Iri ku kɔ̃ 94 - Bibeli do fee

Ilaaɔ̃i í ya sã gbesei mii iyi kù jɛ dee dee

¹ Aɔ̃ Lafɛ̃ɛ, awɔ iyi ì jɛ Ilaaɔ̃ iyi ì ya sã gbese, nyisi amboeɛ.

² Awɔ woo kiitii ilɛu, dede i sãa ilu faau ŋa laalɔ iyi à ce.

³ Aɔ̃ Lafɛ̃ɛ, hee waati yoomai aa jɔ̀ ilu inɔ kukã ŋa a maa wɛɛ, nɔ a maa nɛ inɔ didɔ̃.

⁴ Inɛ ŋau, à ya maa fɔ idei do faau, nɔ aŋa woo ce laalɔ ŋau fei à ya maa tɔɔ fufui.

⁵ Aɔ̃ Lafɛ̃ɛ, inɛ ŋau à waa tɛɛsɛ inɛɛ ŋa, à waa wahala inɛ ŋa iyi à jɛ titɛɛ.

⁶ À waa kpa jaaɔ̃ do inɛ njoo ŋa, nɔ à waa kpa kɔyɔ ŋa mɔ.

⁷ Nɔ à waa ni, Aɔ̃ Lafɛ̃ɛ kù waa yɛ nkãma. Ilaaɔ̃ Lafɛ̃ɛi Zakɔbu kù waa ce laakaii nkãma.

⁸ Iŋɛ nnyɛi ŋa, i ce laakai ŋa. Iŋɛ hai nɛ yaase ŋa, waati yoomai aa nɛ laakai jiida ŋa.

⁹ Aɔ̃ Lafɛ̃ɛ iyi í daa amanɛ si itĩ, kaa yɔkɔ ku gbɔ ide? Nŋu iyi í ce iju, kaa yɔkɔ ku yɛ mii iyi wa ce?

¹⁰ Nŋu iyi í ya kpã dimi mmu ŋa iju, kaa yɔkɔ ku yɛ taale nŋai? Nŋui í ya kɔ amanɛ ŋa ku jɔ̀ a nɛ kumà.

¹¹ Aɔ̃ Lafɛ̃ɛ í mà lasabui amanɛ ŋa. Lasabu ŋau a kù jɛ nkãma.

¹² Ilu inɔ didɔ̃i inɛ iyi awɔ Aɔ̃ Lafɛ̃ɛ ì waa nyisiɛ kpãa, nɔ ì waa kɔɔ si woodaɛ ŋa.

¹³ Nŋui á jɔ̀ ku nɛ laakai ku sũ si waatii wahala hee a koo a tua ilu inɔ kukã isa.

¹⁴ Aɔ̃ Lafɛ̃ɛ ci ya kɔ̀si inɛɛ ŋa, nɔ ci ya fũsi inɛ ŋa iyi à jɛ titɛɛ ŋau awɔ.

¹⁵ Kiitiu si dee dee ku jɛi aa coo, nɔ inɛ ŋa iyi idɔ nŋa í má fei aa jɛsii.

¹⁶ Yooi á dede ku kɔ̀ɔm bi inɛ laalɔ ŋau. Yooi á leekĩ si anyim bi woo ce laalɔ ŋau.

¹⁷ Bii Aɔ̃ Lafɛ̃ɛ kù faabam wo, bii í wa ǹ maai bi kuwai iku ŋa.

¹⁸ Waati iyi ǹ ni, ǹ kua gbugbã, Aɔ̃ Lafɛ̃ɛ, jiida ku jɛɛ í ya muum gbugbãi.

¹⁹ Waati iyi ǹ wa n ce weewea nkpɔ nkpɔ si idɔm, awɔi ì muum gbugbã, nɔ ì jɔ̀ ǹ nɛ inɔ didɔ̃.

²⁰ Mii wa tɔtɔɔ awɔ do woo ce kiiti laalɔ ŋau, aŋa iyi a ci ya ce kiiti bɛi wooda í ni.

²¹ À ya tɔtɔɔi si gãmɛi inɛ dee dee nɔ a yɛ taalei hai nɛ taale.

²² Amma Aɔ̃ Lafɛ̃ɛi í jɛ bi ku manji ilu gbugbãm. Ilaaɔ̃ Lafɛ̃ɛm nii í jɛ kuta bi ku manjim.

²³ Nŋui á jɔ̀ laalɔ iyi à ce, ku cuku si ŋa. Nŋui á ce nfei inɛ laalɔ ŋa ku kpa ŋa. Aɔ̃ Lafɛ̃ɛ nwai á ce nfe nŋa nɔ ku kpa ŋa.