Romu 13 - Bibeli do fee

Ka jirima inɛ ngboi ilɛ nwa ŋa

¹ Inɛ fei ku jirima inɛ ngboi ilɛɛ, domi inɛ ngbo kãma kù wɛɛ iyi kù jɛ do kumàsii Ilaaɔ̃. Inɛ ngbo ŋa iyi à wɛɛ fei Ilaaɔ̃i í jilɛ ŋa.

² Na nŋu, bii inɛ í donda idei inɛ ngbo, ide iyi Ilaaɔ̃ í jilɛi í kɔ̀si. Nɔ inɛ ŋa iyi à waa kɔ̀ ide dimi bɛɛbɛ, à waa dɛdɛa ara nŋa taalei.

³ Ntɔ ntɔ, woo ce jiida ŋa a kù nɛ zigiida do inɛ ŋa iyi à waa mu ilɛu, í gbe woo ce laalɔ ŋa. Bii i kù bi njo ku muɛ si gãmɛi inɛ ngbo ŋau, ce jiidaɛ, aa nɛ siɛ inɔ didɔ̃.

⁴ Inɛ ngbo ŋa à waa ce icɛi Ilaaɔ̃i na aranfãani nŋɛ. Amma bii ì waa ce laalɔɛ ŋa, i ce njo nŋa, domi a kù waa mu taakuba si ngbɛ. Aŋa mɔ woo ce icɛi Ilaaɔ̃ ŋai ku ba a sã gbesei idɔɔkɔ̃i Ilaaɔ̃ nɔ a kpã inɛ ŋa iyi à waa ce laalɔ iju.

⁵ Na nŋu, ì nɛ i sũ nŋa iri ilɛ ŋai, nɔ kù jɛ si na iyi í jɔ̀ ì waa ce njoi ijuukpã nŋu akã ŋa, amma ku ba idɔ nŋɛ ku maà yɛ taale nŋɛi.

⁶ Nŋui í nɔ í jɔ̀ ì waa sã fiai lɛmpoo má ŋa, domi inɛ ŋa iyi à waa mu ilɛu, woo ce icɛi Ilaaɔ̃ ŋai nɔ à na ara nŋai mam mam.

⁷ I sãa inɛ fei iyi ì nɛ i sã ŋa. Inɛ ŋa iyi ì nɛ i sãa lɛmpoo i sã nŋa ŋa. Inɛ iyi ì nɛ i sãa fiai duani i sãa lafɛ̃ɛ. Inɛ iyi ì nɛ i jirima fei i jirima lafɛ̃ɛ ŋa. Inɛ iyi ì nɛ i mà bɛɛrɛɛ, i màa ŋa.

Ka bi njɛ

⁸ I maà ya mu gbesei inɛ gɔ. Gbesei mii akãi í nɛ ku wa si anini nwa, nŋui í jɛ kubi, domi inɛ iyi í bi inɛ ŋa wa kɔ̃ wooda feii.

⁹ Ntɔ ntɔ, wooda ŋau ihɛ̃ à ni, i maà ce sakara, nɔ i maà kpa inɛ, nɔ i maà ce ile, nɔ i maà ce binɛ, do wooda ikã ikã iyi í gbe fei aa yɔkɔ a tɔtɔɔ ŋa si wooda akã. Wooda akãu wee. Bi inɛ mmu bɛi ì bi araɛ.

¹⁰ Bii kubi í wa si gãmɛ nŋɛ i kaa yɔkɔ i cea njɛ laalɔ ŋa. Na nŋu, bii ì bi njɛ ì waa jirima wooda ŋau fei ŋai.

Ka tã sɔɔlu ka maa degbeò kunyii Kirisi* wa

¹¹ Í sĩa i ce bɛɛbɛ ŋa, domi ì mà ŋa si waati bii à wa nsɛi. Í to i jĩ hai si iri njoo ŋa, domi waati iyi Lafɛ̃ɛ á faaba wa mam mam í maai wa nsɛi í re waati iyi à dasi naanɛ sinte.

¹² Waati iyi à wa si nsɛi í yɛi bɛi idũ í dũ wa koo, nɔ amɛɛjuumá í maai wa. Na nŋu, ka jɔ̀ icɛi ilu kuku ku ce, nɔ ka so jĩnɛi igũ iyi á jɔ̀ ka jabu si inya kumá.

¹³ I jɔ̀ ka nɛ dee dee awa iyi à jɛ inɛi inya kumá ŋa. Ka maà jɔ̀ ijɛ ku bi nwa do atɛ̃ ku mɔ nwa ku la ku caa, ka maà nɛ adɛi abo do daa bɛɛtɛkɛ ku ce, nɔ ka jɔ̀ ija do igu.

¹⁴ Amma i so daa titɔ̃i Jesu Kirisi Lafɛ̃ɛ nwa, nɔ i maà jɔ̀ daai iŋɛ taka nŋɛ ku maa nɛò ŋɛ i maa ceò binɛ má ŋa.