Iri ku kɔ̃ 76 - Bibeli do fee

Siɔ̃ɔi Ilaaɔ̃ í leekĩ igũu

¹ Iriu ihɛ̃ ti inɛ ngboi woo kɔ̃ iri ŋai do Azafu. À ya kɔ̃ɔi do mɔɔlɔ.

² Inɛ ŋa à mà Ilaaɔ̃ si ilɛi Zudaa, nɔ iriɛ í nɛ bɛɛrɛ si ilɛi Izirɛli.

³ Ilei acɔɛ Salɛmui í wa. Bi kuwaɛ mɔ Siɔ̃ɔ.

⁴ Bɛi í lɛgɛ jĩnɛi igũ ŋau, hai afa ŋa, do tɛli ŋa, do taakuba ŋa. Kusĩmi.

⁵ Ilaaɔ̃, ì nɛ amboei do yiiko nɔ ì re iri kuta ŋa iyi à wɛɛ hai ku kpɛ.

⁶ À jɛ sooge ilu wɔɔkɔ ŋau igũ à ko jĩnɛ nŋa ŋa nɔ à kpa ŋa. Inɛ ŋau a kù yɔkɔ a kù kɔ̀ò ara nŋa.

⁷ Ilaaɔ̃ Lafɛ̃ɛi Zakɔbu, waati iyi ijuukpãɛu í dede, masa ŋau do acĩ nŋa ŋau fei à kua gbugbãi.

⁸ Awɔi ì jɛ inɛ iyi í to a ce njoɛ, yooi á yɔkɔ ku leekĩ si wajuɛ si waatii idɔɔkɔ̃ɛ.

⁹ Hai lelei Aɔ̃i ì fɔ idei kiitiɛ wa, nɔ zigii inɛi andunya ŋa í da à mu ara nŋa sɛ̃ɛ.

¹⁰ Ì dede ì waa ce kiitiɛi ku ba i faaba inɛ ŋa iyi à kaye ara nŋa. Kusĩmi.

¹¹ Baa bii amanɛ ŋa à wɛɛò idɔɔkɔ̃, bi tɛɛ iri ku kɔ̃i saabui á jɛ. Nɔ inɛ ŋa iyi à kɔ̀ à wɛɛò idɔɔkɔ̃u, jĩnɛi inɔ kufɔi ikui aa dasi.

¹² I cea Aɔ̃ Lafɛ̃ɛ nŋɛ kuwã nɔ i kɔ̃ɔ ŋa. Iŋɛ iyi ì kaako Aɔ̃ Lafɛ̃ɛ iyi í to a ce njoɛ, i naa amua nŋɛ ŋa wa ŋa.

¹³ Nŋui í ya leekĩ faaui inɛ ngbo ŋa, nɔ ilaalui ilɛ ŋa fei à waa ce njoɛ.