Iri ku kɔ̃ 90 - Bibeli do fee

IKƆ̃ MƐƐSIAI TIAU ( Iri ku kɔ̃ 90-106 ) Amanɛ á lɔi, Ilaaɔ̃i á gbe

1 Kutɔɔu ihɛ̃ ti Moizi woo ce icɛi Ilaaɔ̃ui.

¹ Kutɔɔu ihɛ̃ ti Moizi woo ce icɛi Ilaaɔ̃ui. Aɔ̃ Lafɛ̃ɛ, si ku dedei tɔku tɔku ŋa, awɔi ì jɛ bi ku manji nwa.

² Hee i maa ce iri kuta ŋa, nɔ hee i maa taka andunya, awɔ Ilaaɔ̃ ì wɛɛi hai ku kpɛ, nɔ aa maa wɛɛi hee do ajɔ fei.

³ Awɔi ì ya jɔ̀ amanɛ ku nyi si sãa. Nɔ ì ya ni, iŋɛ amai Adamu ŋa, i nyi si sãa hai bii ì fita wa ŋa.

⁴ Bi titɛɛ, adɔ̃ dubu í yɛi bɛi ajɔi ana iyi í lɔ tã, walakɔ bɛi saamai idũ.

⁵ Aɔ̃ Lafɛ̃ɛ, awɔi ì ya leekĩ kuwɛɛi amanɛ. Kuwɛɛu í ya lɔi bɛi njooi amɛɛjuumá. Daakɔ í ya yɛi bɛi fɔfɔ tũtũ.

⁶ Daakɔ í ya la ku maa kooi nɔ ku da koko. Amma alɛ à ya daai nɔ ku gbɛ.

⁷ À ya ka kua gbugbãi na idɔɔkɔ̃ɛ. Zigi nwa í ya dai na idɔɔkɔ̃ nla nlaɛu.

⁸ Ì ya jilɛ kurara nwa ŋai si wajuɛ. Nɔ mii iyi à waa ce si asii fei, inya kumáɛ í ya jɔ̀ ku fita gbugbãai.

⁹ Ajɔ nwa ŋa wa kaye na idɔɔkɔ̃ɛ, adɔ̃ nwa ŋa à ya lɔi bɛi ami fufu akã.

¹⁰ Kukpɔi adɔ̃ nwa ŋau kitaò fɛɛwai. Bi inɛ ŋa iyi à nɛ gbugbã ŋa, cinɛi. Do nŋu fei kuwɛɛi amanɛ kù nɛ aranfãani kãma í gbe wahala do inɔ kufɔ. Kuwɛɛ í ya maa lɔi gbãa gbãa nɔ à waa ce amɛɛ do iku.

¹¹ Yooi í mà bɛi gbugbãi idɔɔkɔ̃ɛ í to. Yooi wa jirimaɛ na gbugbãi idɔɔkɔ̃ɛu.

¹² Jɔ̀ ka mà iyi ajɔ nwa kù sɔ, si yaase bɛɛbɛ idɔ nwa á nɛ bisi.

¹³ Aɔ̃ Lafɛ̃ɛ, hee waati yoomai aa maa wɛɛò idɔɔkɔ̃ si gãmɛi awa woo ce icɛɛ ŋa. Sinda wa bi tu wa nɔ i ce araare nwa.

¹⁴ Daakɔ fei, i ya jɔ̀ ka kɔ̃ do jiida ku jɛɛ, nɔ ka ya maa dɔ̃ anu do inɔ didɔ̃ si kuwɛɛ nwa fei.

¹⁵ Zaka bɛi í kpã wa iju í to, jɔ̀ inɔ didɔ̃ nwa mɔ ku to bɛɛbɛ, nɔ inɔ kufɔi adɔ̃ nwa ku kpaasi do inɔ didɔ̃.

¹⁶ Jɔ̀ awa woo ce icɛɛ ŋa ka yɛ icɛ iyi ì waa ce, nɔ tɔku nwa ŋa a yɛ amboeɛ.

¹⁷ Aɔ̃ Lafɛ̃ɛ nwa, jɔ̀ didɔ̃ɛ ku wɛɛ do awa. Wee si icɛi awɔ nwa ŋa ntɔ ntɔ, nɔ ku nɛ aranfãani.