Ruutu 2 - Bibeli do fee

Ruutu wa fengee si ikoi Boazi

¹ Wee Elimelɛki í nɛ nyaanze gɔ iyi à ya kpe Boazi. Inɛɛu í jɛ inɛ gɔ iyi í jɛ ilu jirima nɔ í nɛ amani.

² Ajɔ nŋu gɔ Ruutu í sɔ̃ Naomi í ni, jɔ̀ n bɔ ɔɔzu ku fengee ikoi inɛ gɔ iyi á cɔm do iju jiida. Ŋɔi Naomi í jɛaa í ni, koo ama inaabom.

³ Ŋɔi Ruutu í nɛ í koo wa fengee si iko gɔ do anyii woo mu ɔɔzu ŋau. Wee ikou ti Boazi nyaanzei Elimelɛkiui.

⁴ Iyi í ce sãa ŋɔi Boazi í to wa hai Betelehɛmu. Nɔ í ce woo mu ŋau fɔɔ í ni, Aɔ̃ Lafɛ̃ɛ ku wɛɛ do iŋɛ. Nɔ aŋa mɔ à jɛaa à ni, Aɔ̃ Lafɛ̃ɛ ku weeɛ.

⁵ Ŋɔi Boazi í bee amaacɛ iyi í jɛ inɛ ngboi woo mu ɔɔzu ŋau í ni, yooi í nɛ inaabo saatara ihɔ̃.

⁶ Ŋɔi í jɛaa í ni, inaaboi Moabu iyi í too Naomi wau mbɛ.

⁷ Í naa í tɔɔ wa í ni ka jɔ̀ nŋu ku maa fengee do anyii woo mu ŋau. Nɔ iyi í naa hai daakɔu baa bii í jɛ í sĩmi, keekei á jɛ.

⁸ Ŋɔi Boazi í sɔ̃ Ruutu í ni, maà bɔ ikoi inɛ mmu gɔ ku fengee má bii kù jɛ ihɛ̃. Gbe ihɛ̃ i maa ce icɛ do inaabo woo ce icɛm ŋa.

⁹ Cɔ do ikpa bii inɛ ŋa à waa mu i bɔ ikpa bɛ do anyi nŋa. Ǹ sɔ̃ woo ce icɛm ŋa tã ǹ ni a maà ceɛ ide gɔ. Nɔ bii agbɛ wa kpaɛ, bɔ bi boonyi ŋau nɔ i mɔ inyi iyi woo ce icɛm ŋa à kpã wau. Ì gbɔ?

¹⁰ Ŋɔi Ruutu í sɛɛbata hee ilɛ, nɔ í bee Boazi í ni, bɛirei í ce ì waa mum do jiida ku jɛ nɔ ì bi idem, amu iyi ǹ jɛ inɛ njoo.

¹¹ Ŋɔi Boazi í jɛaa í ni, à sisiim mam mam bɛi ì cea anaɛi hai waati iyi mɔkɔɛ í ku. Ǹ mà iyi ì jɔ̀ baaɛ do iyeɛ nɔ ì jɔ̀ ilɛ bii à bíɛ, nɔ ì naa ì wa si inɔi inɛ ŋa iyi i kù mà ajɔ kãma.

¹² Ilaaɔ̃ Lafɛ̃ɛi inɛi Izirɛli ŋa ku sãɛ mii iyi ì ce fei nɔ ku jɔ̀ i ba riba nla nla hai bi tɛɛ, si na iyi í jɔ̀ si awɔ gbugbãɛi ì naa i wa ku maa degbeɛ.

¹³ Nɔ Ruutu í jɛaa í ni, ǹ ba jiida ku jɛ si wajuɛ awɔ lafɛ̃ɛm, domi si ide ku fɔɛ ì tũ idɔm ntɔ ntɔ, amu iyi n kù to baa inɛ akãi woo ce icɛɛ ŋa.

¹⁴ Iyi waatii kujɛ í to, ŋɔi Boazi í kpe Ruutu í ni, naa wa awaɛ ŋa ka jɛ. So pɛ̃ɛ i gũsi ayɛ. Ŋɔi í koo í buba kɔkɔi woo ce icɛ ŋau nɔ Boazi í so ɔɔzu ku kɛkɛɛ í naa. Nɔ í ŋɔ í yo hee mbɔɛ í gbeaa.

¹⁵ Iyi í sinda í bɔ ku fengee má, Boazi í sɔ̃ woo ce icɛɛ ŋau í ni, i jɔ̀ ku maa fengee bɛ, nɔ baa bii í jɛ tengi bii i kù ko titã ŋai, i maà gbagba siɛ.

¹⁶ I jɔ̀ gɔgɔ ŋa a cuku ilɛ ŋa ku ba ku tasiɛ nɔ i maà nia ide kãma.

¹⁷ Ŋɔi Ruutu í fengee ikoi Boazi bɛ hee alɛ í koo í lɛò. Nɔ í kpokpo iyi í fengee í bau. Iyi í bau í ce zakai kiloo maatɛta.

¹⁸ Ŋɔi í soo í baaò wa inɔ ilu í naa í nyisi anaɛu. Nɔ í na anau ijɛ iyi í jɛ í gbeu mɔ.

¹⁹ Ŋɔi Naomi í beeɛ í ni, hai iwoi ì fengee iyi ihɛ̃u ihɛ̃ fei wa nnyi, hee iwoi ì koo ì ce icɛ bɛ ihɛ̃. Ilaaɔ̃ ku weea inɛ iyi í bi ideɛu bɛ. Ŋɔi Ruutu í sɔ̃ anaɛu í ni ikoi inɛ iyi nŋu í ce icɛu, lafɛ̃ɛi à ya kpe Boazi.

²⁰ Nɔ Naomi í sɔ̃ɔ í ni, Aɔ̃ Lafɛ̃ɛ ku weea inɛɛu bɛ. Jiida ku jɛi Aɔ̃ Lafɛ̃ɛ í ya wɛɛ do inɛ ŋa iyi à wɛɛ si hunde do si inɛ ŋa iyi à ku fei. Nɔ í sɔ̃ɔ má í ni, Boazi nyaanze nwai, nŋui í jɛ inɛ akãi inɛ ŋa iyi à nɛ kpãa a ya wa.

²¹ Nɔ Ruutu í sɔ̃ɔ má í ni, Boazi í sɔ̃m mɔm í ni n maa n fengee do anyii woo ce icɛi nŋu ŋau hee à koo à mu à tãò.

²² Nɔ Naomi í sɔ̃ Ruutu í ni, ama inaabom, í sĩa i ya maa too inaabo woo ce icɛi Boazi ŋau. Maà ya bɔ iko inya mmu gɔ má ku ba i maà na i ba bitandi.

²³ Ruutu kù jɔ̀ inaabo woo ce icɛi Boazi ŋau má hee à koo à kpaò irii icɛi ɔɔzu do bileeu. Nɔ wa wa bi anaɛ bɛ.