Iri ku kɔ̃ 85 - Bibeli do fee

Aɔ̃ Lafɛ̃ɛ wa fɔ idei laakai ku sũ

¹ Iriu ihɛ̃ ti inɛ ngboi woo kɔ̃ iri ŋai do amai Kore ŋa.

² Aɔ̃ Lafɛ̃ɛ, ì nyisi ilɛɛ kubiɛ. Ì jɔ̀ inɛi Zakɔbu ŋa à baa à na à buba si ilɛ nŋa má.

³ Awɔi ì nya kurarai inɛɛ ŋa, nɔ ì ce nŋa suurui dulum du ŋa fei. Kusĩmi.

⁴ Ì jɔ̀ idɔɔkɔ̃ɛ í sũ sɛ̃ɛ. Ì jɔ̀ idɔɔkɔ̃ nla nla ku ceɛ si gãmɛ nwa.

⁵ Gba wa, Aɔ̃ Lafɛ̃ɛ woo faaba nwa. Jɔ̀ i leekĩ idɔɔkɔ̃ ku ce do awa.

⁶ Aa maa wɛɛò idɔɔkɔ̃ do awai ajɔ fei? Idɔɔkɔ̃ɛu á maa wɛɛi hee do si tɔku nwa ŋa fei?

⁷ Awɔi aa jɔ̀ ka ba kuwɛɛ má, ku ba awa inɛɛ ŋa ka wɛɛò inɔ didɔ̃ siɛ.

⁸ Aɔ̃ Lafɛ̃ɛ, jɔ̀ ka yɛ jiida ku jɛɛ, nɔ i faaba wa.

⁹ An sotĩ n gbɔ ide iyi Aɔ̃ Lafɛ̃ɛ wa fɔ, domi idei laakai ku sũi í ya sɔ̃ inɛɛ ŋa aŋa iyi à dasiɛ naanɛ ku ba a maà na a nyi si icɛi sũmu nŋa ku ce.

¹⁰ Ntɔ ntɔ, faabaɛ í wa kɔkɔi inɛ ŋa iyi à mà bɛɛrɛɛ, nɔ iyi bɛi á jɔ̀ amboeɛ ku maa wa si ilɛ nwa.

¹¹ Jiida ku jɛ do ntɔ à waa too njɛi. Dee dee ku jɛ do laakai ku sũ à sakoo njɛ.

¹² Ntɔ wa fita wa hai ilɛ bɛi dimi iyi à gbɛ̃, dee dee ku jɛ mɔ wa naai hai lele.

¹³ Aɔ̃ Lafɛ̃ɛ mɔi á ce nwa didɔ̃, nɔ ilɛ nwa ku ce amaajɛ.

¹⁴ Dee dee ku jɛi á maa cuaa Aɔ̃ Lafɛ̃ɛ, nɔ nŋui á teeseaa kpãaɛ.