Romu 8 - Bibeli do fee

Kuwɛɛ iyi Hundei Ilaaɔ̃ wa mu nwa

¹ Na nŋu, nsɛi Ilaaɔ̃ kaa yɛ taalei inɛ ŋa iyi à nɛ anu akã do Jesu Kirisi má.

² Hundei Ilaaɔ̃i í ya jɔ̀ inɛ ku ba kuwɛɛ na saabui Jesu Kirisi, nɔ gbugbãi Hundeɛui í nyam hai si gbugbãi dulum do ti iku.

³ Mii iyi woodai Moizi kù yɔkɔ ku ce si na iyi í jɔ̀ mɔngɔi amanɛ ŋa í jɔ̀ woodau í kua gbugbã, Ilaaɔ̃ í coo. Dulum iyi í wa si arai amanɛ, í kiitiɛ si waati iyi í jɔ̀ Amai nŋu takaɛ í so ara iyi í jɔ arai dulum dii amanɛ ŋa nɔ í bɔɔ wa.

⁴ Ilaaɔ̃ í ce bɛɛbɛi ku ba isɛɛnɛ nwa ku jɛ dee dee si ide iyi woodau wa fɔ, awa iyi a kù waa nɛ si idɔɔbii ara nwa, í gbe si idɔɔbii Hundei Ilaaɔ̃.

⁵ Inɛ ŋa iyi à waa nɛ si idɔɔbii ara, lasabu nŋa fei si daai araui í ya wa. Amma inɛ ŋa iyi à waa nɛ si idɔɔbii Hundei Ilaaɔ̃, lasabu nŋa fei si mii iyi Hundeu í bii í ya wa.

⁶ Inɛ ŋa iyi lasabu nŋa fei í wa si idɔɔbii ara, ikui á jɛ iri ku kpa nŋa. Amma inɛ ŋa iyi lasabu nŋa í wa si mii iyi Hundei Ilaaɔ̃ í bi, lafɛ̃ɛ ŋa aa ba kuwɛɛ do laakai ku sũ.

⁷ Inɛ ŋa mɔ iyi à waa too idɔɔbii ara, aŋai à jɛ mbɛɛi Ilaaɔ̃ ŋa. A kù waa jirima woodaɛ, nɔ a kaa yɔkɔ mɔm.

⁸ Inɛ ŋa iyi à waa too idɔɔbii ara a kaa yɔkɔ a ce iyi á dɔ̃a Ilaaɔ̃ si.

⁹ Amma iŋɛ i kù waa too idɔɔbii ara, ì waa nɛ ŋai bɛi Hunde í bi, bii Hundei Ilaaɔ̃ í wa si ŋɛ do ntɔ. Inɛ iyi kù nɛ Hundei Kirisi, lafɛ̃ɛ kù jɛ ti Kirisi.

¹⁰ Nɔ bii Kirisi í wa si ŋɛ, baa do iyi ara nŋɛ í ku na dulum fei, Hundei Ilaaɔ̃ í jɔ̀ ì wɛɛ ŋa domi ì jɛ dee dee si wajui Ilaaɔ̃ ŋa.

¹¹ Ilaaɔ̃i í jĩ Jesu hai si balɛ. Nɔ bii Hundei nŋu iyi í jĩ Kirisi hai si balɛu í wa si ŋɛ á na ara iku nŋɛ ŋau mɔ kuwɛɛ na saabui Hundeɛ iyi í wa si ŋɛu.

¹² Na nŋu iŋɛ inɛm ŋa, Ilaaɔ̃i à nɛ ka saabu, kù jɛ ara hee arau ku tilasi wa ka ceò mii iyi í bi.

¹³ Ntɔ ntɔ, bii ì waa ce idɔɔbii ara aa ku ŋa. Amma bii ì jɔ̀ Hundei Ilaaɔ̃ í sobi ŋɛ i kpaò kookoosui arau aa nɛ kuwɛɛ ŋa,

¹⁴ domi inɛ ŋa iyi Hundei Ilaaɔ̃ wa gbã fei, aŋai à jɛ amai Ilaaɔ̃ ŋa.

¹⁵ Hunde iyi Ilaaɔ̃ í mu nŋɛ kaa ce ŋɛ aru, kaa nɔ ku jɔ̀ njo ku mu ŋɛ má, amma Hundeu í ce ŋɛ amai Ilaaɔ̃ ŋa, nɔ do saabuɛi aa ka yɔkɔ ka kpe Ilaaɔ̃, ka ni Baaba.

¹⁶ Hundei Ilaaɔ̃ takaɛ wa sɔ̃ hunde nwa iyi à jɛ amai Ilaaɔ̃ ŋa.

¹⁷ To, si bɛi à jɛ amaɛ ŋa, nŋui í jɔ̀ à nɛ baa si mii iyi í jilɛ nwa. Aa ka nɛ ikpɛ̃ do Kirisi ajɔ, domi bii à baa ijuukpãɛ ku kpɛ̃, bɛɛbɛ mɔi aa ka baa amboeɛ ku kpɛ̃ má.

Amboe iyi á na ku naa

¹⁸ Ǹ mà wahalai nsɛi nwau ihɛ̃ kù jɛ nkãma do amboe iyi Ilaaɔ̃ á na ku nyisi wa.

