Romu 9 - Bibeli do fee

Ilaaɔ̃ do inɛi Izirɛli* ŋa

¹ Ntɔi ǹ wa n fɔ, amu inɛi Kirisi, n kaa n sɔ ibo. Idɔm do Hundei Ilaaɔ̃ à jɛsi iyi ntɔi.

² Inɔm í fɔ ntɔ ntɔ na Zuifu kpaasi ŋa nɔ ǹ ya n maa n ce araare nŋa waati kãma fei.

³ An jɛsi Ilaaɔ̃ ku ceekpem nɔ ku fɛɛfɛɛm do Kirisi ku ba inɛ ŋa iyi à jɛ dimim a ba faaba.

⁴ Aŋai à jɛ inɛi Izirɛli ŋa, inɛ ŋa iyi Ilaaɔ̃ í cica a jɛ tɛɛ bɛi amaɛ ŋa, nɔ í nyisi ŋa amboeɛ. Do aŋai í dĩ akabuuɛ ŋa, nɔ í na ŋa wooda do kpãaɛ ku tɔɔ, do idei kuwãɛ.

⁵ Bala nŋa ŋai à jɛ inɛi Ilaaɔ̃ ŋa. Si dimi nŋai Kirisi í fita bɛi amanɛ nŋu iyi í re mii fei. Nŋui í jɛ Ilaaɔ̃, nŋu iyi í jɔ ka maa saabu hee do ajɔ fei. Ami.

⁶ Kù jɛ ǹ wa n ni ide iyi Ilaaɔ̃ í wãu í jɛ ngbɛ, amma kù jɛ inɛ ŋa iyi à bí si dimii inɛi Izirɛli ŋau feii à jɛ inɛi Izirɛli do ntɔ.

⁷ Kù nɔ kù jɛ inɛ ŋa iyi à bí si dimii Aburahamu feii à jɛ tɔkuɛ ŋa do ntɔ, domi Ilaaɔ̃ í sɔ̃ Aburahamu í ni, dimii amai Izaaki ŋai aa jɛ tɔkuɛ ŋa.

⁸ Waatɔ kù jɛ amai Aburahamu ŋa feii à jɛ amai Ilaaɔ̃ ŋa, í gbe amu ŋa iyi Ilaaɔ̃ í cea kuwãɛ ŋau, aŋa akã.

⁹ Ide iyi Ilaaɔ̃ í wãò Aburahamu wee. Í ni, adɔ̃ gɔ suku bɛ ihɛ̃ an nyi wa má, hee waati bɛɛbɛ Sara á bí ama inɛmɔkɔ.

¹⁰ Kù jɛ iyi bɛ nŋu akã, ama minjii Rebeka ŋau sika ŋai. Baa nŋai í jɛ bala nwa Izaaki.

^11-12 Amma hee Rebeka ku maa bí ŋa, si waati iyi a kù ce jiida gɔ titã hee má jɛ laalɔ, Ilaaɔ̃ í sɔ̃ Rebeka í ni, inɛ sinteui á ya sũa inɛ ankãanyiu iri ilɛ. Í fɔ bɛɛbɛi ku ba ku nyisi iyi nŋu í ya cica inɛ ŋai bɛi nŋu takai nŋu í bi, nɔ í kpe ŋa si bɛi nŋu takaɛ í jilɛ, kù jɛ na kuce nŋa.

¹³ Tiai idei Ilaaɔ̃ í fɔ má í ni, Ilaaɔ̃ í ni, ǹ bi Zakɔbu nɔ ǹ cé Esau.

¹⁴ Debɛi, bɛirei aa ka fɔ nsɛi. Ilaaɔ̃ kù jɛ dee deei? Aawo, kù jɛ bɛɛbɛ,

¹⁵ domi í sɔ̃ Moizi í ni, inɛ iyi ǹ bii an cea didɔ̃, nɔ inɛ iyi ǹ bii an ce araareɛ.

¹⁶ Na nŋu, kù jɛ na idɔɔbii inɛ gɔ, kù nɔ kù jɛ na kookaai inɛ gɔ, amma na araarei Ilaaɔ̃i.

¹⁷ Bɛɛbɛi kukɔi idei Ilaaɔ̃ wa fɔ idei Faraɔ̃, í ni n kã n ceɛ ilaalui ku ba inɛ ŋa a yɛ gbugbãm siɛ, nɔ inɛi andunya fei ku gbɔ irim.

