Iri ku kɔ̃ 77 - Bibeli do fee

Si inɔ kufɔi ǹ ye gigii maamaakei takoɛ ŋau

¹ Iriu ihɛ̃ ti inɛ ngboi woo kɔ̃ iri ŋai do Yedutunu do Azafu.

² Ǹ dɔ̃ anu hee lele si Ilaaɔ̃. Si Ilaaɔ̃i ǹ wa n dɔ̃ anu á nɔ ku gbɔɔm.

³ Waati iyi ǹ wa si inɔ kufɔ, ǹ ya n dɛdɛ Aɔ̃ Lafɛ̃ɛi. Idũ ǹ ya n to awɔm bi tɛɛi nɔ n ci ya n gbɛɛji. Ǹ ya n kɔ̀ ku gbɔ kulɛlɛ.

⁴ Hai ǹ ye gigii Ilaaɔ̃ gbakã, ǹ ya n maa n kakaai, bii ǹ lasabu, hundem í ya kua gbugbãi. Kusĩmi.

⁵ Ilaaɔ̃, i ci ya jɔ̀ n sĩ njoo, ǹ biti, nɔ n kù mà baa ide iyi an fɔ.

⁶ Ǹ wa n lasabui si ajɔi tako ŋau do adɔ̃i hai ku kpɛ ŋau.

⁷ Ǹ ye gigii irim ŋa idũ. Ǹ wa n lasabu si idɔm, nɔ hundem wa bam ide ku fɔ wa ni,

⁸ Aɔ̃ Lafɛ̃ɛ á kɔ̀si wai do ajɔ fei? Kaa gba wa má?

⁹ Jiida ku jɛɛ í kpa iri mbɛ do ajɔ fei? Ide kãma gɔ kù wɛɛ iyi á sɔ̃ wa bɛ má?

¹⁰ Ilaaɔ̃ í gbɛjɛ didɔ̃ ku ce nwai? Si idɔɔkɔ̃ɛ, kù nɛ araare nwa mái? Kusĩmi.

¹¹ Ŋɔi ǹ fɔ si inɔm ǹ ni, iyi í to sim nii í jɛ iyi Ilaaɔ̃ iyi í wa leleu kù waa ce nwa bɛi tako má.

¹² Aɔ̃ Lafɛ̃ɛ, an maa n ye gigii icɛɛ ŋai. Ntɔ ntɔ an maa n fɔ maamaakei takoɛ iyi ì ceui.

¹³ An maa n cɔ mii ŋa iyi ì ce ŋaui, nɔ n maa n lasabu si maamaake nlaɛ ŋa.

¹⁴ Ilaaɔ̃, kpãaɛ í mái. Iwɛ̃ yoomai í la bɛi awɔ.

¹⁵ Awɔi ì jɛ Ilaaɔ̃ iyi í ya ce maamaake. Ì jɔ̀ inɛi andunya ŋa à mà gbugbãɛ.

¹⁶ Do gbugbãi ì yaò inɛɛ ŋa, tɔkui Zakɔbu do Zozɛfu ŋa. Kusĩmi.

¹⁷ Ilaaɔ̃, inyi ŋa à yɛɛ, inyi ŋa à yɛɛ nɔ à fɔtɔtɔ. Ntɔ ntɔ, inyi nla ŋa à yaya.

¹⁸ Inyi wa nikã wa hai si kudũi ijĩ ŋau. Lele wa ce iba. Ntɔ ntɔ, afaɛ ŋa à fo à waa nɛi bii fei.

¹⁹ Si ibai kulai ijĩɛ si fufu nlau, kuŋɔi ijĩ ŋau à má inyai si andunya, nɔ ilɛ í yaya nla nla.

²⁰ Ì waa nɛ si inɔ tenku. Si inɔ inyi nlaui ì ce kpãaɛ. Nɔ inɛ gɔ kù waa yɛ tuubaɛ ŋa.

²¹ Moizi do Arɔ̃ɔi ì jɔ̀ à gbã inɛɛ ŋa wa bɛi mɛɛmu gaa ŋa.