Romu 3 - Bibeli do fee

¹ Debɛi, aranfãani yoomai Zuifu ku jɛ í nɛ. Riba yoomai bango ku ce í nɛ.

² Ntɔ ntɔ aranfãaniɛ í la si mii fei. Sinte, Zuifu ŋai Ilaaɔ̃ í daa ideɛ si awɔ.

³ Bii inɛ gɔ ŋa a kù dasi naanɛ, naanɛ hai dasi nŋau á jɔ̀ Ilaaɔ̃ mɔ kú jɛ hai nɛ naanɛi?

⁴ Aawo, kù jɛ bɛɛbɛ. Baa bii inɛ fei í jɛ ilu ibo ka mà iyi Ilaaɔ̃ í jɛ ntɔ. Si bɛi kukɔi ideɛ wa fɔ na iriɛ í ni, amanɛ ŋa à nɛ a mà iyi ì jɛ dee dee si ide ku fɔɛ, nɔ ì ya ba ntɔ bii à kiitiɛ.

^5-6 Amma bii laalɔ ku ce nwa í jɔ̀ à mà iyi Ilaaɔ̃i í jɛ dee dee, bɛirei aa ka ni. Aa ka yɛ taalei Ilaaɔ̃ bii wa kpã wa iju? Aawo, kù jɛ bɛɛbɛ. Ǹ wa n fɔ dei si bɛi amanɛ ŋa à ya dɔ̃. Bii Ilaaɔ̃ kù jɛ dee dee, debɛi bɛirei á ce ku kiiti andunyau.

⁷ Bii ibom í teese í jɔ̀ inɛ ŋa à waa yɛ ntɔi Ilaaɔ̃, nɔ do yaase bɛɛbɛ Ilaaɔ̃ wa baò amboe, na mii í ce á maa yɛ taalem má bɛi ilu dulum.

⁸ Na mii í ce a kaa ka ni, ka ce laalɔ ku ba Ilaaɔ̃ ku nɛ bɛɛrɛ. Inɛ gɔ ŋa à ya ni bɛɛbɛi ǹ wa n fɔ ku ba a bɛjɛ irim. Inɛ dimiɛ ŋa aa nɔ a yɛ ijuukpãɛ si bɛi í jɔ.

Inɛ kãma kù jɛ dee dee

⁹ Debɛi, awa Zuifu ŋa mɔ à tia inɛ gɔ ŋa mɛɛ. Aawo, baa keeke, domi à nyisi tã iyi Zuifu ŋa do dimi mmu ŋa aŋa fei à wa si awɔ gbugbãi dulum.

¹⁰ Kukɔi idei Ilaaɔ̃ wa fɔ í ni, inɛ kãma kù jɛ dee dee, baa akã.

¹¹ Inɛ gɔ kù wɛɛ iyi í nɛ bisi. Inɛ gɔ kù nɔ kù wɛɛ iyi wa dɛ Ilaaɔ̃.

¹² Inɛ fei í nyɔi, inɛ fei í bɛjɛi. Inɛ kãma kù wɛɛ iyi wa ce jiida baa akã.

¹³ Idei gɛlɛ nŋa í sãmi bɛi balɛ foo. Do idei gɛlɛ nŋaui à ya takiiò inɛ ŋa. Gɛlɛ nŋau í nɛ acĩ bɛi njo.

¹⁴ À nɛ inɔ kuro nɔ ikpei wa kɔ̃ si gɛlɛ nŋa.

¹⁵ Kutɛ gbãa ku kpa inɛi à nɛ.

¹⁶ Bii à bɔ fei idei ku kpa do inɔ kufɔi à ya jɔ̀ bɛ.

¹⁷ A kù mà kpãai laakai ku sũ.

¹⁸ A kù nɛ njoi Ilaaɔ̃.

¹⁹ Amma awa à mà iyi mii iyi wooda wa fɔ fei, inɛ ŋa iyi woodau í kãi wa fãa. Wooda í wɛɛi ku ba gɛlɛ kãma ku maà nɛ iyi á fɔ, nɔ inɛ fei ku mà iyi Ilaaɔ̃ wa yɛ taaleɛ.

²⁰ Ntɔ ntɔ inɛ kãma kù wɛɛ iyi á yɔkɔ ku jirima wooda hee koo jɛò dee dee si wajui Ilaaɔ̃. Wooda í wɛɛi ku ba ku jɔ̀ amanɛ ku mà iyi nŋu í jɛ ilu dulum.

Yaase bɛi Ilaaɔ̃ í ya ce inɛ dee dee

²¹ Amma nsɛi, Ilaaɔ̃ í nyisi wa yaase bɛi nŋu í ya ce amanɛ dee dee, kù jɛ do idei wooda. Woodai Moizi do waliii Ilaaɔ̃ ŋau à jɛ sɛɛdaɛ.

²² Inɛ ŋa iyi à dasi Jesu Kirisi naanɛ fei, Ilaaɔ̃ í ce ŋa dee dee na naanɛ iyi à dasiu. Inɛ gɔ kù jɛ ikã,

²³ domi inɛ fei í ce dulum nɔ à kua amboei Ilaaɔ̃.

²⁴ Amma Ilaaɔ̃ í ce ŋa dee dee hai nɛ ngɔgɔ ku sã na didɔ̃ɛ do saabui Jesu Kirisi iyi í ya ŋa.

²⁵ Nŋui Ilaaɔ̃ í jilɛ ku jɛ kuwee. Njɛɛ iyi í nikã í kpa dulum dii inɛ ŋa iyi à dasiɛ naanɛ. Ilaaɔ̃ í ce bɛɛbɛi ku nyisiò iyi nŋu í jɛ dee dee. Tako wo si suuruɛ í temua do dulum dii amanɛ ŋa, kù kpã ŋa iju.

²⁶ Amma si dee dee ku jɛɛ wa nyisi wa si waatii nsɛiu ihɛ̃ iyi nŋu inɛ dee deei, nɔ nŋu wa ce inɛ ŋa dee dee na naanɛ iyi à dasi Jesu.

²⁷ Debɛi, à nɛ kpãa iyi aa ka tɔɔ fufu má? Aawo, kaa ce. Na mii. Si na iyi í jɔ̀ kù jɛ wooda ku jirimai à waa ka, bii kù jɛ naanɛ ku dasi.

²⁸ À nɔ à yɛ iyi amanɛ á jɛ dee deei na naanɛ iyi í dasi nŋu akã, kù jɛ na wooda ku jirima.

²⁹ Mà Ilaaɔ̃ í jɛ ti Zuifu ŋa aŋa akãi. Kù jɛ ti dimi mmu ŋa má? Ntɔ ntɔ í jɛ ti dimi mmu ŋa mɔ,

³⁰ domi Ilaaɔ̃ akãi í wɛɛ. Nŋui á ce inɛ ŋa dee dee na naanɛ ku dasi nŋa, hai Zuifu ŋa hee do dimi mmu ŋa.

³¹ Si bɛɛbɛ à waa kpa wooda na idei naanɛ ku dasiui? Aawo. À kɔ̃ɔsi gbugbãɛ mɔm nii.