Iri ku kɔ̃ 84 - Bibeli do fee

Irii jingau iyi à kɔ̃ waati iyi à to Zeruzalɛmu

¹ Iriu ihɛ̃ ti inɛ ngboi woo kɔ̃ iri ŋai do amai Kore ŋa. À ya kɔ̃ɔi do mɔɔlɔ.

² Aɔ̃ Lafɛ̃ɛi lele do ilɛ, kubii kpasɛ̃ɛ wa mum jiida jiida.

³ Ǹ wa n saasa ntɔ ntɔ n ba n lɔ si bantumai kpasɛ̃ɛu. Idɔm do aram fei, à waa dɔ̃ anui do inɔ didɔ̃ na irii Ilaaɔ̃, nŋu iyi í wɛɛ.

⁴ Aɔ̃ Lafɛ̃ɛi lele do ilɛ, awɔ iyi ì jɛ ilaalum do Lafɛ̃ɛm, baa tiitii ŋa do kufeegala ŋa fei à ya ce antɛ bii ama nŋa ŋa aa wa si idĩi kpasɛ̃ɛ kɔkɔi bi kuweeɛ ŋau.

⁵ Ilu inɔ didɔ̃ ŋai inɛ ŋa iyi à wa si kpasɛ̃ɛ. Aa maa cĩɛ do ajɔ fei. Kusĩmi.

⁶ Ilu inɔ didɔ̃ ŋai inɛ ŋa iyi gbugbã nŋa bi tɛɛi í wa, nɔ à dasi idɔ a naa bi tɛɛ.

⁷ Waati iyi à waa lɔ si lɔɔmai Baka fei, ì ya jɔ̀ ku kpaasii bɛi inya iyi í nɛ mandi nɔ ijĩi jɛadɔ̃ í ya biiɛi fei do kuwee ŋa.

⁸ Gbugbã nŋa í ya maa kɔ̃ɔsii bɛi à waa nɛ fei, ku ba a to a koo a leekĩ Siɔ̃ɔ si wajui Ilaaɔ̃.

⁹ Aɔ̃ Lafɛ̃ɛi lele do ilɛ, gbɔ kutɔɔm. De sim itĩ Ilaaɔ̃ Lafɛ̃ɛi Zakɔbu. Kusĩmi.

¹⁰ Ilaaɔ̃, cɔ, awɔi ì jɛ bɛi tɛli nwa. Jɔ̀ i gba inɛ iyi ì cicau.

¹¹ Ajɔ akã iyi aa ka ce si bantumaɛ, í re ajɔ dubu iyi aa ka ce inya mmu. Amu, ǹ cica n koo n wa andɛ kpasɛ̃i Aɔ̃ Lafɛ̃ɛ do iyi an koo n wa si kpasɛ̃i ilu inɔ kukã,

¹² domi Aɔ̃ Lafɛ̃ɛ í yɛi bɛi inunu do tɛli. Aɔ̃ Lafɛ̃ɛi í ya mua inɛ didɔ̃ do bɛɛrɛ. Ci ya kɔ̀a inɛ ŋa iyi à waa ce isɛɛnɛ si dee dee ku jɛ didɔ̃ɛ.

¹³ Aɔ̃ Lafɛ̃ɛi lele do ilɛ, ilu inɔ didɔ̃i inɛ iyi naanɛɛ fei í wa siɛ.