Iri ku kɔ̃ 73 - Bibeli do fee

IKƆ̃ MƐƐTASIAI TIAU ( Iri ku kɔ̃ 73-89 ) Waati iyi í jɔ bɛi mii fei wa cea ilu inɔ kukã ŋa

1 Iriu ihɛ̃ ti Azafui.

¹ Iriu ihɛ̃ ti Azafui. Ntɔ ntɔ, Ilaaɔ̃ í jɛ jiida bi inɛi Izirɛli ŋa. Í jɛ jiida bi inɛ ŋa iyi idɔ nŋa í má.

² Keekei í gbe wo n yɔɔgɔ, nɔ keekei í gbe wo n cuku,

³ domi ǹ wa n ce igu do ilu faau ŋa waati iyi ǹ yɛ aŋa ilu inɔ kukã ŋa à waa bɔ waju.

⁴ Nkãma ci ya bitandi ŋa hee a koo a ku, nɔ ara nŋa í ya maa nɛ baanii.

⁵ A ci ya ba wahala kãma gɔ si kuwɛɛ nŋa, nɔ ijuukpã iyi wa ba inɛ ŋa iyi à gbe ci ya ba ŋa.

⁶ Sabai faaui à dasi si kɔ̃ɔ. Gbugbã ku taa inɛi í jɛ jĩnɛ ku dasi nŋa.

⁷ Iju nŋa fei si laalɔi í ya wa. Binɛi laalɔ ku cei í ya wa si idɔ nŋa.

⁸ À ya maa nyaanyi inɛ ŋai, a maa fɔ idei gbugbã ku taa inɛ do inɔ kukã. À ya maa fɔ idei do faau.

⁹ À ya la gɛlɛ nŋai a maa bu Ilaaɔ̃, nɔ amɛ nŋa ci ya dale nkãma si ilɛ.

¹⁰ Na ŋɔi í jɔ̀ inɛ fei í sinda do bi tu ŋa nɔ à koo à waa mɔ ide nŋa bɛi inyi.

¹¹ À ya fɔi a maa ni, bɛirei Ilaaɔ̃ á ce ku mà. Nŋu iyi í wa hee lele, kù nɛ kumà.

¹² Do yaase bɛɛbɛi ilu inɔ kukã ŋa à ya maa kɔ̃ɔsiò amani nŋa kpɛlɛ kpɛlɛ.

¹³ Debɛi si ngbɛi ǹ mu aram si dee dee ku jɛ, nɔ ǹ wiɛ awɔm ŋa ǹ nyisiò iyi ǹ jɛ dee dee.

¹⁴ Ajɔ fei à ya maa cãm nii, nɔ daakɔ fei ijuukpã í ya maa degbem nii.

¹⁵ Bii í jɛ ǹ ni an fɔ idei bɛi aŋa, inɛ bɛ wa nyisi iyi ǹ wa n zamba amaɛ ŋai.

¹⁶ Ǹ ce lasabu n ba n gbɔ yaaseɛ, amma ǹ yɛ iyi í gaabum í caa.

¹⁷ Ilaaɔ̃, waati iyi ǹ to wa si kpasɛ̃ɛ, waati bɛɛbɛi n mà mii iyi wa degbe ilu inɔ kukã ŋau.

¹⁸ Ntɔ ntɔ, ì ya dasi ŋa si kpãa iyi í nɛ yɔɔgɔi, i jɔ̀ a koo a dasi wahala nla nla.

¹⁹ À ce nfei anu akã. Kuwɛɛ nŋa í to kɔɔ. Zigiida í ce nfe nŋai anu akã.

²⁰ Aɔ̃ Lafɛ̃ɛ, waati iyi ì dede, ì kpa iri nŋai, nɔ à gbɛjɛ ide nŋa bɛi ala iyi inɛ í ce í bɛi í jĩ.

²¹ Waati iyi ǹ wa si inɔ kufɔ ntɔ ntɔ, ǹ gbɔ ara kuroi hee si bũum,

²² ǹ ce nnyɛi, n kù mà nkãma. Bi titɛɛ, ǹ yɛi bɛi mɛɛmu.

²³ Do nŋu fei, ǹ wɛɛi do awɔ waati kãma fei, nɔ ì waa mu awɔ njɛm.

²⁴ Ì waa gbãm nii si yaase bɛi ì bi, si anyiɛ aa gbam nii do bɛɛrɛ.

²⁵ Inɛ mmu yoomai ǹ nɛ lelei Aɔ̃. Baai awɔ baasi, n kù nɛ kɔdɛɛi nkãma si ilɛu ihɛ̃.

²⁶ Aram do lasabum fei á yɔkɔ ku gbɛɛji, amma Ilaaɔ̃i á maa sobim. Nŋui í jɛ ikpɛ̃m hee do ajɔ fei.

²⁷ Inɛ ŋa iyi à jĩɛ à ya ce nfei. Inɛ ŋa iyi à kɔ̀siɛ fei, ì ya ce nfe nŋai.

²⁸ Bii ǹ sɛkɛɛ si Aɔ̃ Lafɛ̃ɛ wa, nŋui á jɛɛm jiida. Aɔ̃ Lafɛ̃ɛi ǹ cica ku jɛ bi ku manjim ku ba n sisi icɛ ŋa iyi í ce.