Romu 16 - Bibeli do fee

Pɔlu wa ce inɛ ŋa fɔɔ

¹ Ǹ wa n sɔ̃ ŋɛ iyi Feebe wecĩ nwa si kpãai naanɛ ku dasi í jɛ ilu naanɛ. Woo ce icɛi inɛi igbɛi Jesu ŋai wa jɛ si ilui Sankeree.

² I gba abou na iri Lafɛ̃ɛ si bɛi í jɔ woo dasi Jesu naanɛ ŋa a ce. Nɔ i maa sobiɛ ŋa do bukaatai mii iyi í bi si aninii iŋɛ fei, domi nŋu takaɛ í sobi inɛ nkpɔ, do amu takam.

³ I ce Piisila do mɔkɔɛ Akilasi fɔɔ, kpaasi woo ce icɛm ŋa si icɛi Jesu Kirisi,

⁴ aŋa iyi a kù saalu baa kuwɛɛ nŋa ku ba a faaba ti amu. Kù jɛ amu akãi ǹ wa n saabu ŋa, hee do igbɛi inɛi Jesu ŋa iyi à jɛ dimi mmu ŋau fei à waa saabu ŋa.

⁵ Nɔ i ce inɛi igbɛi Jesu ŋa iyi à ya tɔtɔɔ kpasɛ̃ nŋau fɔɔ. Nɔ i ceem Epanɛti kpaasi jiidam nɔu fɔɔ, nŋu iyi í tako í dasi Kirisi naanɛ si ilɛi Azii.

⁶ Nɔ i ce Maari fɔɔ, nŋu iyi í ce icɛ ntɔ ntɔ na iri nŋɛ.

⁷ Nɔ i ce Andoniku do Zunia dimim ŋau fɔɔ, awaò ŋai à ce piisɔ̃ɔ ajɔ. À nɛ bɛɛrɛ nla nla si inɔi woo bɛ ŋau. À tako à dasi Kirisi naanɛ mɔm amu ǹ bɛi ǹ dasiɛ naanɛ.

⁸ Nɔ i ce Ampilatu fɔɔ, nŋu iyi í jɛ kpaasi jiidam si kpãai Lafɛ̃ɛ.

⁹ I ce Uubɛ̃ɛ fɔɔ, kpaasi woo ce icɛ nwa si icɛi Kirisi, do Sitaki kpaasi jiidam.

¹⁰ I ce Apelɛsi fɔɔ, nŋu iyi í nyisi naanɛ ku dasiɛ ntɔ ntɔ si laakai ku cɔ. I ce inɛi kpasɛ̃i Arisitobu ŋa fɔɔ.

¹¹ I ce Herodiɔ̃ɔ dimim nɔu fɔɔ. I ce inɛi kpasɛ̃i Naasisi ŋa iyi à dasi Lafɛ̃ɛ naanɛ fɔɔ.

¹² I ce Tiifɛni do Tiifozi fɔɔ, inaabo ŋa iyi à waa cea Lafɛ̃ɛ icɛu. Nɔ i ceem Pɛɛsidi inaabo baakɔɔm nɔu mɔ fɔɔ, nŋu mɔ í cea Lafɛ̃ɛ icɛ ntɔ ntɔ.

¹³ I ce Rufusi fɔɔ, nŋu iyi wa cea Lafɛ̃ɛ icɛ jiida, do iyeɛ iyi wa jɛ bɛi iyei amu mɔ si kpãai naanɛ ku dasi.

¹⁴ I ce Asɛnkiti fɔɔ, do Filegoni, do Herimɛsi, do Patobasi, do Herimasi, do kpaasi ŋa iyi aŋaò ŋa à wɛɛ.

¹⁵ I ce Filɔlɔgu fɔɔ, do Zuli, do Neree, nŋu do wecĩɛ, do Olɛmpasi, do woo dasi Jesu naanɛ ŋa iyi aŋaò ŋa à wɛɛ fei.

