Romu 15 - Bibeli do fee

Ce iyi à dɔ̃a kpaasiɛ si, maà dɛ ti awɔ takaɛ

¹ Nsɛi, awa iyi à nɛ gbugbã si naanɛ ku dasi, i jɔ̀ ka temuaò gbugbã ku kuai hai nɛ gbugbã ŋa, nɔ ka maà ya ka ce mii iyi á dɔ̃a awa taka nwa si.

² Awa fei ka ya ce mii iyi á dɔ̃a kpaasi nwa ŋa si na aranfãani nŋa, ku ba naanɛ ku dasi nŋa ku bɔ waju.

³ Kirisi takaɛ ci ya ce mii iyi á dɔ̃a nŋu takaɛ si, amma si bɛi à kɔɔ si idei Ilaaɔ̃ à ni, í sɔ̃ Ilaaɔ̃ í ni, inɛ ŋa iyi à buɛ, arabu nŋa í baa sim.

⁴ Mii iyi à kɔ tako fei wo, à kɔɔi ku ba ku kɔ wa nɔ ka nɛ kpãa ku cɔ hai si kukɔi idei Ilaaɔ̃, iyi wa mu nwa gbugbã do temua.

⁵ Ilaaɔ̃, nŋu iyi wa mu nwa temua do gbugbã, kú jɔ̀ iŋɛ duusɔ̃ɔ i nɛ anu akã ŋa si bɛi ì yɔɔ si Jesu Kirisi ŋa,

⁶ ku ba iŋɛ fei i ya maa saabu Ilaaɔ̃ ajɔ do anu akã ŋa, nŋu iyi í jɛ baai Lafɛ̃ɛ nwa Jesu Kirisi.

Laabaau jiidau í jɛ ti dimi fei

⁷ Na nŋu, i ya gba njɛ ŋa si bɛi Kirisi mɔ í gba ŋɛ ku ba i nyisiò amboei Ilaaɔ̃ ŋa.

⁸ Ǹ wa n sɔ̃ ŋɛi iyi Kirisi nŋui í baa í jɛ woo ce icɛi Zuifu ŋau ku ba ide iyi à wãò bala nŋa ŋau ku kɔ̃, nɔ ku nyisiò iyi Ilaaɔ̃i í jɛ ilu ntɔ.

⁹ Jesu í naai má ku ba dimi mmu ŋa mɔ a saabu Ilaaɔ̃ na araareɛ si bɛi kukɔi idei Ilaaɔ̃ wa fɔ í ni, na ŋɔi í jɔ̀ an maa n cĩɛ bi dimi mmu ŋa. An maa n kɔ̃ irii do iriɛ.

¹⁰ Nɔ í ni má, iŋɛ dimi mmu ŋa i wɛɛò inɔ didɔ̃ do inɛi Ilaaɔ̃ ŋa ajɔ.

¹¹ Nɔ í ni má, i saabu Aɔ̃ Lafɛ̃ɛ ŋa, iŋɛ dimi mmu ŋau fei, iŋɛ inɛi andunya fei i cũu ŋa.

¹² Nɔ walii Ezai mɔ í ni, tɔkui Izai gɔ á na ku dede ku jɛ ilaalui dimi fei, nɔ kpãa ku cɔi dimi ŋau á wa siɛ.

¹³ Nsɛi, Ilaaɔ̃ nŋu iyi wa mu nwa kpãa ku cɔ ku mu nŋɛ inɔ didɔ̃ do laakai ku sũ fei na naanɛ iyi ì dasi ŋa ku ba kpãa ku cɔ nŋɛ ku la si gbugbã iyi Hundei Ilaaɔ̃ í mu nŋɛ.

Pɔlu í nɛ kpãai ku kɔ tia do wɔɔkɔ

¹⁴ Iŋɛ inɛm ŋa, amu takam ǹ mà kãm kãm iyi ì jɛ inɛ jiida ŋa nɔ ì mà mii iyi ì nɛ ku ce ŋa, aa nɔ i yɔkɔ i mua njɛ bisi ŋa.

¹⁵ Do nŋu fei, do wɔɔkɔ nla nlai ǹ kɔ nŋɛ ide gɔ ŋa wa si idei tiau ihɛ̃, n ye ŋɛò gigii mii ŋa iyi ì mà tã ŋa. Ǹ kɔ nŋɛ wa bɛɛbɛi na didɔ̃ iyi Ilaaɔ̃ í ceem

¹⁶ ǹ wa n jɛò woo ce icɛi Jesu Kirisi bi hai jɛ Zuifu ŋa. Ǹ wa n waazo laabaau jiidai Ilaaɔ̃ bɛi woo wee ku ba hai jɛ Zuifu ŋa a yɛ bɛi kuwee iyi á dɔ̃a Ilaaɔ̃ si, si na iyi í jɔ̀ Hundeɛ í cica ŋa í jɔ̀ à má.

