Romu 14 - Bibeli do fee

Maà yɛ taalei kpaasi woo dasi Jesu naanɛ

¹ I gba inɛ iyi naanɛ ku dasiɛ kù nɛ gbugbã, nɔ i maà ya yɛ taalei ide iyi wa lasabu.

² Inɛ ihɛ̃ wa tamaa si iyi nŋu á yɔkɔ ku jɛ ijɛ fei. Inɛ ihɔ̃ mɔ iyi kù nɛ gbugbã si naanɛ ku dasiɛu, ci ya ŋɔ iŋa.

³ Inɛ iyi wa jɛ mii iyi í ba fei ku maà donda inɛ iyi ci ya jɛ mii fei, nɔ inɛ mɔ iyi ci ya jɛ mii iyi í ba fei, ku maà yɛ taalei inɛ njɛ iyi wa jɛ mii fei, domi Ilaaɔ̃i í gba lafɛ̃ɛ.

⁴ Bɛirei awɔ ì yɛ ì bɛi ì waa kiitiò amaacɛi inɛ mmu gɔ. Bii wa leekĩ si icɛɛ walakɔ bii í nɔ í fũsi awɔ mɔi idei irii lafɛ̃ɛɛi. Amma á maa leekĩi domi Aɔ̃ Lafɛ̃ɛ í nɛ gbugbã ku muaa gbugbã.

⁵ Inɛ gɔ ŋa à ya tamaa bɛi ajɔ gɔ ŋa à re njɛ do bɛɛrɛi, nɔ inɛ gɔ ŋa mɔ à ya maa tamaa mà iju iyi í má fei akãi. Si ide ŋau ihɛ̃ í sĩa inɛ fei ku mu iyi í jɛ lasabui idɔɛ dim dim.

⁶ Inɛ iyi wa tamaa ajɔ gɔ ŋa à re njɛ do bɛɛrɛ, wa cooi na Lafɛ̃ɛ. Inɛ iyi wa jɛ ijɛ iyi í ba fei, na irii Lafɛ̃ɛi wa jɔɔ, domi í ya saabu Ilaaɔ̃i titã na ijɛu. Inɛ mɔ iyi kù waa jɛ mii fei, na irii Lafɛ̃ɛi kù waa jɛ, í nɔ wa saabuɛ.

⁷ Kuwɛɛi inɛ kãma nwa kù jɛ ti nŋu akã, bɛɛbɛ mɔi do ikuɛ.

⁸ Ntɔ ntɔ, bii à wɛɛ, à wɛɛi na irii Lafɛ̃ɛ, bii à nɔ à ku mɔi, na irii Lafɛ̃ɛi à ku. Na nŋu, bii à waa wɛɛ walakɔ bii à ku, ti Lafɛ̃ɛi à jɛ,

⁹ domi Kirisi í ku nɔ í dede hai si balɛ má ku ba ku jɛ Lafɛ̃ɛi inɛ ŋa iyi à ku do inɛ ŋa iyi à wɛɛ.

¹⁰ To, bii bɛɛbɛi, na mii í ce awɔ ì waa yɛ taalei kpaasiɛ. Mà na mii í ce ì waa donda kpaasiɛ. Awa feii aa ka leekĩ ajɔ akã si wajui Ilaaɔ̃ ku kiiti nwa.

¹¹ Ajɔ nŋui kukɔi idei Ilaaɔ̃u ihɛ̃ á kɔ̃ tengi bii í ni, Aɔ̃ Lafɛ̃ɛ í ni, ǹ gbasi do kuwɛɛm fei, inɛ fei á na ku gulɛ si wajum. Nɔ inɛ fei ku saabum do gɛlɛɛ.

¹² Do yaase bɛɛbɛ, awa fei aa ka fɔ mii iyi à ce fei si wajui Ilaaɔ̃.

Maà ce ngɔgɔ iyi à dasi kpaasiɛ dulum

¹³ Na nŋu, i maà ya kiiti njɛ ŋa. Amma inɛ fei ku ce laakai ku maà ti ku ce ngɔgɔ iyi á jɔ̀ kpaasiɛ ku rara ku dasi dulum.

¹⁴ Na saabui Lafɛ̃ɛ Jesu ǹ mà kãm kãm iyi sɔnda kãma kù jɛ iwɔ̀. Amma bii inɛ gɔ wa doo sɔnda gɔ iwɔ̀, bi tɛɛi í jɛ iwɔ̀.

¹⁵ Bii inɔi kpaasiɛ í fɔ na ijɛ gɔ iyi ì waa jɛ, wa nyisi iyi i kù waa nɛ si kpãai kubi má. Maà jɔ̀ idei ijɛ ku jɔ̀ inɛ gɔ iyi Kirisi í ku na iriɛ ku ce nfe.

¹⁶ Iyi ì yɛ í sĩaɛ ku ce, maà ti i coo do yaase bɛi á jɔ̀ inɛ ŋa a fɔ laalɔɛ.

¹⁷ Bommai Ilaaɔ̃ kù jɛ idei kujɛ do kumɔ, bii kù jɛ dee dee ku jɛ do laakai ku sũ do inɔ didɔ̃ iyi Hundei Ilaaɔ̃ wa mu nwa.

¹⁸ Inɛ iyi wa cea Kirisi icɛ si yaase bɛɛbɛ, lafɛ̃ɛi Ilaaɔ̃ á bi, nɔ baa amanɛ ŋa aa saabuɛ.

¹⁹ Na nŋu, ka dɛ mii iyi á naaò laakai ku sũ wa do mii iyi á mu nwa gbugbã si naanɛ ku dasi nwa.

²⁰ I maà bɛjɛ icɛi Ilaaɔ̃ na idei ijɛ. Ntɔi, sɔnda kãma kù jɛ iwɔ̀, amma kù sĩa inɛ gɔ ku jɛ ijɛ iyi á jɔ̀ kpaasiɛ ku koosɛ.

²¹ Iyi í sĩa nŋui í jɛ i maà ŋɔ iŋa, nɔ i maà mɔ vɛ̃ɛ, nɔ i maà ce ngɔgɔ bii í jɛ á dasi kpaasiɛ kurara.

²² Mii iyi ì waa lasabu si ideu ihɛ̃, muu si idɔɛ, nɔ kú jɛ si gãmɛi awɔ do Ilaaɔ̃ nŋu akã. Ilu inɔ didɔ̃i inɛ iyi idɔɛ kù waa yɛ taaleɛ si mii iyi wa ce.

²³ Amma inɛ iyi wa sika si ijɛ gɔ iyi wa jɛ, Ilaaɔ̃ á yɛ taaleɛ domi kù waa coo do naanɛ. Ntɔ ntɔ, mii iyi inɛ wa ce fei nɔ kù waa coo do naanɛ, dulum nii.