Romu 11 - Bibeli do fee

Ilaaɔ̃ kù kɔ̀si inɛi Izirɛli* ŋa

¹ Debɛi ǹ wa n beei, Ilaaɔ̃ í kɔ̀si inɛɛ ŋai? Aawo, kù jɛ bɛɛbɛ, domi amu takam inɛi Izirɛlii ǹ wa n jɛ, ǹ jɛ tɔkui Aburahamu si dimii Bɛnzamɛɛ.

² Ilaaɔ̃ kù kɔ̀si inɛɛ ŋa iyi í tako í cica hai ku kpɛu. Mà i kù mà ŋa bɛi kukɔi idei Ilaaɔ̃ í fɔ ŋa si waati iyi Elii í bɔò taalei inɛi Izirɛli ŋa bi Ilaaɔ̃ í ni,

³ Lafɛ̃ɛ, inɛ ŋau à kpa waliiɛ ŋa nɔ à kɛkɛ bi kuweeɛ ŋa. Amu akãi ǹ gbe iyi ǹ wa n jirimaɛ, à nɔ à waa dɛ ku kpam.

⁴ Amma Ilaaɔ̃ í jɛaa í ni, ǹ nɛ amanɛ dubu mɛɛje má iyi a kù gulɛ si wajui iwɛ̃ iyi à ya kpe Baali.

⁵ Bɛɛbɛ mɔi, baa nsɛi inɛi Izirɛli mbɔ ŋa à waa jirima Ilaaɔ̃, aŋa iyi í cica na didɔ̃ɛu.

⁶ Í cica ŋai na didɔ̃ɛ, kù jɛ na icɛ. Bii í jɛ do icɛui, didɔ̃u kù jɛ didɔ̃ má.

⁷ Ntɔ ntɔ bɛirei í ce. Inɛi Izirɛli ŋa a kù ba mii iyi à waa dɛ. Si inɔ nŋa inɛ ŋa iyi Ilaaɔ̃ í cicai à baa. Inɛ ŋa iyi à gbe idɔ nŋa í le.

⁸ Na iri nŋai kukɔi idei Ilaaɔ̃ í ni, Ilaaɔ̃ í da nŋa si sisi njoo si idɔ. Nɔ í mu nŋa iju iyi a kaa yɔkɔ a yɛò ilu. Nɔ í mu nŋa itĩ iyi a kaa yɔkɔ a gbɔò ide hee do nnyi fei.

⁹ Nɔ Davidi mɔ í ni, jingau nŋa ku jɛ nŋa cɛkũm do taao, nɔ ku nyi ku jɛ nŋa bi ku koosɛ má ku ba a koo a ba ijuukpã.

¹⁰ Jɔ̀ ilu kuku ku wa si iju nŋa a maà yɛ ilu. Nɔ i jɔ̀ a ya bate a maa ceò icɛ do ajɔ fei.

¹¹ Ŋɔi í jɔ̀ ǹ wa n bee, si waati iyi inɛi Izirɛli ŋa à koosɛ, à cukui hee do ajɔ fei? Aawo, kù jɛ bɛɛbɛ. Amma na kucuku nŋai í jɔ̀ dimi mmu ŋau mɔ à baò faaba ku ba a dedeò igu si ŋa.

¹² Debɛi, si bɛi kucukui inɛi Izirɛli ŋa í jɔ̀ hai jɛ Zuifu ŋa à ba amanii Hunde, nɔ kukayei inɛi Izirɛli ŋa í kɔ̃ɔsi amanii dimi mmu ŋa, zaka bɛirei amanii dimi mmu ŋau á la ku to waati iyi inɛi Izirɛli ŋa fei aa na a ba kpãai faaba.

Dimi mmu ŋa à ba faaba

¹³ Iŋɛ dimi mmu ŋau bɛ, iŋɛi ǹ wa n ba ide ku fɔ, amu iyi ǹ jɛ woo bɛ bi tu ŋɛ. Ǹ ya n maa n nɛ inɔ didɔ̃i do icɛm iyi ǹ wa n ce.

¹⁴ Si icɛu bɛi ǹ wa n dɛ kpãa n dedeò igui dimim ŋa, ku ba inɛ gɔ nŋa ŋa a ba faaba.

¹⁵ Ilaaɔ̃ í jɔ̀ hai jɛ Zuifu ŋa à dɔ̃ do nŋu si waati iyi í jɔ̀ Zuifu ŋa titã. Debɛi, bɛirei á yɛ si waati iyi á gba ŋa má. Nŋu bɛi á jɔ̀ aŋa iyi à ku wo a baa si kuwɛɛ.

¹⁶ Si iyafũi pɛ̃ɛ iyi à kpo, bii pɛ̃ɛ sinte iyi à ceu í jɛ ti Ilaaɔ̃, debɛi pɛ̃ɛu fei ti Ilaaɔ̃i. Bɛɛbɛ mɔi bii icãi jĩi í jɛ ti Ilaaɔ̃, do amaawɔɛ ŋa fei ti Ilaaɔ̃i.

¹⁷ Amma nsɛi à cafe amaawɔ gɔ ŋa hai si jĩi ndii olivi, nɔ iŋɛ iyi ì jɛ amaawɔi jĩi ndii sako, iŋɛi à sãsi agbɛ nŋa. Nsɛi wee iŋɛ mɔ ì waa ba inyi iyi wa naa si amaawɔ ŋau hai si icãu.

