Iri ku kɔ̃ 99 - Bibeli do fee

Aɔ̃ Lafɛ̃ɛi í jɛ ilaalu, nɔ nŋu akãi í jɛ Ilaaɔ̃ do ntɔ

¹ Aɔ̃ Lafɛ̃ɛi í jɛ ilaalu, nɔ inɛ ŋa à waa yaya. Wa buba si antaii serubɛ̃ɛ ŋa, nɔ ilɛ wa yaya.

² Aɔ̃ Lafɛ̃ɛ í jɛ inɛ nla si ilui Siɔ̃ɔ, nŋui í wa si antaii dimi ŋa fei.

³ Awɔ Aɔ̃ Lafɛ̃ɛ, ì to a maa cĩɛ, awɔ iyi ì la nɔ à nɛ a ce njoɛ. Ntɔ ntɔ awɔ akãi ì má.

⁴ Ka kɔ̃ò gbugbãi ilaalu iyi í bi ntɔu iri. Awɔi ì jilɛ nwa wooda si kuwɛɛ nwa. Awɔi ì jilɛ ntɔ do dee dee ku jɛ si ilɛi Izirɛli.

⁵ I fɔ kulai Aɔ̃ Lafɛ̃ɛ nwa ŋa. I gulɛ si wajui bi ku lesi kutɛɛ ŋa, domi Aɔ̃ Lafɛ̃ɛu í má.

⁶ Moizi do Arɔ̃ɔ à wa si inɔi woo weeɛ ŋa, nɔ Samuɛli mɔ í wa si inɔi woo tɔɔɛ ŋa. À kpe Aɔ̃ Lafɛ̃ɛ, nɔ í jɛ nŋa.

⁷ Í ba ŋa ide ku fɔ wai hai si kudũi ijĩ, nɔ à jirima ideɛ ŋa do wooda ŋa iyi í na ŋau.

⁸ Aɔ̃ Lafɛ̃ɛ nwa, awɔi ì jɛ nŋa, ì ce nŋa suuru. Amma ì kpã ŋa iju si kuce nŋa.

⁹ I fɔ kulai Aɔ̃ Lafɛ̃ɛ nwa ŋa. I gulɛ si wajui iri kuta kumáɛu domi Aɔ̃ Lafɛ̃ɛ nwau í má.