Iri ku kɔ̃ 98 - Bibeli do fee

I dɔ̃a Aɔ̃ Lafɛ̃ɛ iyi wa naa anu ŋa

1 Iri ku kɔ̃.

¹ Iri ku kɔ̃. I kɔ̃a Aɔ̃ Lafɛ̃ɛ iri titɔ̃ ŋa domi í ce maamaake ŋa. Í jɛ igũi do gbugbãi awɔ kumáɛ.

² Aɔ̃ Lafɛ̃ɛ í jɔ̀ à mà iyi nŋui í jɛ woo faaba. Í jɔ̀ dimi mmu ŋa à yɛ dee dee ku jɛɛ si inɛɛ ŋa.

³ Jiida ku jɛɛ do dee dee ku jɛɛ wa mɔsi si gãmɛi inɛi Izirɛli inɛɛ ŋau. Inɛ ŋa iyi à wa hee kɔɔi ilɛ ŋa fei, à yɛ iyi Ilaaɔ̃ Lafɛ̃ɛ nwa í faaba wa.

⁴ Iŋɛ inɛi andunya ŋa fei, i dɔ̃a Aɔ̃ Lafɛ̃ɛ anu do inɔ didɔ̃ ŋa. I dɔ̃ anui inɔ didɔ̃ i kɔ̃ iri ŋa.

⁵ I kɔ̃a Aɔ̃ Lafɛ̃ɛ iri do mɔɔlɔ ŋa. I kɔ̃ iriu do mɔɔlɔ do imui iri ku kɔ̃ ŋa.

⁶ I fã kãakãakĩ ŋa do kuu ŋa. I dɔ̃ anu do inɔ didɔ̃ si wajui Aɔ̃ Lafɛ̃ɛ ilaalu nwau.

⁷ Tenku do mii ŋa iyi à wa si fei a ce iba. Andunya do inɛɛ ŋa fei a wɛɛò inɔ didɔ̃.

⁸ Ido nla ŋa a dakpɛ, nɔ aŋaò iri kuta ŋa a dɔ̃ anu ajɔ ajɔ do inɔ didɔ̃

⁹ si wajui Aɔ̃ Lafɛ̃ɛ, domi wa naai ku kiiti ilɛ. Á kiiti andunyai do dee dee ku jɛ, nɔ kiitiɛu dee deei á jɛ bi inɛ fei.