¹⁸ Bɛɛbɛi Ilaaɔ̃ í ya ce araarei inɛ iyi í bi, nɔ ku le idɔi inɛ mɔ iyi í bi.

¹⁹ Bii bɛɛbɛi, inɛ gɔ á yɔkɔ ku sɔ̃m ku ni, Ilaaɔ̃ kù nɛ kpãa ku yɛ taalei amanɛ ŋa má, domi inɛ kãma kaa yɔkɔ ku dede si mii iyi í jilɛ.

²⁰ Awɔ iyi ì waa fɔ bɛɛbɛ, yooi ì jɛ i bɛi i kakɔɔ Ilaaɔ̃. Caka á yɔkɔ ku bee woo ma ku ni, na mii í ce ì mam bɛ ihɛ̃?

²¹ Kù jɛ woo ma cakai á ceò amà bɛi í bi ba. Si amà akãu bɛ kaa yɔkɔ ku ce caka iyi à ya maa ceò icɛ waati kãma fei do caka iyi í nɛ bɛɛrɛ í re ba.

²² To, yaaseu bɛ wa nyisi mii iyi Ilaaɔ̃ í ce. Í bi ku nyisi inɛ gɔ ŋa idɔɔkɔ̃ nlaɛ do gbugbãɛ. Amma í temuai titã do inɛ ŋa iyi idɔɛ í kɔ̃ siu, aŋa iyi à yɛ bɛi caka ŋa iyi aa nyɔu.

²³ Inɛ gɔ ŋa mɔ í bi ku nyisi ŋa bɛi amboeɛ í la í to. Aŋai í ce araare nŋa nɔ í ce sɔɔlu nŋa hai ku kpɛ a nɛ ikpɛ̃ si amboeɛ.

²⁴ Inɛ ŋau awai. Si inɔ nwa Zuifu ŋa do hai jɛ Zuifu ŋa à wa si. Ilaaɔ̃i í kpe awa fei.

²⁵ Bɛɛbɛi walii Ozee í fɔ si tiaɛ í ni, Ilaaɔ̃ í ni, inɛ ŋa iyi a kù jɛ tom wo, nsɛi an kpe ŋa inɛm ŋa. Dimi ŋa iyi n kù bi wo, nsɛi an kpe ŋa baakɔɔm ŋa.

²⁶ Nɔ tengi bii ǹ sɔ̃ ŋa wo ǹ ni, i kù jɛ inɛm ŋa, bɛ mɔi an kpe ŋa má amam ŋa, amu iyi ǹ jɛ irii kuwɛɛ.

²⁷ Ŋɔi walii Ezai í fɔ ide hee lele na irii inɛi Izirɛli ŋa í ni, baa bii inɛi Izirɛli ŋau à kpɔ bɛi sãai acĩi ido, inɛ mbɔi á ba faaba.

²⁸ Ide iyi Ilaaɔ̃ í fɔu á kɔ̃i mam mam si andunyau, nɔ kaa kpɛ mɔm.

²⁹ Í yɛ mbɛ bɛi walii Ezai í tako í fɔu iyi í ni, bii Aɔ̃ Lafɛ̃ɛi lele do ilɛ kù jɔ̀ nwa fiti mbɔi amanɛ ŋa wo ni, awa fei aa ka kui wo bɛi inɛi Sodomu ŋa, do inɛi Gomɔɔ ŋa.

Inɛi Izirɛli* ŋa do laabaau jiida

³⁰ Debɛi, bɛirei aa ka fɔ. Bɛi aa ka fɔ wee. Dimi mmu ŋa iyi a kù waa dɛ à jɛ dee dee si wajui Ilaaɔ̃ wo, nsɛi à jɛ dee dee na saabui naanɛ ku dasi nŋa.

³¹ Amma inɛi Izirɛli ŋa iyi à waa dɛ aŋa a too wooda ku ba aŋa a jɛ dee dee si wajui Ilaaɔ̃, kù ce.

³² Na mii. Si na iyi í jɔ̀ inɛi Izirɛli ŋa a kù dɛdɛɛ do naanɛ ku dasi, í gbe do icɛ nŋa. À koosɛ si kuta iyi í ya jɔ̀ inɛ ŋa a koosɛu.

³³ Ideɛi kukɔu wa fãa í ni, wee ǹ wa n jilɛ inɛ gɔ Siɔ̃ɔ iyi í yɛ bɛi kuta bi ku koosɛ. Nŋui á jɔ̀ inɛ gɔ ŋa a cuku, amma inɛ iyi í dasiɛ naanɛ kaa yɛ anyɔ.