Iri ku kɔ̃ 88 - Bibeli do fee

Ǹ ce amɛɛ do iku

¹ Iriu ihɛ̃ ti amai Kore ŋai do inɛ ngboi woo kɔ̃ iri ŋa do Hemaa inɛi Ezirau. À ya kɔ̃ɔi do imui inɔ kufɔ.

² Aɔ̃ Lafɛ̃ɛ, awɔ iyi ì jɛ woo faabam, dasã do idũ fei ǹ ya n maa n dɔ̃ siɛ anui.

³ Jɔ̀ i de si kutɔɔm itĩ nɔ i gbɔ anu ku dɔ̃m.

⁴ Aram í gbɛɛji do wahala nɔ kuwɛɛm í ce amɛɛ do iku.

⁵ À waa kam nii si inɔi inɛ ŋa iyi à maai si iku. Ǹ yɛi bɛi inɛ iyi kù nɛ gbugbã kãma má.

⁶ Ǹ wai si inɔi iku ŋa. Ǹ jɔ inɛ ŋa iyi à sũ si balɛ nɔ i kù waa ye gigi nŋa má, ì fũsi ŋa awɔ.

⁷ Ì nyɔm nii hee lɛlɛi isa si ilu kukui iku.

⁸ Idɔɔkɔ̃ɛ wa tɛm nɔ ì biim do inyi nla ŋa. Kusĩmi.

⁹ Ì jɔ̀ inɛ ŋa iyi ǹ mà à jĩòm, ì jɔ̀ ǹ baa ǹ yɛ bɛi mii hai nɛ bɛɛrɛ. Ǹ dasi wahala nɔ n kaa n yɔkɔ n fita.

¹⁰ Ijum í kua gbugbã na wahala. Ajɔ fei ǹ wasi ku kpeɛ Aɔ̃ Lafɛ̃ɛ. Ǹ wu awɔm ŋa wa do ikpa bi tɛɛ.

¹¹ Ǹ ni, iku ŋai aa cea maamaake? Iku ŋau aa yɔkɔ a dede a maa cĩɛ? Kusĩmi.

¹² Aa fɔ idei jiida ku jɛɛ si inɔ balɛ? Aa fɔ idei dee dee ku jɛɛ bi kuwai iku ŋau?

¹³ Si ilu kuku nla nla, inɛ á yɔkɔ ku yɛ maamaakeɛ ŋa? Inɛ á yɔkɔ ku mà dee dee ku jɛɛ bi kuwai iku ŋa tengi bii i ci ya ye gigiɛ má?

¹⁴ Aɔ̃ Lafɛ̃ɛ, awɔi amu ǹ tɔɔ faaba. Daakɔ fei, ǹ ya n tɔɔɛi.

¹⁵ Aɔ̃ Lafɛ̃ɛ, na mii í jɔ̀ ì kɔ̀sim, na mii í jɔ̀ ì singaam wajuɛ.

¹⁶ Hai awaasũm, ilu are do hai nɛ gbugbãi ǹ jɛ. Ǹ biti na wahala iyi ì jɔ̀ ǹ wa si.

¹⁷ Inai idɔɔkɔ̃ɛ í cuku sim wa, nɔ zigiida í dasim ku coko.

¹⁸ Ajɔ fei si zigiidai ǹ ya n maa n wa, nɔ í ya mim nii bɛi inɛ iyi í dasi inyi.

¹⁹ Aɔ̃ Lafɛ̃ɛ, ì jɔ̀ kpaasim ŋa do baakɔɔm ŋa à jĩim. Ilu kuku nŋu akãi í wɛɛ do amu.