Romu 4 - Bibeli do fee

Yaase iyi à yɛ si kuwɛɛi Aburahamu*

¹ Bɛirei aa ka fɔ nsɛi do idei Aburahamu bala nwa. Mii í ba.

² Bii Ilaaɔ̃ í ce Aburahamu amanɛ dee dee na icɛ iyi í ce, á yɔkɔ ku tɔɔò fufu. Amma kù nɛ si bii á tɔɔò fufu si wajui Ilaaɔ̃,

³ domi kukɔi idei Ilaaɔ̃ wa fɔ í ni, Aburahamu í dasi Ilaaɔ̃ naanɛ nɔ nŋui í jɔ̀ Ilaaɔ̃ í dooɛ si inɛ dee dee.

⁴ Nsɛi, inɛ iyi wa ce icɛ a ci ya doo fiai lafɛ̃ɛ bɛi amua, ti njɛ asaiyaɛi.

⁵ Amma inɛ iyi í dasi Ilaaɔ̃ naanɛ, nɔ kù dɛ nŋu ku jɛ dee dee na icɛɛ, Ilaaɔ̃ mɔ, nŋu iyi í ya ce ilu dulum ŋa inɛ dee dee, á doo lafɛ̃ɛu amanɛ dee dee na naanɛ ku dasiɛ.

⁶ Bɛɛbɛi Davidi mɔ wa fɔ idei inɔ didɔ̃i inɛ iyi Ilaaɔ̃ í doo amanɛ dee dee iyi kù jɛ na icɛɛ.

⁷ Í ni, ilu inɔ didɔ̃i inɛ iyi Ilaaɔ̃ í kpa idei kuraraɛ, nɔ í bii dulum dɛɛ.

⁸ Ilu inɔ didɔ̃i inɛ iyi Ilaaɔ̃ kù waa doo dulum dɛɛ.

⁹ Inɔ didɔ̃u, ti inɛ ŋa iyi à ce bango aŋa akãi? Kù jɛ ti inɛ ŋa mɔ iyi a kù ce bango? À tako à fɔɔ tã wo à ni, Ilaaɔ̃ í doo Aburahamu amanɛ dee dee na naanɛ iyi í dasiu.

¹⁰ Bɛirei í yɛ waati bɛɛbɛ. Í ce bango ba. Mà kù ce. Waati bɛɛbɛ kù ce bango titã. Hai lɔ bangoi wa jɛ.

¹¹ Si anyiɛ í na í ce bango iyi wa jɛ nyinda iyi Ilaaɔ̃ í coo inɛ dee dee. Í coo inɛ dee dee na naanɛ ku dasiu waati iyi kù ce bango. Bɛɛbɛ mɔi í na í jɛ balai hai ce bango ŋa iyi à dasi naanɛ fei ku ba Ilaaɔ̃ ku doo aŋa mɔ inɛ dee dee ŋa.

¹² Nɔ wa jɛ balai woo ce bango ŋa mɔ, aŋa iyi kù jɛ bango nŋu akãi à ce, amma tuubai naanɛ ku dasi iyi bala nwa Aburahamu í jɔ̀ si waati iyi kù ce bango, nŋui aŋa mɔ à waa too si.

Do naanɛ ku dasii à ya baò kuwãi Ilaaɔ̃

¹³ Ilaaɔ̃ í cea Aburahamu do dimiɛ ŋa kuwã iyi aŋai aa jɛ tubui andunyau ihɛ̃ fei. Kù jɛ si na iyi í jɔ̀ í jirima wooda, amma si na iyi í jɔ̀ í jɛ dee dee na naanɛ ku dasiɛui.

¹⁴ Bii í jɛ inɛ ŋa iyi à waa jirima wooda, aŋai aa nɛ mii ŋa iyi Ilaaɔ̃ í ce kuwãɛu, naanɛ ku dasiu ngbɛi, nɔ kuwã iyi Ilaaɔ̃ í ceu mɔ í kpa iri mbɛ,

¹⁵ domi woodai wa naaò idɔɔkɔ̃i Ilaaɔ̃ wa. Amma bii wooda kù wɛɛ, idei wooda ku kua mɔ kaa wɛɛ.

¹⁶ Na nŋu, kuwãu, ti inɛ ŋa iyi à dasi naanɛi ku ba ku jɛ amua iyi Ilaaɔ̃ í ce nwa na didɔ̃ɛ nɔ ku jɛ ti dimii Aburahamu fei. Kù jɛ inɛ ŋa iyi à nɛ wooda aŋa akã, amma do inɛ ŋa iyi à dasi naanɛ bɛi Aburahamu, nŋu iyi í jɛ balai awa fei.

¹⁷ Kukɔi idei Ilaaɔ̃ wa fɔ í ni, awɔi an ce balai inɛi ilɛ nkpɔ nkpɔ. Nŋui í jɛ bala nwa si wajui Ilaaɔ̃. Ilaaɔ̃i í dasi naanɛ, nŋu iyi í ya jĩ iku ŋa, nɔ do ide ku fɔɛi í taka mii ŋa iyi a kù wɛɛ wo.

¹⁸ Aburahamu í dasi Ilaaɔ̃ naanɛ nɔ wa cɔò kpãa baa do iyi kù yɛ mii iyi wa degbeu titã. Na nŋu, Ilaaɔ̃ í coo balai dimi nkpɔ ŋa si bɛi í tako í fɔ í ni, dimiɛ ŋa aa na a kpɔ.

¹⁹ Waati nŋu í nɛ zakai adɔ̃ cĩɔ. Í mà iyi nŋu í gbo, nɔ Sara aboɛu mɔ kaa yɔkɔ ku bí ama má, amma do nŋu fei naanɛ ku dasiɛ kù kaye.

²⁰ Kù fũsi naanɛ ku dasiɛ awɔ, kù nɔ kù sika si ide iyi Ilaaɔ̃ í wãu. Naanɛu í teese wa muaa gbugbã mɔm nii nɔ wa saabu Ilaaɔ̃,

²¹ domi í mà kãm kãm, mii iyi Ilaaɔ̃ í wãu í nɛ gbugbãi ku coo.

²² Ŋɔi í jɔ̀ na naanɛ ku dasiɛ Ilaaɔ̃ í dooɛ inɛ dee dee.

²³ Amma iyi à kɔɔ à ni, à dooɛ inɛ dee dee, kù jɛ na irii nŋu akãi à kɔɔ.

²⁴ À kɔɔi na irii awa mɔ iyi Ilaaɔ̃ wa doo wa inɛ dee dee, awa iyi à dasiɛ naanɛ, nŋu iyi í jĩ Jesu Lafɛ̃ɛ nwa hai si balɛ.

²⁵ Ilaaɔ̃i í jɔ̀ à kpa Jesu wo na irii dulum du wa nɔ í jũu má ku ba ku ce wa inɛ dee dee ŋa.