Ruutu 3 - Bibeli do fee

Ruutu í koo wa sũ bi ku to isɛi Boazi

¹ Ajɔ nŋu gɔ Naomi í sɔ̃ Ruutu í ni, í sĩa n dɛ yaase bɛi kuwɛɛɛ á ce ku na ku dɔ̃ɛ si ala.

² Boazi iyi í jɔ̀ ì ce icɛ do inaabo woo ce icɛɛ ŋau bɛ nyaanze nwai si bɛi ì mà tã. Alɛi nŋu takaɛ á koo kpokpo ɔɔzuɛ nɔ ku fɔ́ɔ.

³ Na nŋu, dede i koo i wɛ, i dasi ibɔɛ ŋa nɔ i fãsi araɛ tuae. Si anyiɛ nɔ i koo bi ku kpokpo ɔɔzuu. Amma bii ì to, maà jɔ̀ ku màɛ titã, í gbe hee bii í jɛ nɔ í mɔ í tã.

⁴ Bii í na í dede wa bɔ ku sũ aa maa cɔɔi tengi bii wa bɔ ku sũ. Bii ì yɛ tengi bii í koo í sũ, dede i koo siɛ i koo i cĩ acɔ ku biiɛ keeke i bɛi i sũ ikpa bi ku to isɛɛ bɛ. Si anyii nŋu bɛ, nŋu takaɛ á sɔ̃ɛ bɛi ì nɛ ku ce.

⁵ Nɔ Ruutu í jɛaa í ni, bɛi ì sɔ̃m nɔu bɛ fei an coo.

⁶ Nɔ Ruutu í dede í bɔ bi ku kpokpo ɔɔzuu nɔ í ce isɛɛnɛɛ dee dee si bɛi anau í sɔ̃ɔu.

⁷ Ŋɔi Boazi í jɛ í mɔ nɔ í wɛɛò inɔ didɔ̃. Iyi í tã ŋɔi í koo í sũ kɔkɔi bii à timbi ɔɔzuɛ ŋau. Ŋɔi Ruutu í nɛ wa sɛ̃ɛ í naa í cĩ acɔ ku biiɛu nɔ í sũ bi ku to isɛɛ bɛ.

⁸ Iyi í to laja ŋɔi Boazi í baò í jĩ nɔ í ba wee inaabo gɔ wa sũ do bi ku to isɛɛ.

⁹ Ŋɔi í ni, awɔi yoo. Nɔ í jɛaa í ni, amui Ruutu woo ce icɛɛ. Som i maa cɔ baanim, domi awɔi ì nɛ kpãai ku yám.

¹⁰ Ŋɔi Boazi í sɔ̃ɔ í ni, Aɔ̃ Lafɛ̃ɛ ku weeɛ, Ruutu. Mii iyi ì ce nsɛiu ihɛ̃ wa nyisi iyi ntɔ ntɔ jiida ku jɛɛ í re baa jiida iyi ì tako ì ce wo, domi i kù dɛdɛ kubii awaasũ ŋa iyi à jɛ ilu fia ŋa walakɔ ilu are ŋa.

¹¹ Nsɛi maà jɔ̀ zigiɛ ku da do ngɔgɔ má. Mii iyi ì ni fei an ceɛ, domi hee do inɛi inɔ ilu ŋa fei à mà iyi awɔ abo ilu bɛɛrɛi.

¹² Ntɔ ntɔ ǹ mà iyi ǹ nɛ kpãai n soɛ, amma inɛ gɔ í wɛɛ iyi nyaanze ku jɛi nŋu do mɔkɔɛ í rem.

¹³ Amma sũ ihɛ̃ hee iju ku má, ala daakɔ aa ka yɔɔ bii á jɛsi nŋu ku soɛ. Bii í jɛsi, ku soɛ, bii kù jɛsi mɔi an gbasi do irii Aɔ̃ Lafɛ̃ɛ iyi an ceɛ mii iyi ǹ nɛ ku ce. Na nŋu, sũ hee iju ku má.

¹⁴ Nɔ Ruutu í sũ bɛ hee iju wa bɔ ku má. Amma í dedei hai amɛɛjuumá si waati iyi inya kù má sãa sãa. Nɔ Boazi kù bi mɔm inɛ gɔ ku mà iyi Ruutu í naa bi ti nŋu.

¹⁵ Ŋɔi í sɔ̃ Ruutu í ni, mu itĩi ibɔ nlaɛu bɛ wa ku ce ncɛɛ. Ŋɔi í mu itĩi ibɔɛu dim dim, nɔ í daa si ɔɔzu iyi í re baa kiloo maatũ í bɛi í kãa. Si anyii nŋu, Boazi takaɛ mɔ í nɛ inɔ ilu bɛ.

¹⁶ Nɔ Ruutu mɔ í sinda í nyi bi Naomi anaɛu. Ŋɔi Naomi í beeɛ í ni, bɛirei ideu í ce, ama inaabom. Ŋɔi Ruutu í sisiaa mii iyi Boazi í cea nŋu fei.

¹⁷ Nɔ í sɔ̃ɔ bɛi Boazi í dɔ̃ má í ni, maà nyi bi anaɛu awɔ ngbɛ. Nɔ í muum ɔɔzu kiloo maatũ.

¹⁸ Ŋɔi Naomi í ni, to. Maa degbe ŋa ihɛ̃ ama inaabom hee kaa gbɔò bɛi ideu á kpa iri. Bii Boazi kù ce yaasei fei ndɛɛ nnyi mɔm kaa dɔ̃aa si.