Iri ku kɔ̃ 9 - Bibeli do fee

Aɔ̃ Lafɛ̃ɛi í jɛ woo faabai ilu are do hai nɛ gbugbã ŋa

¹ Iriu ihɛ̃ ti inɛ ngboi woo kɔ̃ iri ŋai do Davidi. À ya kɔ̃ɔi do imu ngbɛ.

² Aɔ̃ Lafɛ̃ɛ, an saabuɛ do idɔm fei. An sisi mii jiida ŋa iyi ì ce fei.

³ An wɛɛò inɔ didɔ̃ ntɔ ntɔ na iriɛ. Awɔ iyi ì wa leleu an kɔ̃ iri n maa n cĩɛ.

⁴ Si wajuɛ mbɛɛm ŋa à nyi do anyi, à koosɛ nɔ à ce nfe.

⁵ Si kitãi bommaɛi ì waa buba ì waa ceò kiitiɛ dee dee, ì kɔ̀ɔm nɔ ì nam ntɔ.

⁶ Ì kpã mbɛɛɛ ŋa iju, nɔ ì ce nfei ilu inɔ kukã ŋa, ì kpa iri nŋa hee do ajɔ fei.

⁷ Awɔi ì kpa iri nŋa mam mam hee do ajɔ fei. Ì lɛgɛ ilu nla nŋa ŋa ì jɔ̀ à kpɔò bomma nɔ à ci ya ye baa gigii iri nŋa má.

⁸ Aɔ̃ Lafɛ̃ɛ wa buba si kitãi bommaɛi do ajɔ fei. Í jilɛ bommaɛi na irii kiitiu hee do ajɔ fei.

⁹ Nŋui wa mu andunya do dee dee ku jɛ nɔ wa kiiti inɛ ŋa si ntɔ.

¹⁰ Aɔ̃ Lafɛ̃ɛi wa mu hai nɛ gbugbã ŋa, nɔ nŋui í ya maa degbe ŋa si waatii wahala.

¹¹ Aɔ̃ Lafɛ̃ɛ, inɛ ŋa iyi à màɛ a dasiɛ naanɛ, domi ì ci ya fũsi inɛ ŋa iyi à waa dɛdɛɛ awɔ.

¹² Aɔ̃ Lafɛ̃ɛ iyi í wa Siɔ̃ɔ, i kɔ̃ɔa iri ŋa. I sisi mii nla ŋa iyi í ce si aninii inɛi andunya ŋa.

¹³ Aɔ̃ Lafɛ̃ɛi í ya sãa inɛ ŋa iyi à kpa gbese. Í ya maa ye gigii laalɔ iyi í ba ŋai. Ci ya gbɛjɛ idei inɛ ŋa iyi à waa dɔ̃ siɛ anu na gbugbã iyi à waa ta nŋa.

¹⁴ Aɔ̃ Lafɛ̃ɛ, ceem didɔ̃. Cɔ ijuukpã iyi woo cém ŋau à waa nyisim, awɔ iyi ì nyam hai si anui iku,

¹⁵ ku ba n maa n cĩɛ si wajui inɛi ilui Siɔ̃ɔ ŋa. An wɛɛò inɔ didɔ̃i do bɛi ì faabam.

¹⁶ Isɛ mmu ŋa à dasi isa iyi aŋa taka nŋa à tu. Cɛkũm iyi à leu í mu isɛi aŋa taka nŋa.

¹⁷ Aɔ̃ Lafɛ̃ɛ í jɔ̀ à màa. Nŋui í ya ce iyi í jɛ dee dee. Í ya jɔ̀ inɛ laalɔ ŋa a dasi cɛkũm iyi aŋa taka nŋa à lei. Woo cã jĩnɛi iri ku kɔ̃ ŋau à waa mɔsi. Kusĩmi.

¹⁸ Inɛ laalɔ ŋa aa sindai a koo a ku, aŋa iyi à gbɛjɛ idei Ilaaɔ̃ fei.

¹⁹ Ilu are ŋa à ya nɛ kpãa ku cɔi si Aɔ̃ Lafɛ̃ɛ domi ci ya gbɛjɛ ide nŋa ajɔ kãma.

²⁰ Aɔ̃ Lafɛ̃ɛ, dede, maà jɔ̀ amanɛ ku jɛ igũ. Jɔ̀ inɛi ilɛ ŋau a naa si wajuɛ nɔ i kiiti ŋa.

²¹ Aɔ̃ Lafɛ̃ɛ, jɔ̀ njo ku mu ŋa nɔ a mà iyi aŋa amanɛ ŋai. Kusĩmi.