¹⁷ Na nŋu, na saabui Jesu Kirisi, ǹ nɛ inɔ didɔ̃ si icɛm iyi ǹ wa n cea Ilaaɔ̃.

¹⁸ N kaa n yɔkɔ n fɔ ide gɔ bii kù jɛ idei icɛ iyi Kirisi í ce si ide ku fɔm do si kookoosum ŋa ku ba hai jɛ Zuifu ŋa a jirima Ilaaɔ̃

¹⁹ na saabui maamaake dimi ikã ikã ŋa iyi gbugbãi Hundei Ilaaɔ̃ í ce. Bɛɛbɛ mɔi ǹ waazo laabaau jiidai Kirisi bii fei sãa sãa hai Zeruzalɛmu hee ku bɔ ikpa ilɛi Iliri.

²⁰ Nɔ ǹ dasi idɔ n waazo laabaau jiidau si ilɛ ŋa bii a kù gbɔ idei Kirisi titã, ku ba n maà n ma si icui ilei inɛ gɔ.

²¹ Ǹ ce bɛɛbɛi ku ba n ce bɛi kukɔi idei Ilaaɔ̃ í fɔ, tengi bii í ni, inɛ ŋa iyi a kù fɔ ideɛ bi tu ŋa ajɔ kãma, aa yɔɔ. Inɛ ŋa mɔ iyi a kù gbɔ baauɛ wo, aa gbɔ yaaseɛ.

Pɔlu wa fɔ idei Romu ku bɔ

²² Tuuba nkpɔ nkpɔ isɛɛnɛ ŋau bɛi í ya maa ganjim n naa bi tu ŋɛ.

²³ Amma nsɛi, ǹ kpa irii icɛm si ilɛ ŋau bɛ, nɔ si na iyi í jɔ̀ ǹ wa n bi n naa bi tu ŋɛ hai adɔ̃ nkpɔ nkpɔ,

²⁴ ǹ wa n tamaa bii ǹ wa n bɔ ikpa ilɛi Ɛsipanyi, an yaa wa bi tu ŋɛ. Ǹ bi n yɛ ŋɛ n ce ajɔ minji bi tu ŋɛ bɛ ka kpɛ̃ inɔ didɔ̃, nɔ i sobim ŋa ku ba n bɔ Ɛsipanyiu.

²⁵ Amma nsɛi titã Zeruzalɛmui ǹ wa n bɔ n koo n sobi woo dasi Jesu naanɛ ŋa,

²⁶ domi woo dasi Jesu naanɛ ŋa iyi à wa ilɛi Masedɔni do ilɛi Gɛrɛsi à tɔtɔɔ fia do inɔ akã na ilu are ŋa iyi à wa si inɔi woo dasi Jesu naanɛ ŋau Zeruzalɛmu bɛ.

²⁷ Do kubii à tɔtɔɔò fiau, amma ntɔ ntɔ gbesei à waa mu si na iyi í jɔ̀ amanii Ilaaɔ̃ iyi Zuifu ŋau à nɛ à kpɔ̃ɔ do dimi mmu ŋa. Bɛɛbɛ mɔi á sĩa dimi mmu ŋau mɔ a sobi ŋa do amanii andunya nŋa.

²⁸ Waati iyi an to Zeruzalɛmu n na ŋa fia iyi à tɔtɔɔu n kpaò irii icɛu bɛ, an bɔ Ɛsipanyi nɔ n yaa wa n naa n yɛ ŋɛ.

²⁹ Ǹ mà iyi kutom wa bi tu ŋɛ bɛ á jɔ̀ Kirisi ku wee nŋɛ si mii nkpɔ nkpɔ.

³⁰ Iŋɛ inɛm ŋa, ǹ wa n tɔɔ ŋɛi do irii Lafɛ̃ɛ nwa Jesu Kirisi do kubi iyi Hundei Ilaaɔ̃ wa mu nwa, i bam ku jabu si kutɔɔ nŋɛ ŋa.

³¹ I tɔɔ Ilaaɔ̃ ku nyam hai si awɔi hai dasi Jesu naanɛ ŋa iyi à wa ilɛi Zudee, nɔ i ce kutɔɔ má ŋa ku ba woo dasi Jesu naanɛ ŋau a gba amua iyi ǹ wa n bɔò Zeruzalɛmu do awɔ minji.

³² Bɛɛbɛ mɔi an to wa bi tu ŋɛ do inɔ didɔ̃ bii Ilaaɔ̃ í bi, nɔ n sĩmi keeke bi tu ŋɛ.

³³ Ilaaɔ̃, nŋu iyi wa mu nwa laakai ku sũ, ku wɛɛ do iŋɛ fei. Ami.