Romu 7 - Bibeli do fee

Njɛ ku so í jɛ nwa yaase

¹ Iŋɛ inɛm ŋa, iŋɛ iyi ì mà wooda ŋa, i kù mà ŋa iyi wooda í nɛ gbugbãi si amanɛ si waati iyi í wɛɛ si hunde nŋu akã?

² Bɛɛbɛ mɔi abo à so mɔkɔ í nɛ ku wa bi mɔkɔɛ si waati iyi mɔkɔu í wɛɛ. Amma bii mɔkɔu í ku abou í fita si woodai njɛ ku so mbɛ.

³ Na nŋu, bii mɔkɔu í wɛɛ nɔ abou í koo í so mɔkɔ mmu, abo à ce sakarai aa kpoo. Amma bii mɔkɔɛ í ku, í fita si woodai njɛ ku soui. Waati bɛɛbɛ bii í so mɔkɔ mmu kù jɛ à ce sakara má.

⁴ Bɛɛbɛ mɔi iŋɛ inɛm ŋa, anu akã nŋɛ do Kirisi í jɔ̀ iŋɛ mɔ ì ku do nŋu ajɔ nɔ ì fita hai si awɔi wooda ŋa. Bɛbɛi ti inɛ mmui ì jɛ ŋa. Ti inɛ iyi í jĩ hai si balɛui ì jɛ ŋa ku ba i so iso iyi í jɛ ti Ilaaɔ̃ ŋa.

⁵ Waati iyi à wɛɛò daa nwo nwa ŋa wo, wooda í dede kɔdɛɛ laalɔ si wa, nɔ kɔdɛɛu wa ce icɛ si ikɔ̃i ara nwa ikã ikã fei nɔ wa bɔò wa bi iku.

⁶ Amma nsɛi, si bɛi à ku si gãmɛi wooda, nŋu iyi wa mu wa wo bɛi aru, à fita hai si awɔɛ. Bɛbɛi aa ka yɔkɔ ka cea Ilaaɔ̃ icɛ do daa titɔ̃ iyi í jɛ ti Hundeɛ, kaa jɛ do daa nwo iyi í jɛ ti wooda.

Wooda* do dulum

⁷ To, bɛirei aa ka fɔ. Woodau dulum nii? Aawo, kù jɛ bɛɛbɛ. Amma na saabui woodaui í jɔ̀ ǹ mà dulum. Ntɔ ntɔ, n kaa n mà mà kɔdɛɛ dulum nii wo bii wooda kù ni n maà n ce kɔdɛɛ.

⁸ Nɔ na woodaui dulum í ba kpãa í bíim kɔdɛɛ ikã ikã fei, domi bii wooda kù wɛɛ dulum mɔ kaa wɛɛ.

⁹ Tako waati iyi n kù mà wooda, ǹ wɛɛ wo, amma waati iyi ǹ na ǹ mà wooda, dulum í dedei

¹⁰ nɔ ǹ ku. Bɛɛbɛi wooda iyi í nɛ ku jɔ̀ n nɛ kuwɛɛ, ǹ ba wee ikui í naam wa,

¹¹ domi dulum í ceò wooda icɛ nɔ í wa inyii itĩm í kpam.

¹² Ntɔ ntɔ wooda í má nɔ ideɛ mɔ í má, í jɛ dee dee, í nɔ í sĩa.

¹³ Debɛi mii jiidau í baa í jɛɛm kpãai iku? Aawo, kù jɛ bɛɛbɛ. Dulum nii í kpam. Mii jiidai í so í na í kpam do. Nŋui í jɔ̀ à yɔɔ iyi dulum í jɛ mii laalɔ do ntɔ nɔ do saabui wooda à yɛ iyi dulum í gaabu í caa.

Inɛ iyi dulum í kãmia

¹⁴ Ntɔi à mà iyi woodai Ilaaɔ̃ ti hundei, amma amu amanɛi iyi à taa dulum ǹ jɛ aruɛ.

¹⁵ Mii iyi ǹ wa n ce n ci ya n mà yaaseɛ, domi mii iyi ǹ bi, n ci ya n ce nŋu, amma mii iyi ǹ cé, nŋui ǹ ya n ce.

¹⁶ Bii ǹ wa n ce iyi n kù bi, ǹ jɛsi iyi wooda í sĩai.

¹⁷ Amma bii bɛɛbɛi, kù jɛ amui ǹ wa n coo má, dulum iyi í wa sim nii wa coo.

¹⁸ Ǹ mà sãa sãa iyi mii jiida kãma kù wa sim, waatɔ daam nii ǹ wa n fãa, domi waati kãma fei ǹ ya n maa n bi jiida ku ce, amma kuceɛi n ci ya n yɔkɔ.

¹⁹ N ci ya n ce jiida iyi ǹ bi, í gbe laalɔ iyi n kù biu.

²⁰ Nɔ bii ǹ wa n ce iyi n kù bi, kù jɛ a ni amui ǹ wa n coo, dulum iyi í wa sim nii wa coo.

²¹ To, ǹ yɛ ide gɔ í wɛɛm. Nŋu wee. Waati iyi ǹ bi jiida ku ce fei, laalɔi í ya maa má sim.

²² Si idɔm woodai Ilaaɔ̃ ku jirima í dɔ̃,

²³ amma si kucei ikɔ̃ ikɔ̃i aram fei ǹ wa n yɛ ide mmu gɔ iyi wa ja do lasabum, nɔ wa cem arui dulum iyi í wa sim.

²⁴ Ilu inɔ kufɔi ǹ jɛ. Yooi á nyam hai si awɔi ara iyi wa bɔɔm ikuu ihɛ̃.

²⁵ Ǹ wa n saabu Ilaaɔ̃ do saabui Jesu Kirisi Lafɛ̃ɛ nwa. Bɛɛbɛ mɔi, ǹ jɛ arui woodai Ilaaɔ̃ si idɔm, amma si daam ǹ jɛ arui gbugbãi dulum.