Romu 6 - Bibeli do fee

À ku si gãmɛi dulum, nɔ à jɛ ilu hunde si Kirisi*

¹ Debɛi bɛirei aa ka ce. Aa ka ya maa ce dulum ku ba didɔ̃u ku kɔ̃ɔsi?

² Aawo, kù jɛ bɛɛbɛ. Awa iyi à ku si gãmɛi dulum, bɛirei aa ka ce ka maa jɛ kuwɛɛ nwa si dulum má.

³ I kù mà ŋa awa iyi à dasi wa inyi do irii Jesu Kirisi fei, à kui bɛi nŋu mɔ í ku?

⁴ Na nŋu, si inyi ku dasiu à ku do nŋu ajɔ, nɔ à si wa do nŋu ajɔ, ku ba bɛi amboei Ilaaɔ̃ Baaba í dedeɛ hai si balɛ awa mɔ ka maa nɛ si kuwɛɛ titɔ̃.

⁵ Ntɔ ntɔ, si bɛi anu akã nwa do nŋu í jɔ̀ à ku do nŋu ajɔ, kù nɛ sika á jɔ̀ ka dede má hai si balɛ do nŋu ajɔ.

⁶ À mà iyi à kpakpa daa nwo nwa si jĩi ku gaau do Jesu ajɔ, ku ba daa nwo nwa iyi wa dasi wa dulum nɔu ku kpa iri, nɔ ka maà jɛ arui dulum má,

⁷ domi dulum kaa nɛ gbugbã kãma má si inɛ iyi í ku.

⁸ Nsɛi, si bɛi à ku do Kirisi ajɔ, bɛɛbɛ mɔi à nɛ naanɛ iyi aa ka ba kuwɛɛ do nŋu ajɔ,

⁹ domi à mà iyi Kirisi, nŋu iyi í dede hai si balɛ kaa ku má, iku kù nɛ siɛ gbugbã má.

¹⁰ Waati iyi í ku, í kui gbakã akã na irii dulum, amma í baa si kuwɛɛ má, nɔ kuwɛɛ iyi í wa si nsɛi í jɛ ti Ilaaɔ̃.

¹¹ Bɛɛbɛ mɔi iŋɛ taka nŋɛ i doo ara nŋɛ bɛi iku si gãmɛi dulum, nɔ i doo ara nŋɛ ilu hunde má si wajui Ilaaɔ̃ na anu akã nŋɛ iyi ì nɛ do Jesu Kirisi ŋa.

¹² Na nŋu, i maà jɔ̀ dulum ku jɛ bomma si ara nŋɛ má, i maà ti i jɔ̀ kɔdɛɛi arau ku kãmia ŋɛ má.

¹³ I maà ti i jɔ̀ ikɔ̃ ikɔ̃i ara nŋɛ kãma kù wa si awɔi dulum má i maa ceò laalɔ ŋa. Amma i so ara nŋɛ i na Ilaaɔ̃ bɛi inɛ ŋa iyi à jĩ wa hai si balɛ, nɔ i so ikɔ̃ ikɔ̃i ara nŋɛ fei i daa Ilaaɔ̃ si awɔ ŋa i maa ceò jiida.

¹⁴ Dulum kù nɛ ku nɛ si ŋɛ gbugbã má domi wooda kù nɛ gbugbã si ŋɛ amma didɔ̃i Ilaaɔ̃i í nɛ gbugbã si ŋɛ.

Ka jɛ arui icɛ jiida ku ce

¹⁵ To, mii aa ka ce. Si bɛi Ilaaɔ̃ í ce nwa didɔ̃ nɔ wooda kù nɛ si wa gbugbã, dulum nii aa ka maa ce? Aawo, kù jɛ bɛɛbɛ.

¹⁶ Ì mà sãa sãa ŋa bii ì so ara nŋɛ ì daa inɛ gɔ si awɔ ì waa jirimaɛ ŋa, inɛ iyi ì waa jirimau bɛ ŋa aruɛi ì jɛ ŋa. Bii ì jɛ arui dulum ŋa, kɔkɔɔɛi í jɛ iku, bii ì nɔ ì jɛ arui Ilaaɔ̃ ku jirima ŋa, kɔkɔɔi nŋu mɔi á jɔ̀ Ilaaɔ̃ ku ce ŋɛ inɛ dee dee ŋa.

¹⁷ Amma ka saabu Ilaaɔ̃ domi baa do iyi ì jɛ arui dulum ŋa wo, nsɛi do inɔ akãi ì waa jirima kukɔsi iyi à da nŋɛ si awɔ.

¹⁸ À ya ŋɛ hai si awɔi dulum, nɔ ì baa ì jɛ arui icɛ jiida ku ce ŋa.

¹⁹ Ǹ wa n sɔ̃ ŋɛ ideu ihɛ̃i do yaasei kucei inɛ ŋa na gbugbã hai nɛ nŋɛ. Si bɛi ì tako ì so ikɔ̃ ikɔ̃i ara nŋɛ ikã ikã ì daa riisi do laalɔ si awɔ bɛi aru ku ba i ceò laalɔ ŋa, nsɛi ì nɛ i so ikɔ̃i ara nŋɛ fei i jɔ̀ ku jɛ arui icɛ jiida ku ce ŋau ŋa ku ba daa nŋɛ ku má.

²⁰ Waati iyi ì waa jɛ arui dulum ŋa, ì ya jilɔɔ si i kù nɛ i ce mii iyi Ilaaɔ̃ wa tɔɔ ŋɛi.

²¹ Riba yoomai ì ya ba ŋa waati bɛɛbɛ. Riba iyi ì ba ŋau wa mu ŋɛ anyɔ nsɛi, nɔ iri ku kpaɛ ikui.

²² Amma nsɛi à ya ŋɛ hai si awɔi dulum ì baa ì jɛ arui Ilaaɔ̃ ŋa, riba nŋɛi í jɛ daa iyi í má, iri ku kpaɛ mɔi í jɛ kuwɛɛ hai tã.

²³ Ribai dulum nii í jɛ iku, amma amuai Ilaaɔ̃i í jɛ kuwɛɛ iyi ci ya tã na anu akã nwa iyi à ce do Jesu Kirisi Lafɛ̃ɛ nwa.