ŋau fei aa baa a gbe si kpasɛ̃i inɛ iyi í kuu, nɔ si bɛɛbɛ á ba tɔku ŋa iyi aa jɔ̀ iriɛ ku maa wɛɛ hee do ajɔ fei si inɔi inɛi ilɛɛ ŋa do si mii ŋa iyi í jɛ wũai idei iluɛ. Iŋɛi ì jɛ sɛɛda nnyi ŋa.

¹¹ Ŋɔi inɛ ngbo ŋau hee do inɛ ŋa iyi à wa bɛ ŋau fei à jɛ à ni, oo, à jɛ sɛɛda. Aɔ̃ Lafɛ̃ɛ ku weea inaabo iyi wa naa si inɔ kpasɛ̃ɛu. Aɔ̃ Lafɛ̃ɛ ku jɔ̀ ku yɛ bɛi Rasɛli do bɛi Lea, abo minjii Zakɔbu ŋau, aŋa iyi à ma kpasɛ̃i Izirɛli. Nɔ Aɔ̃ Lafɛ̃ɛ ku jɔ̀ amanii awɔ takaɛ ku la si dimii Efarata nɔ iriɛ ku bɔ lele si ilui Betelehɛmu fei.

¹² Aɔ̃ Lafɛ̃ɛ ku jɔ̀ tɔkuɛ ŋa iyi aa ba hai bi ama inaabo saatarau bɛ a jɔ̀ kpasɛ̃ɛ ku yɛ bɛi ti Perɛsi, nŋu iyi Tamaa í bía Zudaa.

Ruutu do Boazi à so njɛ nɔ à bí Obɛdi

¹³ Boazi í so Ruutu í baa í jɛ aboɛ. Ŋɔi Aɔ̃ Lafɛ̃ɛ í weea Ruutu nɔ í jɔ̀ í nɛ asĩ í bí ama inɛmɔkɔ.

¹⁴ Ŋɔi inaaboi Betelehɛmu ŋa à waa sɔ̃ Naomi à ni, ka saabu Aɔ̃ Lafɛ̃ɛ, domi nnyi kù jɔ̀ i gbe hai inɛ woo ya. Aɔ̃ Lafɛ̃ɛ ku jɔ̀ irii tɔkuɛu ku bɔ bii fei si ilɛi Izirɛli.

¹⁵ Nŋui á jɔ̀ kuwɛɛɛ ku baa ku dɔ̃ nɔ ku maa muɛ si agboɛ. Bi titɛɛ, aboi amaɛu í re baa ama inɛmɔkɔ mɛɛje, domi í nɛ kubiɛ nɔ í jɔ̀ ì ba tɔku.

¹⁶ Ŋɔi Naomi í so amau si ikpaɛ nɔ í ba iyeu ku mu.

¹⁷ Inaabo ŋa iyi à wa amɛɛ bɛ fei à wasi ku ni, Naomi í ba ama inɛmɔkɔ. Nɔ à sɔ amau Obɛdi. Obɛdii í jɛ baai Izai, Izai mɔi í jɛ baai Davidi.

Irii balai Davidi ŋa

¹⁸ Irii inɛ ŋa iyi à jɛ tɔkui Perɛsi ŋa wee. Perɛsii í bí Hɛsirɔ̃ɔ,

¹⁹ Hɛsirɔ̃ɔ mɔi í bí Raamu, Raamu mɔi í bí Aminadabu.

²⁰ Aminadabu mɔi í bí Nasɔ̃ɔ, Nasɔ̃ɔ mɔi í bí Salumɔɔ.

²¹ Salumɔɔ mɔi í bí Boazi, Boazi mɔi í bí Obɛdi.

²² Obɛdi mɔi í bí Izai nɔ Izai mɔi í bí Davidi.