Iri ku kɔ̃ 89 - Bibeli do fee

Kuwã ŋa iyi ì tako ì cea Davidiu, iwoi à wa

¹ Iriu ihɛ̃ ti Etãa inɛi Ezirai.

² Aɔ̃ Lafɛ̃ɛ, ǹ bi n kɔ̃ irii n maa n fɔ jiida ku jɛɛ ajɔ fei. An maa n fɔ dee dee ku jɛɛi ajɔ fei.

³ Ǹ ni, jiida ku jɛɛ á maa wɛɛi do ajɔ fei. Ì jilɛ dee dee ku jɛɛi ikpa lelei Aɔ̃.

⁴ Ì ni, ǹ dĩ akabuu do Davidi woo ce icɛm. Nŋui ǹ cicau, nɔ ǹ fɔ do kugbasi ǹ ni,

⁵ si anyiɛ, tɔkuɛ ŋai aa ya jɛ bomma waati kãma fei, nɔ n jɔ̀ bommaɛu ku maa nɛ gbugbã si tɔku ikã ikãɛ ŋau fei. Kusĩmi.

⁶ Aɔ̃ Lafɛ̃ɛ, inɛi lelei Aɔ̃ ŋa à waa saabuɛ na icɛ maamaakeɛ ŋa. Nɔ amalekaɛ ŋa mɔ à waa fɔ dee dee ku jɛɛ.

⁷ Yooi í wa lele iyi aa wãò Aɔ̃ Lafɛ̃ɛ. Si inɔi inɛi lele ŋa, yooi aa wãò Aɔ̃ Lafɛ̃ɛ.

⁸ Ilaaɔ̃ í nɛ yiiko nla nla si kutɔtɔɔi amalekaɛ ŋa. Í nɛ zigiida bi inɛ ŋa iyi à waa kaakoɛ fei.

⁹ Aɔ̃ Lafɛ̃ɛi lele do ilɛ, yooi í nɛ gbugbã bɛi awɔ, dee dee ku jɛɛi wa kaakoɛ.

¹⁰ Awɔi ì ya leekĩ faaui tenku. Waati iyi inyiɛ wa tãngãm, awɔi ì ya jɔ̀ ku sũ.

¹¹ Awɔi ì tɛɛsɛ Rahabu bɛi iku. Nɔ ì fangaa mbɛɛɛ ŋa do gbugbãɛ.

¹² Awɔi ì nɛ lele, awɔi ì nɛ ilɛ mɔ. Awɔi ì taka andunya do mii iyi í wa si fei.

¹³ Awɔi ì ce awɔ njɛi kpãai inunu do awɔ cangai kpãai inunu. Iri kutai Tabɔɔ do Hɛɛmɔɔ, à waa saabuɛ.

¹⁴ Ikpaɛ í nɛ gbugbã, nɔ awɔɛ mɔ í nɛ gbugbã. Ì wu awɔ njɛɛ lele.

¹⁵ Dee dee ku jɛ do ntɔi í jɛ icui bommaɛ. Jiida ku jɛ do ntɔi í ya maa cuaɛ.

¹⁶ Aɔ̃ Lafɛ̃ɛ, ilu inɔ didɔ̃ ŋai inɛ ŋa iyi à waa dɔ̃ siɛ anu do inɔ didɔ̃. À ya maa nɛi si didɔ̃ɛ.

¹⁷ Na iriɛ, si inɔ didɔ̃i à ya maa wa ajɔ fei. À ya nɛ bɛɛrɛi na dee dee ku jɛɛ.

¹⁸ Awɔi ì jɛ bɛɛrɛ nŋa do gbugbã nŋa. Na didɔ̃ɛi gbugbã nwa í ya maa kɔ̃ɔsi.

¹⁹ Aɔ̃ Lafɛ̃ɛ, awɔi ì jɛ bɛi tɛli nwa. Awɔ Inɛ Kumái Izirɛliu, awɔi ì jɛ ilaalu nwa.

²⁰ Ajɔ nŋu gɔ, ì ba inɛɛ ŋa ide ku fɔ si kuyɛ, ì ni, ǹ sobi ilu wɔɔkɔ, nɔ ǹ so inɛ iyi ǹ cicau lele hai si inɔ zamaau.

²¹ Ǹ jɔ̀ Davidi í jɛ woo ce icɛm nɔ ǹ nyaa ikã, ǹ tontooa ikpo si iriɛ.

²² Nŋui awɔm á maa mu, nɔ ku maa muaa gbugbã.

²³ Mbɛɛ kaa ba ku zambaɛ, nɔ inɛ laalɔu kaa ba ku kãmiaɛ.

²⁴ An nya fufui mbɛɛɛ ŋai si wajuɛ, nɔ n cã inɛ ŋa iyi à cóo ŋa.

²⁵ Dee dee ku jɛm do jiida ku jɛm aa wɛɛi do nŋu. Nɔ do saabum nii á ba gbugbã.

²⁶ Nŋui an jɔ̀ ku nɛ gbugbã si tenku do ido nla ŋa.