¹⁶ I ya ce njɛ fɔɔ do kubi jiida ŋa. Igbɛi inɛi Kirisi ŋa fei à waa ce ŋɛ fɔɔ.

Ide ku fɔi ankãanyi

¹⁷ Ǹ wa n sɔ̃ ŋɛi, iŋɛ inɛm ŋa, i ya ce laakaii inɛ ŋa iyi à ya naaò njɛ ku fɛɛfɛ wa si anini nŋɛ, nɔ a jɔ̀ inɛ gɔ ŋa a koosɛ si naanɛ ku dasi nŋa a cuku. Aŋai à ya maa nya cɔɔi cio iyi ì gbɔ ŋa. I jɔ̀ i jĩò inɛ dimi bɛɛbɛ ŋa

¹⁸ domi inɛ dimi bɛɛbɛ ŋa a kù waa cea Kirisi Lafɛ̃ɛ nwa icɛ, í gbe inɔi aŋa taka nŋa. Do ide didɔ̃ do idei inɛ ku lɛlɛ nŋa ŋaui à ya wa inyii itĩi inɛ ŋa iyi a ci ya ce laakai.

¹⁹ Iyi í jɛ ti iŋɛ mɔ, inɛ fei í mà bɛi ì waa jirima Lafɛ̃ɛ ŋa. Na nŋu, ǹ wɛɛò inɔ didɔ̃ na iri nŋɛ. Amma ǹ bi í nɛ bisi ŋai ku ba i mà bɛi aa ya ce jiida ŋa, nɔ i jɛ inɛ ŋa iyi laalɔ ku ce í jɛ iwɔ̀ nŋa.

²⁰ Kaa kpɛ má, Ilaaɔ̃ nŋu iyi wa mu nwa laakai ku sũ, á jɔ̀ i tɛɛsɛ Seetam ŋa. Didɔ̃i Lafɛ̃ɛ nwa Jesu ku wɛɛ do iŋɛ.

²¹ Timɔtee kpaasi woo ce icɛm wa ce ŋɛ fɔɔ, do Lusiusi, do Zasɔ̃ɔ do Sosipatɛɛ dimim ŋa.

²² Nɔ amu Tɛtiusi, amu iyi Pɔlu í sɔ̃m ide ŋau ihɛ̃ nɔ ǹ kɔɔ, ǹ wa n ce ŋɛ fɔɔ do irii Lafɛ̃ɛ.

²³ Gayusi, ilu idem wa ce ŋɛ fɔɔ, nŋu iyi bi tɛɛi inɛi igbɛi Jesu ŋa fei à ya tɔtɔɔ. Erasitu, woo singa fiai iluu do inɛ nwa Kaatusi à waa ce ŋɛ fɔɔ. [

²⁴ Didɔ̃i Lafɛ̃ɛ nwa Jesu Kirisi ku wɛɛ do iŋɛ fei. Ami.]

Saabui ankãanyi

²⁵ Ka saabu Ilaaɔ̃, nŋu iyi á yɔkɔ ku mu nŋɛ gbugbã na saabui laabaau jiida do idei Jesu Kirisi iyi ǹ wa n ce waazoɛu. Ideui wa nyisi wa asii iyi wa singa wo hai ku kpɛ.

²⁶ Amma nsɛi í fita gbugbãa. Ide ŋa iyi walii ŋau à kɔ si tia nŋa ŋa í jɔ̀ dimi fei í mà asiiu. Nɔ Ilaaɔ̃ nŋu iyi í wɛɛ hee do ajɔ feii í jilɔɔ bɛɛbɛ ku ba dimi fei ku jirimaɛ si naanɛ ku dasi.

²⁷ Na nŋu, Ilaaɔ̃ nŋu akã iyi í jɛ ilu bisi ntɔ ntɔ, amboe ku jɛ tɛɛ hee do ajɔ fei do saabui Jesu Kirisi. Ami.