Iri ku kɔ̃ 95 - Bibeli do fee

Waati iyi aa ka leekĩ si wajui Aɔ̃ Lafɛ̃ɛ

¹ I naa wa ŋa ka dɔ̃a Aɔ̃ Lafɛ̃ɛ anu do inɔ didɔ̃. Ka dɔ̃ anu do inɔ didɔ̃ na kuta ku nɛ gbugbã bii faaba nwa í wau.

² Ka bɔ si wajuɛ, ka saabuɛ, ka kɔ̃a iri do inɔ didɔ̃.

³ Ntɔ ntɔ, Aɔ̃ Lafɛ̃ɛ í la, nŋui í jɛ ilaalu nla si antaii iwɛ̃ ŋa fei.

⁴ Nŋui wa mu lɛlɛi ilɛu nɔ iri kuta ŋau nŋui í nɛ ŋa.

⁵ Nŋui í nɛ tenku, nŋui í coo. Ilɛ mɔ awɔɛ ŋai à coo.

⁶ I naa wa ŋa ka kaye ara nwa, ka gulɛ, ka sɛɛbata si wajui Aɔ̃ Lafɛ̃ɛ nŋu iyi í taka wa.

⁷ Nŋui í jɛ Ilaaɔ̃ Lafɛ̃ɛ nwa, nɔ awai à jɛ inɛɛ ŋa iyi wa degbe. À yɛi bɛi mɛɛmu gaa iyi wa gbã. Nnyi, i jɔ̀ i gbɔ ideɛ iyi wa sɔ̃ ŋɛ wa ni,

⁸ i maà lele idɔ nŋɛ bɛi bala nŋɛ ŋa à ce Meriba, si ajɔ iyi à kɔ̀sim waati iyi à wa Masa si gbaau.

⁹ Tengi bɛi bala nŋɛ ŋa à cɔ laakaim, baa do iyi à yɛ mii ŋa iyi ǹ ce fei.

¹⁰ Adɔ̃ ciijii inɛ ŋau à ce mii iyi kù dɔ̃ɔm si, nɔ ǹ ni, inɛ ŋau, inɛ ŋai iyi lasabu nŋa í yaa, a kù waa too kpãam.

¹¹ Na nŋu, si idɔɔkɔ̃m, ǹ fɔ do kugbasi ǹ ni, a kaa lɔ si ilɛ bii ǹ ce nŋa sɔɔlui kusĩmiu.