²⁷ Nŋui á tɔɔm ku ni, awɔi ì jɛ baam, awɔi ì jɛ Ilaaɔ̃ Lafɛ̃ɛm. Awɔi ì jɛ kuta ku nɛ gbugbã bii faabam í wa.

²⁸ An jɔ̀ ku jɛ ama yemma, nɔ ku jɛ amanlui amanlu ŋa si ilɛ.

²⁹ An jɔ̀ jiida ku jɛm ku maa wa siɛi, nɔ n dĩ akabuu dim dim do nŋu.

³⁰ Tɔkuɛ ŋai an jɔ̀ a maa jɛ ilaalu do ajɔ fei. Nɔ bommaɛu á maa wɛɛi do ajɔ fei.

³¹ Bii tɔkuɛ ŋa à fũsi woodam ŋa awɔ, nɔ a kù waa nɛ bɛi woodam ŋau wa ni,

³² bii a kù waa jirima ikɔm ŋa, bii a kù waa jirima asaiyam ŋa,

³³ do goloi an kpã ŋa iju si ide ku kɔ̀ nŋa do kurara nŋau.

³⁴ Amma jiida ku jɛm kaa sɛkɛɛ hai bi Davidi, nɔ dee dee ku jɛm kaa jɛ ibo bi tɛɛ.

³⁵ Ǹ kaa n dede si akabuum iyi ǹ dĩ do nŋu, nɔ n kaa n kpaasi ide iyi í fita hai si gɛlɛm.

³⁶ Ǹ fɔi do kugbasi do iri kumám ǹ ni, n kaa n sɔaa Davidi ibo ajɔ kãma.

³⁷ Tɔkuɛ ŋai aa maa jɛ ilaalu do ajɔ fei. Nɔ bommaɛu, á maa wɛɛi bɛi inunu

³⁸ do bɛi cukpa iyi ǹ jilɛ, í jɛ sɛɛda dee dee si kudũi ijĩ do ajɔ fei. Kusĩmi.

³⁹ Ì fɔ bɛɛbɛ, amma ilaalu iyi ì cicau, ì kɔ̀siɛ ì fũsiɛ awɔ. Idɔɔkɔ̃ɛ í naa si nŋu iyi ì tontooa ikpo si iriu.

⁴⁰ Aɔ̃ Lafɛ̃ɛ, ì fũ akabuu iyi ì dĩ do woo ce icɛɛ. Ì nya fulai ilaaluɛ ì nyɔɔ ilɛ ì jɔ̀ í riisi.

⁴¹ Aɔ̃ Lafɛ̃ɛ, ì jɔ̀ bindiɛ ŋau à ce foo bii fei. Inya ku nɛ gbugbãɛ ŋau fei ì jɔ̀ à kpɔò bomma.

⁴² Woo lɔ ŋa à ko mii ndɛɛ ŋa. Í baa í jɛ yaakoi inɛi kɔkɔɛ ŋa.

⁴³ Ì mua mbɛɛɛ ŋa gbugbã, nɔ ì jɔ̀ à nɛ inɔ didɔ̃.

⁴⁴ I kù jɔ̀ taakubaɛ kù ce icɛɛ, nɔ i kù sobiɛ si igũu.

⁴⁵ Ì jɔ̀ bɛɛrɛɛ í tã, nɔ ì kɛkɛ kitãi bommaɛ ilɛ.

⁴⁶ Ì jɔ̀ í gbo do awaasũ, nɔ anyɔ í jɛ titɛɛ. Kusĩmi.

⁴⁷ Aɔ̃ Lafɛ̃ɛ, hee waati yoomai aa maa manji. Hee waati yoomai aa kɔ̀ i maa wɛɛò idɔɔkɔ̃ nla nla.

⁴⁸ Ye gigi iyi kuwɛɛm kù sɔ̀. Inɛ iyi ì taka fei á kui.

⁴⁹ Yooi á yɔkɔ ku wɛɛ iyi kaa ku, walakɔ ku jɔ̀ hundeɛ ku maà bɔ bi kuwai iku ŋa. Kusĩmi.

⁵⁰ Aɔ̃ Lafɛ̃ɛ, iwoi jiida ku jɛi takoɛ ŋa iyi ì sɔ̃ Davidi wo do kugbasi iyi ì ceaa si dee dee ku jɛɛu í wa.

⁵¹ Aɔ̃ Lafɛ̃ɛ, ye gigii arabu iyi woo ce icɛɛ ŋa à waa ba. Ye gigi iyi amui ǹ wa n so asoi zamaa nla nlau bɛ fei.

⁵² Aɔ̃ Lafɛ̃ɛ, ye gigii mbɛɛɛ ŋa iyi à waa buɛ. À waa yaako inɛ iyi ì cica ì tontooa ikpo si iriɛu bii wa bɔ fei.

⁵³ Saabu ku jɛ ti Aɔ̃ Lafɛ̃ɛ do ajɔ fei. Ami, ami.