Ruutu 1 - Bibeli do fee

Laalɔ ŋa iyi í naa si kpasɛ̃i Elimelɛki

¹ Si waati iyi inɛ ngbo ŋau à waa mu ilɛi Izirɛli, ŋɔi ari í naa si ilɛu. Ŋɔi inɛi Betelehɛmu gɔ í dede hai ilɛi Zudaa nŋu do aboɛ do ama inɛmɔkɔ minji nŋa ŋa à koo à buba ilɛi Moabu.

² Mɔkɔui à ya kpe Elimelɛki, abou mɔ Naomi, ama inɛmɔkɔ minji ŋau mɔ Maloni do Kilioni. Inɛi Efarata ŋai, hai ilui Betelehɛmu si ilɛi Zudaa. Inɛ ŋau à koo à buba ilɛi Moabu.

³ Ŋɔi Elimelɛki mɔkɔi Naomiu í na í ku, nɔ Naomi í baa í gbe nŋu do ama inɛmɔkɔ minjiɛ ŋau.

⁴ Ama inɛmɔkɔɛ ŋau à na à so abo ŋa si dimii Moabu ŋau. Abo sinteui à ya kpe Ɔɔpa, minjisiau mɔ Ruutu. Nɔ à buba si ilɛu bɛ à ce adɔ̃ mɛɛwa. Si anyii adɔ̃ mɛɛwau,

⁵ Maloni do Kilioni mɔ à na à ku, nɔ Naomi í baa í gbe nŋu akã, í kua mɔkɔɛ do ama inɛmɔkɔ minjiɛ ŋau.

Ruutu í too Naomi à nɛ Betelehɛmu

^6-7 Hai ilɛi Moabu bɛ, Naomi í gbɔ iyi Aɔ̃ Lafɛ̃ɛ í cea inɛɛ ŋa jiida í jɔ̀ amaajɛ nŋa ŋa à ce ncɛɛ. Ŋɔi í dede nŋu do aboi amaɛ ŋau ku ba a nɛ hai ilɛi Moabuu, nɔ à dasi kpãa à waa nyi ilɛi Zudaa.

⁸ Ŋɔi Naomi í sɔ̃ aboi amaɛ ŋau í ni, bɛbɛi iŋɛ fei i nyi bi iye nŋɛ ŋa. Aɔ̃ Lafɛ̃ɛ ku ce nŋɛ jiida bɛi iŋɛ mɔ ì cea amam ŋa iyi à ku ŋau jiida do amu takam.

⁹ Aɔ̃ Lafɛ̃ɛ ku jɔ̀ iŋɛ fei i ba mɔkɔ, nɔ i nɛ laakai ku sũ si inɔ kpasɛ̃ nŋa ŋa. Nɔ wa baabaa inaabo minji ŋau aŋaò ŋa a bɛi a fɛɛfɛ njɛ. Ŋɔi aŋa fei à dɔ̃ anu hee lele à waa kpata ntɔ ntɔ,

¹⁰ nɔ à sɔ̃ Naomi à ni, aawo. Awa fei aa ka tooɛ ka nɛ bi inɛɛ ŋai.

¹¹ Nɔ Naomi í ni, iŋɛ ama inaabom ŋa, i sinda i nyi ide nŋɛ ŋa. Bɛirei í ce ì waa bi i toom ŋa. Ǹ gbo tã n kaa n yɔkɔ n bí ama inɛmɔkɔ ŋa iyi aa na a so ŋɛ a ce abo má.

¹² I sinda i jɔ̀m, i nɛ ide nŋɛ ŋa, domi ǹ gbo tã n kaa n so mɔkɔ má. Nɔ baa bii ǹ ni kpãa ku cɔ í wɛɛm mái, baa bii í jɛ idũuyi mɔm an ba mɔkɔ n bíò ama inɛmɔkɔ ŋa,

¹³ aa yɔkɔ i degbe hee a la ŋa? I kaa so inɛ mmu ŋa? Aawo ama inaabom ŋa, i cɔ, inɔ kufɔ iyi ǹ nɛ í re baa tu ŋɛ. Amui Aɔ̃ Lafɛ̃ɛ í sinda si.

¹⁴ Ŋɔi à dɔ̃ anu má hee lele à waa kpata ntɔ ntɔ, nɔ Ɔɔpa í ya ana nŋau í baabaaɛ í bɛi í sinda í nyi ide, amma Ruutu í ya anaɛ kù jɔ̀ɔ.

¹⁵ Ŋɔi Naomi í sɔ̃ Ruutu í ni, cɔ kpaasiɛ njɛ í sinda í nyi bi inɛɛ ŋa, do bi iwɛ̃ɛ ŋa. Ce bɛi nŋu mɔ í ce, awɔ mɔ sinda i nyi ideɛ.

¹⁶ Amma Ruutu í jɛaa í ni, maà mantem n kɔ̀ siɛ n sinda n nyi idem. Bii ì waa bɔ bɛi an bɔ. Bii aa koo i buba, bɛi an buba. Inɛɛ ŋai aa jɛ inɛm ŋa. Ilaaɔ̃ Lafɛ̃ɛɛi á jɛ Lafɛ̃ɛi amu mɔ.

¹⁷ Tengi bii aa ku, bɛi amu mɔ an ku nɔ bɛ mɔi aa sim. Aɔ̃ Lafɛ̃ɛ ku kpãm iju ntɔ ntɔ bii kù jɛ ikui í fɛɛfɛ amu do awɔ.

¹⁸ Iyi Naomi í yɛ iyi Ruutu í leekĩ si nŋu ku tooɛ ŋɔi í coko kù waa manteɛ má.

¹⁹ Ŋɔi aŋaò fei à nɛ hee Betelehɛmu. Kuto nŋa í dede anu ku dɔ̃ nla nla si iluu. Inaabo ŋa à wasi ku ni, Naomi mbɛ ntɔ ntɔ?

²⁰ Ŋɔi Naomi í sɔ̃ ŋa í ni, i maà kpem Naomi má ŋa, i kpem Mara, domi Ilaaɔ̃ ilu gbugbã fei í dasim inɔ kufɔ nla nla.

²¹ Awɔm wa kɔ̃i hai ihɛ̃ waati iyi ǹ wa n koo, nɔ Aɔ̃ Lafɛ̃ɛ í jɔ̀ ǹ baa awɔ ngbɛ. Na nŋu, i maà kpem Naomi má ŋa, domi Aɔ̃ Lafɛ̃ɛ ilu gbugbã fei í sinda sim nɔ í dasim wahala.

²² Si bɛɛbɛi Naomi í baa hai ilɛi Moabu, nŋu do Ruutu aboi amaɛ inɛi Moabuu. À to wa Betelehɛmui waati iyi à sinti ɔɔzu ku mu.