Iri ku kɔ̃ 86 - Bibeli do fee

Si inɔ kufɔm, awɔi ǹ kpe

1 Kutɔɔi Davidi.

¹ Kutɔɔi Davidi. Aɔ̃ Lafɛ̃ɛ, sotĩ i gbɔ nɔ i jɛɛm, domi ǹ jɛ ilu are nɔ ǹ jɛ hai nɛ gbugbã.

² Mu hundem, domi amu inɛɛi. Ilaaɔ̃, faabam amu woo ce icɛɛ, siɛi naanɛm í wa.

³ Ceem didɔ̃ Lafɛ̃ɛ, domi ajɔ fei ǹ ya n maa n dɔ̃ siɛ anui.

⁴ Aɔ̃ Lafɛ̃ɛ, Bi titɛɛi ǹ sinda wa. Amu woo ce icɛɛ, jɔ̀ n nɛ inɔ didɔ̃. Ǹ wa n tɔɔɛi, muum inɔ didɔ̃.

⁵ Awɔ Aɔ̃ Lafɛ̃ɛ ì jɛ inɛ jiida do ilu suuru. Jiida ku jɛɛ í la í caa bi inɛ ŋa iyi à waa kpeɛ.

⁶ Aɔ̃ Lafɛ̃ɛ, de itĩ si kutɔɔm, nɔ i gbɔ kukpatam.

⁷ Waati iyi ǹ wa si inɔ kufɔ, ǹ ya n kpeɛi, domi ì ya jɛɛm.

⁸ Aɔ̃ Lafɛ̃ɛ, iwɛ̃ kãma kù wɛɛ iyi í yɛ bɛi awɔ, nɔ iwɛ̃ kãma kaa yɔkɔ ku ce mii iyi ì ce.

⁹ Dimi ŋa iyi ì taka fei aa naa a sɛɛbatai si wajuɛ, nɔ a maa naɛ bɛɛrɛ.

¹⁰ Ntɔ ntɔ, awɔ akãi ì jɛ Ilaaɔ̃ iyi í la, nɔ awɔi ì ya ce maamaake ŋa.

¹¹ Aɔ̃ Lafɛ̃ɛ, jɔ̀ n mà idɔɔbiɛ, nɔ n maa n nɛ si ntɔɛ. Lasabui mii akã ku dɛdɛ iyi ǹ bi i daam si idɔi í jɛ n mà bɛɛrɛɛ.

¹² Ilaaɔ̃ Lafɛ̃ɛm, an maa n cĩɛi do idɔm fei, nɔ n maa n naɛ bɛɛrɛ do ajɔ fei.

¹³ Jiida ku jɛɛ í la bi tom. Awɔi ì nya hundem wa hai si anui iku.

¹⁴ Ilaaɔ̃, ilu faau ŋa à dede sim wa. Woo taa inɛ ŋa gbugbã ŋa à waa dɛ ku kpam. Lasabu nŋa kù wa siɛ mɔm.

¹⁵ Aɔ̃ Lafɛ̃ɛ, awɔi ì jɛ ilu araare nɔ ì ya cea inɛ didɔ̃. Idɔɛ ci ya saasa ku kɔ̃ amma jiida ku jɛɛ do dee dee ku jɛɛ í la.

¹⁶ Cɔm do iju jiida, nɔ i ceem didɔ̃. Mua amu woo ce icɛɛ gbugbã. Titɛɛi ǹ jɛ, faabam.

¹⁷ Ce ngɔgɔ iyi á jɔ̀ n yɛ jiida ku jɛɛ ku ba inɛ ŋa iyi à cém ŋa a yɔɔ nɔ anyɔ ku mu ŋa, domi awɔ Aɔ̃ Lafɛ̃ɛi ì faabam nɔ ì tũ idɔm.