Iri ku kɔ̃ 75 - Bibeli do fee

Ilaaɔ̃i í jɛ woo kiiti

¹ Iriu ihɛ̃ ti inɛ ngboi woo kɔ̃ iri ŋai do Azafu. À ya kɔ̃ɔi do imu iyi wa ni, maà jɔ̀ ku ce nfe.

² Ilaaɔ̃, à waa saabuɛ, à waa saabuɛ. Iriɛ í wa si gɛlɛ nwa, nɔ à waa sisi icɛ jiidaɛ ŋa.

³ Ilaaɔ̃, awɔi ì ni bii awaati iyi ì jilɛu í to, aa kiiti inɛ ŋa si ntɔ.

⁴ Ilɛ á yɔi do inɛ ŋa iyi à wa si fei. Amma awɔi ì ni ì waa mu icuɛ ŋau do gbugbãɛ. Kusĩmi.

⁵ Awɔi ì sɔ̃ inɛ ŋa iyi à waa tɔɔ fufu ì ni a maà tɔɔ fufu má. Nɔ inɛ laalɔ ŋa mɔ, a maà so ara nŋa lele má.

⁶ Ì ni ara ku so lele nŋau í to bɛɛbɛ, a jɔ̀ idei faau nŋa ŋau.

⁷ Kù jɛ hai nunui daakɔ, walakɔ nunui alɛ, walakɔ hai gbaai ara ku so lele wa naa,

⁸ domi Ilaaɔ̃i í jɛ woo kiiti, nŋui í ya kaye inɛ gɔ ŋa nɔ ku dede inɛ gɔ ŋa.

⁹ Aɔ̃ Lafɛ̃ɛ wa mu kɔɔfu gɔ si awɔɛ. Atɛ̃ kukã ku nɛ gbugbã gɔi í wa si. Wa nikãɛ wa si ilu inɔ kukãi ilɛ ŋa, nɔ aa mɔɔi fei mam mam do zibitaɛ.

¹⁰ Amu, an maa n fɔi hai nɛ kɔɔ, nɔ an maa n kɔ̃a Ilaaɔ̃ Lafɛ̃ɛi Zakɔbu irii do bɛɛrɛ.

¹¹ Nŋu iyi í ni, an kɛkɛ ara ku so lelei inɛ laalɔ ŋa, si bɛɛbɛi inɛ dee dee ŋa aa dede.