Romu 2 - Bibeli do fee

Kiitii Ilaaɔ̃

¹ Na nŋu, awɔ iyi ì waa yɛ taalei inɛ ŋa, baa bii yooi ì jɛ, i kù nɛ iyi aa fɔ, domi waati iyi ì waa yɛ taalei inɛ ŋa nɔ awɔ takaɛ ì waa ce mii laalɔ ŋau bɛ, awɔ takaɛ ì waa so taalei.

² Do ntɔ, à mà iyi Ilaaɔ̃ í nɛ ntɔ bii wa yɛ taalei inɛ ŋa iyi à waa ce dimi bɛɛbɛ.

³ Debɛi, ì waa tamaa mà awɔ aa fita si kiitii Ilaaɔ̃i, awɔ iyi ì waa yɛ taalei inɛ ŋa, nɔ awɔ mɔ ì waa ce dimi bɛɛbɛ má?

⁴ Mà ì donda kulai jiida ku jɛɛ do temuaɛ do suuru ku nɛɛi. I kù mà iyi jiida ku jɛi Ilaaɔ̃ í mɔsi wa koo si gãmɛɛ ku ba i kpaasi idɔɛ?

⁵ Amma si bɛi idɔɛ í le nɔ i kù jɛsi i kpaasi, ì waa faa araɛ idɔɔkɔ̃ iyi í la í rei si ajɔ iyi Ilaaɔ̃ á kiiti inɛ ŋa dee dee nɔ inɛ fei á yɔɔ.

⁶ Ajɔ nŋu bɛ á sãa inɛ fei si bɛi kuceɛ í to.

⁷ Inɛ ŋa iyi à temua à waa ce jiida à waa dɛdɛò amboe do bɛɛrɛ, nɔ à waa dɛ aŋa a maà ce nfe, aŋai Ilaaɔ̃ á mua kuwɛɛ hai tãu.

⁸ Amma inɛ ŋa iyi à waa ce idɔɔbii ara nŋa nɔ a kù waa ceò ntɔ icɛ í gbe laalɔ, aŋai aa yɛ idɔɔkɔ̃ nlaɛ.

⁹ Inɛ iyi wa ce laalɔ fei á yɛ wahala do ijuukpã, hai Zuifu ŋa hee ku koo si dimi mmu ŋa.

¹⁰ Inɛ mɔ iyi wa ce jiida á ba amboe do bɛɛrɛ do laakai ku sũ, hai Zuifu ŋa hee ku koo si dimi mmu ŋa.

¹¹ Bɛɛbɛi Ilaaɔ̃ á ce domi bi tɛɛ inɛ gɔ kù re inɛ gɔ.

¹² Inɛ ŋa iyi à waa ce dulum hai mà wooda, si wooda hai mà nŋai aa ce nfe. Amma inɛ ŋa mɔ iyi à mà wooda nɔ à waa ce dulum, woodaui á kiiti ŋa,

¹³ domi kù jɛ inɛ ŋa iyi à waa gbɔ idei woodau aŋai à jɛ dee dee si wajui Ilaaɔ̃, í gbe inɛ ŋa iyi à waa ce iyi wa fɔ.

¹⁴ Waati iyi dimi mmu ŋa, aŋa iyi a kù mà wooda, à waa ce mii iyi wa fɔ do idɔɔbi nŋa, iyi bɛ wa nyisi iyi woodau í wa si idɔ nŋa.

¹⁵ Daa nŋa wa nyisi iyi à kɔ woodau si idɔ nŋa. Idɔ nŋa wa jɛ sɛɛdaɛ, nɔ lasabu nŋa í ya yɛ taale nŋa walakɔ ku na ŋa ntɔ.

¹⁶ Ajɔi kiitii Ilaaɔ̃ si bii Jesu Kirisi á kiiti inɛ ŋa bɛɛbɛi mii ŋau bɛ fei á ce. Á kiiti inɛ ŋa na icɛ iyi à waa ce si asii fei si bɛi laabaau jiida iyi ǹ wa n sisi nŋɛu wa fɔ.

Zuifu* ŋa do wooda*

¹⁷ Awɔ Zuifu, ì waa cɔ araɛ Zuifu, ì waa naanɛ woodai Ilaaɔ̃, ì waa tɔɔ fufu ì ni awɔ ì jɛ inɛi Ilaaɔ̃.

¹⁸ Ì mà mii iyi Ilaaɔ̃ í bi i ce, nɔ wooda í kɔɛ si i ce mii iyi í sĩa.

¹⁹ Ì waa tamaa iyi aa yɔkɔ i cuaa fɛɛju ŋa nɔ i jɛ inya kumái inɛi ilu kuku ŋa.

²⁰ Ì waa tamaa mà aa yɔkɔ i mua nnyɛi ŋa bisi, nɔ i kɔ hai mà ŋa si cio, domi ì mà iyi icui kumà do ntɔu si woodai í wa.

²¹ To, awɔ iyi ì waa kɔ inɛ gɔ ŋa si cio, na mii í ce i kaa kɔ araɛ. Awɔ iyi ì waa sɔ̃ inɛ ŋa a maà ce ile, na mii ì waa ce ile.

²² Awɔ iyi ì ni inɛ ŋa a maà ce sakara, na mii í ce ì waa coo. Awɔ iyi ì cé iwɛ̃, na mii í ce ì waa bɔ ilè ile bɛ.

²³ Awɔ iyi ì waa tɔɔ fufu si na iyi í jɔ̀ ì mà wooda, na mii í ce i kù waa jirimaɛ ì jɔ̀ irii Ilaaɔ̃ wa bɛjɛ.

²⁴ Na irii iŋɛ Zuifu ŋai dimi mmu ŋa à ba à waa fɔò taalei Ilaaɔ̃, si bɛi kukɔi ideɛ wa fɔ.

²⁵ Awɔ Zuifu, bii ì waa too wooda, bangoɛ í nɛ aranfãani jiida, amma bii i kù waa jirima woodau, bangoɛ í jɛ ngbɛ.

²⁶ Na nŋu, dimi mmu iyi a kù dasiɛ bango nɔ wa too woodau, Ilaaɔ̃ kaa cɔɔ bɛi inɛ iyi à dasiɛ bango?

²⁷ Dimi mmu iyi wa too woodau, baa bii a kù dasiɛ bangou á yɛ taalei iŋɛ Zuifu ŋau, domi baa do iyi ì ce bango nɔ ì mà wooda iyi à kɔ nŋɛ i kù waa jirimaɛ ŋa.

²⁸ Inɛ iyi í jɛ Zuifu do ntɔ kù jɛ inɛ iyi í jɛ Zuifu si kuyɛi amanɛ ŋa. Iyi í nɔ í jɛ bangou ntɔ ntɔ kù jɛ iyi à ya ce si ara.

²⁹ Amma inɛ iyi í jɛ Zuifu ntɔ ntɔ, nŋui í jɛ Zuifu si idɔɛ. Iyi í nɔ í jɛ bango do ntɔ nŋui í jɛ bangoi idɔ. Icɛi Hundei Ilaaɔ̃i, kù jɛ ti wooda. Zuifu dimi bɛɛbɛ, Ilaaɔ̃i á saabuɛ, kù jɛ amanɛ ŋa.