Iri ku kɔ̃ 80 - Bibeli do fee

Woo degbei inɛi Izirɛli ŋa, gbɔ kutɔɔm

¹ Iriu ihɛ̃ ti inɛ ngboi woo kɔ̃ iri ŋai do Azafu. À ya kɔ̃ɔi do mɔɔlɔ. Iriu ti gigi ku yei.

² Awɔ woo degbei awa inɛi Izirɛli ŋa, sotĩ i gbɔ. Awɔ iyi ì waa gbã awa tɔkui Zozɛfu ŋa bɛi mɛɛmu gaa ŋa, nɔ bommaɛ í wa do lelei serubɛ̃ɛ ŋau, nyisi yiikoɛ.

³ Nyisi awa iyi à jɛ dimii Efaraimu do Bɛnzamɛɛ do Manasee ŋa gbugbãɛ, nɔ i faaba wa.

⁴ Aɔ̃ Lafɛ̃ɛ, jɔ̀ ka jɛ dimi nla nla bɛi tako má. Gba wa do inɔ akã nɔ ka ba faaba.

⁵ Aɔ̃ Lafɛ̃ɛi lele do ilɛ, hee waati yoomai aa maa wɛɛò idɔɔkɔ̃ i kɔ̀ ku gbɔ kutɔɔi inɛɛ ŋa.

⁶ Ì jɔ̀ inɔ kufɔ í jɛ sɔnda nŋa. Ì jɔ̀ inyii iju nŋa í caa hee í baa í jɛ bɛi inyi ku mɔ nŋa.

⁷ Ì jɔ̀ inɛi kɔkɔ nwa ŋa à waa ja na iri nwa. Nɔ mbɛɛ nwa ŋa à waa yaako wa.

⁸ Ilaaɔ̃ Lafɛ̃ɛi lele do ilɛ, gba wa do inɔ akã nɔ ka ba faaba.

⁹ Hai Ezibitii ì tu jĩi ndii rezɛ̃ɛu wa. Ì lele dimi mmu ŋa hai si inya nŋa ì bɛi ì lɔɔ.

¹⁰ Ì ceaa inya jiida ntɔ ntɔ. Icãɛ í mi ilɛ nɔ í la í gba ilɛu fei.

¹¹ Jĩjĩɛ í bii iri kuta ŋa. Nɔ amaawɔɛ ŋa à yɛ bɛi jĩi nla iyi à ya kpe sɛɛdi.

¹² Amaawɔɛ ŋau à bɔi hee si tenku, nɔ icãɛ ŋa mɔ à bɔi hee si ido nla.

¹³ Na mii í jɔ̀ ì ce foo ŋa si dangaɛu. Do yaase bɛɛbɛ, ì jɔ̀ woo lɔ ŋa à ya maa ka isoɛ ŋau.

¹⁴ Imà do mɛɛmu mmu gɔ ŋa si inɔ sako à waa bɛjɛɛ à waa jɔɔ.

¹⁵ Ilaaɔ̃ Lafɛ̃ɛi lele do ilɛ, nyi wa. Hai lele teese i cɔ jĩi ndii rezɛ̃ɛu do iju, nɔ i dasi baa na didɔ̃i jĩi nɔu.

¹⁶ Jɔ̀ i gbɔa jĩi iyi awɔ takaɛ ì lɔ. Nŋui í jɛ bɛi amai awɔ takaɛ iyi ì jɔ̀ í dede í la.

¹⁷ Inɛ ŋa à da jĩi nɔu à joo. Kpã ŋa iju nɔ i ce nfe nŋa.

¹⁸ Jɔ̀ awɔɛ ku wa si inɛ iyi í wa awɔ njɛɛ, inɛ iyi awɔ takaɛ ì mua gbugbãu.

¹⁹ Awa a kaa ka jĩòɛ má. Jɔ̀ ka ba kuwɛɛ ku ba ka maa kpe iriɛ.

²⁰ Aɔ̃ Lafɛ̃ɛi lele do ilɛ, gba wa do inɔ akã nɔ ka ba faaba.