Iri ku kɔ̃ 97 - Bibeli do fee

Aɔ̃ Lafɛ̃ɛi í jɛ ilaalu, inɔ didɔ̃i si ilɛu fei

¹ Aɔ̃ Lafɛ̃ɛi í jɛ ilaalu. Inɔ didɔ̃ nla nla ku jɛ ti inɛi andunya fei. Inɛ ŋa iyi à wa jĩijĩ, à nɛ a wɛɛò inɔ didɔ̃i.

² Kudũi ijĩ do ilu kuku nla nlai í kaakoɛ. Dee dee ku jɛ do ntɔi í jɛ icui bommaɛ.

³ Ina gɔ wa cua do wajuɛ. Nɔ í jo mbɛɛɛ ŋa iyi à kaakoɛ ŋau.

⁴ Í jɔ̀ kuŋɔi ijĩ í ce inya kumá si andunya, ilɛ í yɔɔ nɔ wa yaya.

⁵ Iri kuta ŋa à waa yɔ bɛi inyii nyikɔ̃ si wajui Ilaaɔ̃ nŋu iyi í jɛ Lafɛ̃ɛi andunya fei.

⁶ Lele wa sisi dee dee ku jɛɛ, nɔ dimi ŋa fei à waa yɛ amboeɛ.

⁷ Inɛ ŋa iyi à waa tɔɔ mii ŋa iyi à ce do awɔ nŋa do inɛ ŋa iyi à ya maa tɔɔ fufu si iwɛ̃ nŋa ŋa, si anyɔi aa koo a wa. Iwɛ̃ ŋau aa sɛɛbatai si wajui Aɔ̃ Lafɛ̃ɛ.

⁸ Aɔ̃ Lafɛ̃ɛ, inɛi Siɔ̃ɔ ŋa à gbɔ nɔ à nɛ inɔ didɔ̃. Inɛi ilui Zudaa ŋa à wɛɛò inɔ didɔ̃ nla nla na kiitiɛ ŋa iyi ì ce.

⁹ Aɔ̃ Lafɛ̃ɛ, awɔi ì la ì re si ilɛu fei. Awɔi ì wa antaii iwɛ̃ ŋa fei.

¹⁰ Iŋɛ iyi ì bi Aɔ̃ Lafɛ̃ɛ ŋa, i cé laalɔ ŋa. Nŋui wa mu hundei inɛɛ ŋa. Nŋui í ya nya inɛɛ ŋau hai si awɔi ilu inɔ kukã ŋa.

¹¹ Kuweei Ilaaɔ̃ í ya wɛɛi na inɛ dee dee ŋa. Nɔ inɛ ŋa iyi idɔ nŋa í má, si inɔ didɔ̃i à ya wa.

¹² Iŋɛ inɛ dee dee ŋa, i wɛɛò inɔ didɔ̃ ŋa si Aɔ̃ Lafɛ̃ɛ, nɔ i maa cũu i maa na iri kumáɛ bɛɛrɛ ŋa.