Iri ku kɔ̃ 79 - Bibeli do fee

Naa i sobi wa, awa à cukui hee ilɛ

1 Iriu ihɛ̃ ti Azafui.

¹ Iriu ihɛ̃ ti Azafui. Ilaaɔ̃, isɛ mmu ŋa à gba ilɛɛu. À jɔ̀ kpasɛ̃ kumáɛu í riisi. À jɔ̀ Zeruzalɛmu í kpɔò bomma.

² À so ikui woo ce icɛɛ ŋa à na yɛi ŋa à jɛ. Iŋai arai inɛɛ ŋau, mɛɛmui sako ŋai à na.

³ Inɛ ŋa à nikã njɛi inɛ ŋai bɛi inyi bii fei si ilui Zeruzalɛmu, nɔ inɛ gɔ kù sì iku nŋa.

⁴ Awai à baa à jɛ iri ankitãi inɛi kɔkɔ nwa ŋa. À jɛ yaako do dɔ̃anyii inɛ ŋa iyi à waa kaako wa ŋa.

⁵ Aɔ̃ Lafɛ̃ɛ, hee waati yoomai aa maa mɔsi idɔɔkɔ̃ɛ do awa, hee waati yoomai aa jɔ̀ iguɛu ku maa jo bɛi ina.

⁶ Jɔ̀ idɔɔkɔ̃ɛ ku cuku si dimi ŋa iyi a kù màɛu, do si bomma ŋa iyi a kù waa kpe iriɛu.

⁷ Ntɔ ntɔ aŋai à kãmia tɔkui Zakɔbu ŋa nɔ à bɛjɛ ilɛ nŋa.

⁸ Maà ye gigii kurarai tako nwa ŋau. Jɔ̀ i ce araare nwa i naa i faaba wa gbãa gbãa, domi à kua gbugbã ntɔ ntɔ.

⁹ Ilaaɔ̃ woo faaba nwa, faaba wa, na bɛɛrɛɛ. Nya wa, nɔ i kpa idei dulum du wa na iriɛ.

¹⁰ Na mii í ce aa jɔ̀ inɛi ilɛ ŋa à maa ni iwoi awɔ Ilaaɔ̃ Lafɛ̃ɛ nwa ì wa. Jɔ̀ i sãa woo ce icɛɛ ŋa iyi à nikã njɛ nŋau gbese si iju nwa ka yɔɔ.

¹¹ Jɔ̀ i gbɔ weeweai inɛi ile piisɔ̃ɔ ŋau. Do gbugbãɛ, faaba inɛ ŋa iyi à wa si anui ikuu.

¹² Inɛ ŋa iyi à kaako wa à waa yaakoɛu, sã nŋa mii iyi à ceɛu tuuba mɛɛje.

¹³ Amma, awa inɛɛ ŋa iyi à jɛ bɛi mɛɛmu gaa iyi ì waa degbe, aa ka maa cĩɛi ajɔ fei. Awa inɛɛ ŋa, aa ka maa cĩɛi hee ku koo si tɔku do tɔku nwa ŋa fei.