Romu 10 - Bibeli do fee

¹ Iŋɛ inɛm ŋa, iyi ǹ bi si idɔm fei do iyi ǹ wa n tɔɔ Ilaaɔ̃, nŋui í jɛ dimim ŋa a ba faaba.

² Ntɔ ntɔ, an yɔkɔ n fɔ na iri nŋa n ni à waa cea Ilaaɔ̃ icɛ do himma, amma a kù nɛ kumà.

³ A kù mà bɛi Ilaaɔ̃ í ya ceò inɛ dee dee, nŋui í jɔ̀ à dɛ kpãa nŋa bɛi aa ce a jɛò dee dee, nɔ a kù waa too si kpãa iyi Ilaaɔ̃ í jilɛ.

⁴ Kpãa iyi Ilaaɔ̃ í jilɛui í jɛ Kirisi iyi í na í kpa irii woodai Moizi nɔ inɛ iyi í dasiɛ naanɛ fei á jɛ dee dee si wajui Ilaaɔ̃.

Faabau í jɛ ti inɛ ŋa iyi à dasi Lafɛ̃ɛ naanɛ fei

⁵ Ide iyi Moizi í kɔ si yaase bɛi inɛ á jɛò dee dee si wajui Ilaaɔ̃ si wooda ku jirima wee. Inɛ iyi wa ceò woodam ŋau fei icɛ, na iri nŋai á maa wɛɛ.

⁶ Amma ide iyi à kɔ si yaase bɛi amanɛ á jɛò dee dee na naanɛ ku dasi wee. Maà ti i fɔ si idɔɛ i ni, yooi á bɔ lelei Aɔ̃. Bii ì waa fɔ bɛɛbɛ, í yɛ bɛi ì waa dɛ Kirisi ku kita wai.

⁷ Nɔ i maà ti i fɔ i ni, yooi á lɔ lɛlɛi ilɛ. Bii ì waa fɔ bɛɛbɛ, í yɛ bɛi ì waa dɛ ku dede Kirisi hai si balɛ mái.

⁸ Debɛi, bɛirei ideu wa fɔ. Bɛi wa fɔ wee. Ide iyi ì waa dɛdɛu kù jĩiɛ, í wa si gɛlɛɛ mɔm do si idɔɛ. Ideu nŋui í jɛ idei naanɛ ku dasi iyi à waa waazo, iyi í ni,

⁹ bii ì fɔ do gɛlɛɛ ì ni Jesui í jɛ Lafɛ̃ɛ, nɔ ì dasi naanɛ si idɔɛ iyi Ilaaɔ̃ í dedeɛ hai si balɛ, aa ba faaba,

¹⁰ domi do idɔi amanɛ í ya dasiò naanɛ ku ba ku jɛ dee dee si wajui Ilaaɔ̃, nɔ do gɛlɛ mɔi í ya fɔò ide ku ba ku baò faaba.

¹¹ Kukɔi idei Ilaaɔ̃ í nɔ í fɔ í ni inɛ iyi í dasiɛ naanɛ fei kaa yɛ anyɔ.

¹² Bɛɛbɛi inɛ gɔ kù jɛ ikã, hai Zuifu ŋa hee ku bɔ do dimi mmu ŋa fei. Aŋa fei Lafɛ̃ɛ akãi à nɛ. Inɛ ŋa iyi à waa tɔɔɛ fei í ya ce nŋa jiida ntɔ ntɔ.

¹³ Debɛi inɛ iyi wa tɔɔ Lafɛ̃ɛ fei á ba faaba, si bɛi idei Ilaaɔ̃ í fɔ.

¹⁴ Nɔ bɛirei inɛ ŋa aa ce a tɔɔɛ bii a kù dasiɛ naanɛ. Mà bɛirei aa ce a dasiɛ naanɛ bii a kù gbɔ ideɛ. Nɔ bɛirei aa ce a gbɔ ideɛ bii inɛ gɔ kù ce waazoi ideu.

¹⁵ Nɔ bɛirei aa ce a ce waazoi ideu bii kù jɛ inɛ gɔi í bɛ ŋa. Kukɔi idei Ilaaɔ̃ wa fɔ í ni, inɔ didɔ̃ nlai kunaai inɛ ŋa iyi à dabii à waa sisi laabaau jiidau.

¹⁶ Amma kù jɛ inɛ feii í jɛsi idei laabaau jiidau. Bɛɛbɛi walii Ezai mɔ í fɔ í ni, Lafɛ̃ɛ, yoo ŋai à dasi waazo nwau naanɛ.

¹⁷ Bɛɛbɛ mɔi naanɛ ku dasi wa naai hai si ide iyi inɛ wa gbɔ. Nɔ ide iyi à waa gbɔu idei Kirisii.

¹⁸ Amma ǹ wa n beei, Zuifu ŋa a kù gbɔ ideui? À gbɔɔ, domi à kɔɔ à ni, ideu í fangaa si andunya fei nɔ inɛ fei í gbɔɔ.

¹⁹ To, ǹ wa n bee má, inɛi Izirɛli ŋa a kù gbɔ yaasei ideu ba. À gbɔɔ, si bɛi Moizi í tako í kɔ na iri nŋa í ni, Ilaaɔ̃ í ni, an dede igu nŋɛ do dimi gɔ iyi a kù waa saalu bɛi dimi, nɔ n dede idɔɔkɔ̃ nŋɛ do dimi hai nɛ bisi.

²⁰ Ezai mɔ í kɔ do wɔɔkɔ í ni, Ilaaɔ̃ í ni, inɛ ŋa iyi a kù waa dɛdɛɛm ŋai à yɛm, nɔ ǹ nyisi ŋa aram, kù nɔ kù jɛ aŋai à tɔɔm.

²¹ Amma si gãmɛi inɛi Izirɛli ŋa í kɔ í ni, Ilaaɔ̃ í ni, hai daakɔi ǹ to awɔ bi hai gbɔ ide ilu itĩ ku yika ŋa.