Iri ku kɔ̃ 83 - Bibeli do fee

Kutɔɔi inɛi Ilaaɔ̃ ŋa iyi inɛi kɔkɔ nŋa ŋa à waa kpã iju

¹ Iriu ihɛ̃ ti Azafui.

² Ilaaɔ̃, maà coko, maà wɛɛ sɛ̃ɛ iyi i kù fɔ ide,

³ domi wee mbɛɛɛ ŋa à dede. Inɛ ŋa iyi à céɛ ŋa à wu iri lele.

⁴ Inɛ ŋau à waa dĩ sɔɔlui zamba na inɛɛ ŋa. À waa busi njɛ ku ba a cea inɛ ŋa iyi ì waa degbeu laalɔ.

⁵ À waa ni, i naa wa ŋa kaa kpa irii dimiu, nɔ a maà ye gigii irii Izirɛli má.

⁶ À koo à yɛ njɛ aŋa fei, nɔ à ce anu akã na iriɛ.

⁷ Inɛ ŋau inɛi Edɔmu ŋai do inɛi Isimaɛli ŋa do inɛi Moabu ŋa do inɛi Agaa ŋa,

⁸ do inɛi Geba ŋa do inɛi Amɔɔ ŋa do inɛi Amalɛki ŋa do inɛi Filisi ŋa do inɛi ilui Tii ŋa.

⁹ Inɛi Asiri ŋa mɔ à tɔtɔɔ do ŋa ku ba a sobi amai Lɔtu ŋa. Kusĩmi.

¹⁰ Ce nŋa bɛi ì cea inɛi Madiãa ŋa, do bɛi ì cea Sisera do Yabɛ̃ɛ iyi à kpa si acãi inyii Kisɔ̃ɔu.

¹¹ À ce nfe nŋai si ilui Eni-Dɔɔ. Bɛi à sãmi à ce taasi si ilɛ.

¹² Cea inɛ ngbo nŋa ŋau bɛi ì cea Ɔrɛbu do Zeebu, nɔ i cea ilaalu nŋa ŋau fei bɛi ì cea Zeba do Salumuna,

¹³ aŋa iyi à waa ni, kaa gba inyai Ilaaɔ̃ ŋau.

¹⁴ Ilaaɔ̃ Lafɛ̃ɛm, jɔ̀ a yɛ bɛi ngboi jĩi gɔ iyi fufu dabii í so wa nɛò, do bɛi fɔfɔ iyi fufu í so wa nɛò.

¹⁵ Bɛi ina í ya jo agbo, do bɛi amɛi ina í ya dede ku bii iri kuta ŋa,

¹⁶ do yaase bɛɛbɛ, lele ŋa do fufuɛ. Jɔ̀ zigi nŋa ku da na fufu nlaɛ.

¹⁷ Aɔ̃ Lafɛ̃ɛ, jɔ̀ anyɔ ku bii ŋa, ku ba a sinda wa bi tɛɛ.

¹⁸ Jɔ̀ a dasi anyɔ do zigiida hee do ajɔ fei. Jɔ̀ a nyiò anyi nɔ a ce nfe.

¹⁹ Jɔ̀ a mà iyi awɔ akãi ì jɛ Aɔ̃ Lafɛ̃ɛ iyi í wa lele si ilɛu fei.