Romu 12 - Bibeli do fee

Kuwɛɛ titɔ̃ iyi í wɛɛ na irii Ilaaɔ̃

¹ Na nŋu iŋɛ inɛm ŋa, ǹ wa n tɔɔ ŋɛi na saabui araare iyi Ilaaɔ̃ í ce nŋɛ, i na Ilaaɔ̃ ara nŋɛ. I jɔ̀ kuwɛɛ nŋɛ ku jɛaa bɛi kuwee gɔ iyi í má nɔ í sĩaa si. Do yaase bɛɛbɛi í sĩa i ya tɔɔ Ilaaɔ̃ ŋa.

² I maà ya ce kucei inɛi andunya ŋa, amma i jɔ̀ Ilaaɔ̃ ku mu nŋɛ lasabu titɔ̃ iyi á kpaasiò kuwɛɛ nŋɛ, ku ba i mà iyi í jɛ idɔɔbii Ilaaɔ̃ ŋa. Idɔɔbiɛu wee. Iyi í jɛ jiida, iyi í dɔ̃ do iyi í kɔ̃ mam mam.

³ Na didɔ̃ iyi Ilaaɔ̃ í muum, ǹ wa n sɔ̃ iŋɛ fei, i maà jilɛ ara nŋɛ tengi bii i kù to ŋa, amma inɛ fei ku jilɛ araɛ si zaka bɛi Ilaaɔ̃ í muaa naanɛ.

⁴ Si ara akã ikɔ̃ ikã ikãi í wa si nɔ aŋa fei do icɛ nŋai.

⁵ Bɛɛbɛ mɔi, baa bii awa à kpɔ à jɛ ara akã si Kirisi nɔ à dĩ si njɛi bɛi ikɔ̃ ikã ikãi arau.

⁶ Bɛɛbɛ mɔi à nɛ amua ikã ikã iyi Ilaaɔ̃ í ce nwa si didɔ̃ɛ. Inɛ iyi í nɛ amuai ide iyi wa naa hai bi Ilaaɔ̃ ku sɔ̃ inɛ ŋa, ku ceò icɛ si bɛi naanɛ ku dasiɛ í to.

⁷ Inɛ iyi í nɛ amuai ku cea inɛ ŋa icɛ si igbɛu, ku coo. Inɛ iyi í nɛ amuai inɛ ŋa ku kɔ si idei Ilaaɔ̃ ku kɔ ŋa si.

⁸ Inɛ mɔ iyi í nɛ amuai inɛ ŋa ku mua gbugbã ku coo. Inɛ mɔ iyi í ya yɔkɔ ku ce amua ku coo do inɔ akã. Inɛ ngbo ku ce icɛɛ do himma. Inɛ iyi í nɛ amuai ilu are ŋa ku sobi ku coo do inɔ didɔ̃.

⁹ I maà jɔ̀ kubi nŋɛ ku jɛ do muafiti. I saa laalɔ nɔ i leekĩ si jiida ku ce dim dim ŋa.

¹⁰ I bi njɛ ŋa, i ce kookaai i ya màò bɛɛrɛi njɛ ŋa.

¹¹ I maà jɔ̀ i jɛ ilu ika ŋa, amma i ya maa cea Lafɛ̃ɛ icɛ ŋa do himma.

¹² I wɛɛò inɔ didɔ̃ ŋa na kpãa ku cɔu. I temua si wahala ŋa. I maà ya gbɛɛji do kutɔɔ ŋa.

¹³ I ya sobi inɛ ŋa iyi à jɛ ti Ilaaɔ̃ si bukaatai mii iyi à bi. Nɔ i ya yaaɛ inɛ njoo ŋa.

¹⁴ I ya weea inɛ ŋa iyi à waa kpã ŋɛ iju. I wee nŋa ŋa, i maà ceekpe ŋa.

¹⁵ Inɛ ŋa iyi à wa si inɔ didɔ̃ i ba ŋa inɔ didɔ̃ ku kpɛ̃, inɛ ŋa mɔ iyi à waa kpata i ba ŋa ku kpata ŋa.

¹⁶ I ya nɛ anu akã ŋa, i maà jɔ̀ lasabui ara ku so ku wa si ŋɛ, amma i ya kaye ara nŋɛ ŋa. I maà ya jilɛ ara nŋɛ ilu bisi ŋa.

¹⁷ I maà ya sãa inɛ gɔ laalɔ ŋa. I ya maa dɛ i ce iyi í jɛ jiida si gãmɛi inɛ fei ŋa.

¹⁸ Bii í jɛ á ce i ce kookaai baa yooma fei i jɔ̀ iŋɛò inɛ fei i ya dɔ̃ ŋa.

¹⁹ Iŋɛ kpaasim ŋa i maà ya dɛ i sãa njɛ gbesei laalɔ ŋa, amma i ya jɔ̀ Ilaaɔ̃ ku sã nŋɛ gbesei idɔɔkɔ̃, domi à kɔɔ à ni, Aɔ̃ Lafɛ̃ɛ í ni, amui an sã gbesei idɔɔkɔ̃.

²⁰ Nɔ à kɔɔ má à ni, bii ari wa kpa mbɛɛɛ, náa ijɛ ku jɛ. Bii agbɛ wa kpaa, muaa inyi ku mɔ, domi bii ì waa ceaa bɛɛbɛ, í yɛ bɛi ina nyɛnyɛi ì waa koaa si iri.

²¹ Maà jɔ̀ laalɔ ku kãmiaɛ, amma jɔ̀ i kãmiaɛ do jiida ku ceɛ.