Romu 1 - Bibeli do fee

Í ce ŋa fɔɔ

¹ Amui Pɔlu woo ce icɛi Jesu Kirisi, amu iyi Ilaaɔ̃ í kpe n na n jɛ woo bɛ nɔ í nyam ikã n waazoò laabaau jiidaɛ.

² Laabaau jiidaui Ilaaɔ̃ í wãò wa wo. Nɔ kuwã iyi í ceui í jɔ̀ waliiɛ ŋa à kɔ si kukɔi ideɛ.

³ Jesu Kirisi Lafɛ̃ɛ nwai wa fãa, nŋu iyi í jɛ Amai Ilaaɔ̃u. À búui bɛi amanɛ si dimii Davidi ilaalu nlau,

⁴ amma Hundei Ilaaɔ̃ í nyisi do gbugbã iyi ntɔi Amai Ilaaɔ̃i si waati iyi í dedeɛ hai si balɛ.

⁵ Jesuu nŋui í muum didɔ̃ ǹ jɛò woo bɛ ku ba n naaò inɛ ŋa wa hai si dimi fei bi tɛɛ na iriɛ ku ba a dasiɛ naanɛ nɔ a jirimaɛ.

^6-7 Iŋɛ inɛi Romu ŋau, ì wa si inɔ nŋa ŋa, iŋɛ iyi Jesu Kirisi í kpe. Na ŋɔi í jɔ̀ ǹ wa n kɔa iŋɛ fei tiau ihɛ̃ wa, iŋɛ iyi Ilaaɔ̃ í nɛ kubi nŋɛ nɔ í kpe ŋɛ i na i jɛ titi nŋu ŋa. Ilaaɔ̃ Baa nwa do Lafɛ̃ɛ Jesu Kirisi a mu nŋɛ didɔ̃ do laakai ku sũ.

Pɔlu wa bi ku bɔ Romu woo dasi Jesu naanɛ ŋa ku kaako

⁸ Sinte titã ǹ wa n saabu Aɔ̃ Lafɛ̃ɛm do saabui Jesu Kirisi na irii iŋɛ fei, si na iyi í jɔ̀ à waa fɔ idei naanɛ ku dasi nŋɛ si andunya fei.

⁹ Ilaaɔ̃, nŋu iyi ǹ wa n cea icɛ do idɔm fei ǹ wa n sisiò laabaau jiidai Amaɛ, í mà iyi ǹ wa n ye gigi nŋɛ waati kãma fei

¹⁰ si kutɔɔm. Ǹ ya n maa n tɔɔ Ilaaɔ̃ bii í bi ku muum kpãa bɛbɛi n naa bi tu ŋɛ,

^11-12 domi ǹ dasi idɔ jiida jiida n naa n yɛ ŋɛ ku ba i ba gbugbã ŋa do saabum, waatɔ ka ba gbugbã ajɔ si naanɛ ku dasi nwa awaɛ ŋa waati iyi an naa n wa bi tu ŋɛ. Gbugbãu amuai Hundei Ilaaɔ̃i.

¹³ Iŋɛ inɛm ŋa, ǹ bi i mà ŋa iyi tuuba nkpɔ nkpɔi ǹ ya n ce sɔɔlui ku naa bi tu ŋɛ, amma hee nsɛi n kù ba fayaɛ. Ǹ bi icɛm ku nɛ iso si anini nŋɛ, bɛi í nɛ bi dimi mmu gɔ ŋa mɔ.

¹⁴ Ǹ wa n mu gbesei n waazoa inɛ fei hai inɛ ŋa iyi à fũ iju hee do ilu iju dũdũ ŋa, bi inɛ ŋa iyi à nɛ kumà hee do inɛ ŋa iyi a kù nɛ kumà.

¹⁵ Ŋɔi í jɔ̀ ǹ wa n bi n sisia iŋɛ inɛi Romu ŋau mɔ laabaau jiidau ntɔ ntɔ.

Gbugbãi laabaau jiida

¹⁶ N kaa n ce anyɔi laabaau jiidau, domi í jɛ gbugbãi Ilaaɔ̃i iyi wa faaba inɛ iyi í dasi Jesu naanɛ fei, hai Zuifu ŋa hee ku koo si dimi mmu ŋa.

¹⁷ Laabaau jiidau wa nyisi iyi Ilaaɔ̃ í ya jɔ̀ inɛ ku jɛ dee dee na naanɛ ku dasi nŋu akã, si bɛi à kɔɔ à ni, inɛ iyi í jɛ dee dee si wajui Ilaaɔ̃ na naanɛ ku dasiu á ba kuwɛɛ.

