Iri ku kɔ̃ 91 - Bibeli do fee

Bi ku manji nwa í wa bi Ilaaɔ̃ iyi í wa lele

¹ Inɛ iyi í wa bi Ilaaɔ̃ hee lele jĩijĩ, á maa sĩmii si jĩjĩi ilu gbugbã feiu.

² Ǹ sɔ̃ Aɔ̃ Lafɛ̃ɛ ǹ ni nŋui í jɛ bi ku manji ilu gbugbãm. Nŋui í jɛ Ilaaɔ̃ Lafɛ̃ɛm iyi ǹ wa n naanɛ,

³ domi nŋui á nyaɛ hai si taai woo mu ama yɛi ŋau. Nŋui á nyaɛ hai si bɔ̃ɔ ku kpa inɛu.

⁴ Nŋui á biiɛ do ikpaɛ ŋa. Si abɛi ikpaɛ ŋaui aa ba bi ku manji. Dee dee ku jɛɛi í jɛ bɛi tɛli ilu naanɛ.

⁵ I kaa nɛ zigiidai nkãma idũ, walakɔ afa ŋa iyi à ta lele dasã,

⁶ walakɔ bɔ̃ɔ iyi wa ce asɔɔ wa idũ, walakɔ laalɔ iyi wa ba inɛ ŋa dasã.

⁷ Baa bii amanɛ dubu í cuku kɔkɔɛ, nɔ amanɛ dubu mɛɛwa í cuku do awɔ njɛɛ, nkãma kaa baɛ.

⁸ Cɔ do ijuɛ nŋu akã, aa yɛ bɛi à waa sãa ilu inɔ kukã ŋau mii iyi à ce.

⁹ Bii ì ni Aɔ̃ Lafɛ̃ɛi í jɛ bi kuwaɛ, bii ì cica Ilaaɔ̃ iyi í wa lele í jɛ bi ku manjiɛ,

¹⁰ laalɔ kãma kaa naa siɛ, nɔ bɔ̃ɔ kãma gɔ kaa maai wa si kpasɛ̃ɛ,

¹¹ domi na iriɛi á na amalekaɛ ŋa wooda a maa degbeɛ bii ì waa bɔ fei.

¹² Aa maa muɛi si awɔ nŋa ku ba i maà na i koosɛ si kuta.

¹³ Aa nɛ̀ si muusu nla do njo wukuku, nɔ aa yɔkɔ i tɛɛsɛ akandama do njou, zigiida kaa wa si.

¹⁴ Aɔ̃ Lafɛ̃ɛ í ni, si bɛi wa másim, an jɔ̀ ku fita si. An maa n muui si bɛi í màm.

¹⁵ Bii í kpem, an jɛaa, nɔ si waatii wahala, an wɛɛ do nŋu. An faabaɛ nɔ n jɔ̀ ku nɛ bɛɛrɛ.

¹⁶ An muaa kuwɛɛ jiida do hunde sisɔ, nɔ n jɔ̀ ku ba faaba.