¹⁹ Baa mii ŋa iyi Ilaaɔ̃ í taka fei à waa degbe ajɔ nŋu do saasa, ajɔ si bii Ilaaɔ̃ á jɔ̀ a yɛ amboeɛ si amaɛ ŋa,

²⁰ domi mii ŋa iyi í taka fei à dási kpãai nfe ku ce, kù jɛ na idɔɔbii aŋa taka nŋa, Ilaaɔ̃i í coo bɛɛbɛ. Do nŋu fei, kpãa ku cɔu mɔ í wɛɛ

²¹ iyi Ilaaɔ̃ á ya mii ŋau mɔ ku ba kãma nŋa ku maà bɛjɛ má nɔ a nɛ ikpɛ̃ si amboei ara ku nɛi amai Ilaaɔ̃ ŋa.

²² À mà iyi hee nsɛi mii ŋa iyi Ilaaɔ̃ í taka fei à waa kakaai bɛi inaabo iyi wa kakaa do ara kuroi kubí.

²³ Nɔ iyi í re mɔm, baa awa iyi Ilaaɔ̃ í mu nwa Hundeɛ bɛi fiai kaazigi, à waa kakaa si idɔ nwa à waa degbeò Ilaaɔ̃ ku nyisi iyi à jɛ amaɛ ŋa ntɔ ntɔ nɔ ku faaba ara nwa.

²⁴ Faabau í jɛ tu wa, amma si kpãaɛ ku cɔi à wa si titã. Bii à yɛ mii iyi à waa degbe, kudegbe kù wɛɛ má. Mii iyi amanɛ wa yɛ á maa cɔ kpãaɛ má?

²⁵ Amma bii à waa cɔ kpãai mii gɔ iyi a kù waa yɛ, aa ka maa degbeɛi do temua.

²⁶ Bɛɛbɛ mɔi Hundei Ilaaɔ̃ í ya maa sobi wa si gbugbã hai nɛ nwa, domi a ci ya ka mà mii iyi í sĩa ka tɔɔ. Amma Hundeu takaɛi í ya tɔɔ Ilaaɔ̃ na iri nwa do ide iyi í re ide ku fɔi amanɛ ŋa.

²⁷ Nɔ Ilaaɔ̃, nŋu iyi wa yɛ idɔi amanɛ ŋa í mà mii iyi Hundeu wa lasabu, domi do idɔɔbiɛi Hundeu wa tɔɔɛ na irii inɛ ŋa iyi à jɛ tɛɛ.

²⁸ Nɔ iyi í re mɔm, à mà sãa sãa, inɛ ŋa iyi à bi Ilaaɔ̃, aŋa iyi í kpe si idɔɔbiɛ à jɛ tɛɛ, Ilaaɔ̃ wa ce icɛ si mii iyi wa ba ŋa fei ku ba ku ce nŋa jiida.

²⁹ Ntɔ ntɔ, inɛ ŋa iyi Ilaaɔ̃ í cica hai tako, aŋai í jilɛ ku ba a jɔ Amaɛ. Si bɛɛbɛ Amaɛui á jɛ yemmai ifɔ nkpɔ nkpɔ.

³⁰ Inɛ ŋa iyi í cica í jilɛu, nŋui í kpe ŋa. Inɛ ŋa iyi í kpeu í ce ŋa dee dee. Inɛ ŋa iyi í ce dee deeu í ce nŋa ikpɛ̃i amboeɛ.

Kulai kubii Ilaaɔ̃

³¹ Debɛi bɛirei aa ka fɔ má. Bii Ilaaɔ̃ í jɛ tu wa, yooi á yɔkɔ ku jɛ mbɛɛ nwa.

³² Ilaaɔ̃ kù kɔ̀ò Amai nŋu takaɛ, amma í jɔ̀ à daa inɛ ŋa si awɔ à kpaa na irii awa fei. Nŋu iyi í na wa Amaɛu bɛɛbɛ, bɛirei á ce iyi kù mu nwa mii iyi í gbe fei.

³³ Inɛ ŋa iyi Ilaaɔ̃ í cica, yooi á yɔkɔ ku yɛ taale nŋa má. Kù wɛɛ, domi Ilaaɔ̃i í ce ŋa dee dee.

³⁴ To, yooi á yɔkɔ ku jɔ̀ a yɛ ijuukpã. Kù wɛɛ, domi Jesu Kirisi í ku, nɔ iyi í re mɔm í jĩ hai si balɛ má, í wa awɔ njɛi Ilaaɔ̃. Í nɔ wa tɔɔ Ilaaɔ̃ na iri nwa.

³⁵ Yooi á yɔkɔ ku fɛɛfɛ wa do kubii Kirisi. Inɔ kufɔ? Mà wahala. Mà ijuukpã. Mà ari. Mà are. Mà mbiisi. Mà igũ.

³⁶ Ntɔ ntɔ, si bɛi kukɔi idei Ilaaɔ̃ í fɔ, Lafɛ̃ɛ, na iriɛi à ya ka wa si anui iku alɛò daakɔ. À waa cɔ wa bɛi angudã ŋa iyi à waa bɔ ku saka.

³⁷ Amma si mii ŋau ihɛ̃ fei à jɛ igũ mam mam na saabui Kirisi iyi í bi wa,

³⁸ domi ǹ mà kãm kãm, nkãma kù wɛɛ iyi á yɔkɔ ku fɛɛfɛ wa do kubiɛ. Baa iku kaa yɔkɔ, walakɔ kuwɛɛ, do amaleka ŋa, do yiikoi lele ŋa do gbugbã mmuɛ ŋa. Mii iyi í ba wa nnyi hee do iyi á na ku ba wa ala fei, kãma nŋa kaa yɔkɔ.

³⁹ Mii ŋa iyi à wa lele do iyi à wa ilɛ hee do mii iyi à taka fei, nkãma kaa yɔkɔ ku fɛɛfɛ wa do kubi iyi Ilaaɔ̃ í nyisi wa si Jesu Kirisi Lafɛ̃ɛ nwa.