Taalei inɛ ŋa

¹⁸ Do ntɔi, Ilaaɔ̃ wa nyisi idɔɔkɔ̃ɛ wa hai lele si gãmɛi inɛ ŋa iyi à waa ce laalɔ fei nɔ a kù mà bɛɛrɛɛ. Si laalɔ ku ce nŋau a kù jɔ̀ ntɔ kù waa ce icɛ.

¹⁹ Ilaaɔ̃ wa ce idɔɔkɔ̃ domi mii iyi í jɔ amanɛ kú mà siɛ kù singa nŋa. Ilaaɔ̃ takaɛ í nyisi ŋa mam mam.

²⁰ Do ntɔ, a kaa yɔkɔ a yɛ Ilaaɔ̃ do iju, amma hai waati iyi í taka andunya í nyisi araɛ iyi nŋui í jɛ Ilaaɔ̃, nɔ í nyisi gbugbã hai nɛ kɔɔɛ si mii ŋa iyi í taka. Na nŋu, a kù nɛ iyi aa fɔ.

²¹ À mà Ilaaɔ̃ amma a kù waa saaluɛ hee a bɛi a saabuɛ si bɛi í jɔ. Iri nŋa í na í ku, nɔ idɔ hai nɛ bisi nŋa í dási ilu kuku nla nla.

²² À waa tamaa aŋa à nɛ bisi amma nnyɛi à na à ce.

²³ Í sĩai wo a tɔɔ Ilaaɔ̃ ilu amboe, nŋu iyi kaa ku ajɔ kãma. Amma wee à sinda à waa tɔɔ iwɛ̃ ŋa iyi à jɔ amanɛ iyi á ku. Iwɛ̃ gɔ ŋa mɔ à jɔ yɛi ŋa, do mɛɛmu ŋa iyi à waa nɛ do iyi à waa cã ilɛ.

²⁴ Na ŋɔi í jɔ̀ Ilaaɔ̃ í fũsi ŋa awɔ ku ba a hanya a ce daa sãmi aŋa duusɔ̃ɔ si bɛi idɔ nŋa í bi. Daa sãmiu á jɔ̀ a cã anyi.

²⁵ Inɛ ŋau à kpaasi ntɔi Ilaaɔ̃ do ibo. Mii ŋa iyi Ilaaɔ̃ í taka ŋai à waa tɔɔ à waa ce nŋa icɛ, kù jɛ Ilaaɔ̃ takaɛ. Ilaaɔ̃i à nɛ ka maa saabu hee do ajɔ fei. Ami.

²⁶ Ŋɔi í jɔ̀ Ilaaɔ̃ í fũsi ŋa awɔ nɔ à dasi kɔdɛɛ iyi í jɔ̀ à waa cã anyi. Inaabo nŋa ŋa a ci ya jɛ baa inɛmɔkɔ ku sũò ŋa má, bii kù jɛ aŋa duusɔ̃ɔ.

²⁷ Bɛɛbɛ mɔi inɛmɔkɔ ŋau mɔ a ci ya sũò baa inaabo ŋau má, amma kubi hai nɛ yaasei aŋa duusɔ̃ɔ í la hee í caa. À waa ce idei iju hai nɛ anyɔ inɛmɔkɔ do inɛmɔkɔ, nɔ aŋa taka nŋa à waa gba ijuukpã iyi í to zakai kurara nŋa.

²⁸ Si bɛi a kù bi Ilaaɔ̃ ku mà, ŋɔi í jɔ̀ Ilaaɔ̃ í fũsi ŋa awɔ si lasabu laalɔ nŋa a ceò mii iyi kù jɔ amanɛ ku ce.

²⁹ Nɔ laalɔ fei í wɛɛ nŋa, hai inɔ ku kã do kɔdɛɛ do njɛ ku cé do igu do inɛ ku kpa do ija do ibo do bisi laalɔ, hee do irii njɛ ku sɔ.

³⁰ À ya maa fɔ laalɔi njɛ, à cé Ilaaɔ̃, à ya yɛ ara nŋa, à jɛ ilu faau ŋa, à ya tɔɔ fufu, à nɛ bisii laalɔ ku ce, a kù waa saalu iyeò baa nŋa ŋa.

³¹ A kù nɛ laakai, a kù nɛ naanɛ, a kù bi njɛ, a kù nɛ araarei njɛ.

³² À mà woodai Ilaaɔ̃ iyi wa fɔ í ni, inɛ ŋa iyi à waa ce dimii mii bɛɛbɛ ŋa, ikui í jɛ kɔkɔɔ nŋa. Do nŋu fei à ya coo, nɔ à ya maa saabu woo ce dimiɛ ŋa má.