Iri ku kɔ̃ 96 - Bibeli do fee

Aɔ̃ Lafɛ̃ɛ iyi wa naa, ka kɔ̃a iri titɔ̃

¹ I kɔ̃a Aɔ̃ Lafɛ̃ɛ iri titɔ̃ ŋa. I kɔ̃a Aɔ̃ Lafɛ̃ɛ iri ŋa, iŋɛ inɛi andunya ŋa fei.

² I kɔ̃a Aɔ̃ Lafɛ̃ɛ iri, i cũu ŋa. I sisi laabaau jiidai faabaɛ ajɔ fei.

³ I sisia inɛi ilɛ mmu ŋa amboeɛ ŋa, nɔ i sɔ̃ dimi mmu ŋa fei maamaake ŋa iyi í ce ŋa.

⁴ Aɔ̃ Lafɛ̃ɛ í la nɔ í to a cũu. Nŋui inɛ fei í nɛ ku ce njoɛ ku re iwɛ̃ ŋa.

⁵ Iwɛ̃i dimi mmu ŋau, a kù jɛ nkãma. Aɔ̃ Lafɛ̃ɛ njɛi í ce lele.

⁶ Wajuɛ wa daana nɔ í nɛ amboe. Gbugbã do yiiko fei í wa si inɔ kpasɛ̃ɛ.

⁷ Iŋɛ inɛi andunya ŋa, i jɔ̀ i mà bɛɛrɛi Aɔ̃ Lafɛ̃ɛ ŋa nɔ i ya maa fɔ idei amboeɛ do gbugbãɛ ŋa.

⁸ I jɔ̀ i mà bɛɛrɛɛ ŋa, nɔ i kooa kuwee ŋa si bantumai kpasɛ̃ɛ.

⁹ Aɔ̃ Lafɛ̃ɛ í má. I sɛɛbata si wajuɛ waati iyi ì yɔɔ ŋa. I yaya si wajuɛ ŋa, iŋɛ inɛi andunya ŋa fei.

¹⁰ I sɔ̃ dimi ŋa fei iyi Aɔ̃ Lafɛ̃ɛi í jɛ ilaalu. Í jilɛ icui ilɛ í nɛ gbugbã dim dim, nɔ kaa yaya. Aɔ̃ Lafɛ̃ɛ á kiiti dimi ŋai si dee dee ku jɛ.

¹¹ Lele ku wɛɛò inɔ didɔ̃, ilɛ mɔ ku wɛɛò inɔ didɔ̃. Tenku ku ce iba do mii iyi í wa inɔɛ fei.

¹² Sako ku wɛɛò inɔ didɔ̃ do mii iyi í wa siɛ fei. Jĩi ndii agbo ŋau fei a dɔ̃ anu do inɔ didɔ̃

¹³ si wajui Aɔ̃ Lafɛ̃ɛ domi wa naa. Wa naai ku na ku kiiti inɛi andunya ŋa. Á kiiti inɛi andunya ŋaui do dee dee ku jɛ, nɔ si ntɔi á kiitiò inɛ fei.