¹⁸ Na nŋu, i maà tɔɔ fufu ŋa si amaawɔ ŋa iyi à cafeu. Bɛirei aa ce i tɔɔ fufu ŋa. I jɔ̀ i mà ŋa iyi kù jɛ iŋɛi ì waa mu icãu, icãu njɛi wa mu ŋɛ.

¹⁹ Inɛ gɔ á ni, à cafe amaawɔ ŋau bɛi ku ba a sãsim si agbɛ nŋa.

²⁰ Ntɔi, à da ŋai na naanɛ hai dasi nŋa, nɔ awɔ mɔ ì wa agbɛu bɛi na naanɛ ku dasiɛ. Maà tɔɔ fufu, amma ce laakai,

²¹ domi bii Ilaaɔ̃ kù jɔ̀ amaawɔ sinte ŋau, á na ku jɔ̀ awɔ mɔ?

²² Debɛi, cɔ jiida ku jɛi Ilaaɔ̃ do kugaabuɛ. Í gaabu si inɛ ŋa iyi à cuku, amma í jɛ inɛ jiida bi tɛɛ. Awɔ de leekĩ dim dim si jiida ku jɛɛ. Bii kù jɛ bɛɛbɛ aa da awɔ takaɛ.

²³ Bii aŋa mɔ a kù mɔsi idɔ ku lele nŋa, Ilaaɔ̃ á sindo ŋa si agbɛ bii à wau wo, domi á yɔkɔ ku sindo ŋa si agbɛ nŋa má.

²⁴ Bii Ilaaɔ̃ í daɛ wa hai si jĩi ndii olivii sako nɔ í másiɛ si jĩi ndii olivi iyi à waa logooa iyi kù jɛ icuɛ, debɛi, kaa gaabuaa ku sindo amaawɔu si jĩi ndii nŋu takaɛ.

Inɛi Izirɛli* ŋa aa ba faaba

²⁵ Iŋɛ inɛm ŋa, n kù bi asiii ideu ihɛ̃ ku manji nŋɛ hee ku jɔ̀ i maa cɔ ara nŋɛ ilu bisi ŋa. Asiiu wee. Idɔi inɛi Izirɛli fiti mbɔ ŋau í lei titã hee kukpɔi dimi mmu ŋa iyi aa ba faabau ku kɔ̃.

²⁶ Si bɛɛbɛ, inɛi Izirɛli ŋau fei aa ba faabau, si bɛi à kɔɔ à ni, Ilaaɔ̃ í ni, woo faabau á naai hai Siɔ̃ɔ, nɔ ku nya lasabu hai mà bɛɛrɛm hai si dimii Zakɔbu.

²⁷ Iyi ihɛ̃i í jɛ akabuu iyi an dĩ do aŋa si waati iyi an kpa idei dulum du ŋa.

²⁸ Si tuubai laabaau jiidau Zuifu ŋa à jɛ mbɛɛi Ilaaɔ̃, nɔ nŋu bɛi í baa í jɛ aranfãanii iŋɛ, amma si tuubai kucica, à jɛ inɛ ŋa iyi Ilaaɔ̃ í bi hee nsɛi na bala nŋa ŋa.

²⁹ Ilaaɔ̃ í bi ŋa hee nsɛi domi ci ya ce mua ngba nɔ ci ya sinda idɔ hai si inɛ ŋa iyi í kpe.

³⁰ Tako wo ì donda Ilaaɔ̃ ŋa, amma nsɛi Ilaaɔ̃ í too si ide hai gbɔi Zuifu ŋau í ceò araare nŋɛ.

³¹ Nsɛi si bɛi Ilaaɔ̃ í ce nŋɛ didɔ̃ na saabui ide hai gbɔ nŋau, bɛɛbɛ mɔi á too si araare iyi í nyisi ŋɛ ku ba ku ce araarei aŋa mɔ.

³² Ntɔ ntɔ, Ilaaɔ̃ í jɔ̀ inɛ fei í baa í jɛ arui ide hai gbɔ, ku ba ku ce araarei inɛ fei.

Kulai Ilaaɔ̃

³³ Irei ì gbɔ bɛi amanii Ilaaɔ̃ do bisiɛ do kumàɛ í la í to. Inɛ gɔ kaa yɔkɔ ku mà yaasei lasabuɛ. Inɛ gɔ mɔ kù nɔ kù wɛɛ iyi á mà kpãaɛ sãa sãa.

³⁴ Bɛɛbɛi kukɔi idei Ilaaɔ̃ í ni, yooi í mà lasabui Aɔ̃ Lafɛ̃ɛ. Mà yooi í muaa bisi ajɔ gɔ.

³⁵ Yooi í tako í muaa ngɔgɔ ku bɛi ku maa degbe ku sãa nŋu gbese.

³⁶ Ilaaɔ̃i í jɛ irii mii fei, hai bi tɛɛi fei ndɛɛ wa naa. Nɔ mii fei í wɛɛi na iriɛ. Amboe ku jɛ tɛɛ hai nsɛi hee do ajɔ fei. Ami.