Iri ku kɔ̃ 72 - Bibeli do fee

Kutɔɔ ku ba Ilaaɔ̃ ku weea ilaalu

1 Iriu ihɛ̃ ti Salomɔɔi.

¹ Iriu ihɛ̃ ti Salomɔɔi. Ilaaɔ̃, muaa ilaaluu bisi iyi á ya ceò kiiti ŋa. Jɔ̀ dee dee ku jɛɛ ku wa siɛ,

² nɔ ku ya kiiti inɛɛ ŋa si ntɔ, hai nɛ gbugbã ŋa mɔ si dee dee ku jɛ.

³ Jɔ̀ iri kuta ŋa a naaò laakai ku sũ wa. Nɔ geete ŋa mɔ, a naaò dee dee ku jɛ wa.

⁴ Jɔ̀ ilaalu ku kɔ̀ò ilu arei zamaaɛ ŋa, nɔ ku faaba hai nɛ gbugbã ŋa. Jɔ̀ ku tɛɛsɛ woo taa inɛ ŋa gbugbãu.

⁵ Bɛi inunu do cukpa à ya maa fita, jɔ̀ ilaalu ku maa wɛɛ bɛɛbɛ hee do ajɔ fei.

⁶ Jɔ̀ ku yɛ bɛi ijĩ iyi wa wɔ si iko ŋa, do bɛi ijĩ iyi wa cɔ̀ ilɛ.

⁷ Si bommaɛ, jɔ̀ ntɔ ku maa kɔ̃ɔsi, nɔ amani ku maa wɛɛ si awaati iyi cukpa í wɛɛ fei.

⁸ Jɔ̀ ku maa jɛ inɛ ngbo si tenku do tenku ŋa. Hai si ido nla ŋa hee ku bɔ si kɔɔi ilɛ ŋa fei.

⁹ Inɛ ŋa iyi à wa si gbaa ŋau aa naa a gulɛi si wajuɛ, nɔ mbɛɛɛ ŋa aa maa ya ilùlù.

¹⁰ Ilaalui Taasi do ilaalui ilɛ jĩijĩ ŋau aa naa amua ŋa wa. Ilaalui Saba do ilaalui Seba ŋau mɔ aa naa baa nŋa wa.

¹¹ Ilaalu ŋau fei aa sɛɛbatai si wajuɛ, nɔ dimi ŋau fei aa sũa iri ilɛi,

¹² domi nŋui á faaba ilu are iyi wa dɔ̃ anu, do hai nɛ gbugbã iyi kù nɛ inɛ iyi á sobiɛ.

¹³ Á nɛ araarei ilu are do hai nɛ gbugbã. Nŋui á faaba ŋa.

¹⁴ Nŋui á nya ŋa hai si awɔi ilu inɔ kukã ŋa do hai si awɔi woo taa inɛ ŋa gbugbã ŋa, domi bi tɛɛ kuwɛɛ nŋa í caada.

¹⁵ Jɔ̀ ilaalu ku maa wɛɛ nɔ a ya muaa wurai ilɛi Saba. Jɔ̀ a ya maa cea kutɔɔ hai nɛ kɔɔ nɔ a ya maa weea ajɔ fei.

¹⁶ Jɔ̀ amaajɛ ku ce si ilɛu nkpɔ nkpɔ, hee a maa yaga si antaii iri kuta ŋa bɛi amaajɛi Libãa ŋa, nɔ amanɛ ŋa a kpɔ a maa koo si iluu bɛi fɔfɔ ŋa.

¹⁷ Bɛi inunu í ya maa fita waati kãma fei jɔ̀ iriɛ ku maa wɛɛ hee do ajɔ fei. Jɔ̀ inɛ ŋa a ya maa kpe iriɛ waati iyi à waa weea njɛ fei, nɔ inɛi ilɛ ŋa fei a fɔ a maa ni, ilu inɔ didɔ̃i.

¹⁸ Saabu ku jɛ ti Aɔ̃ Lafɛ̃ɛi inɛi Izirɛli ŋa. Nŋu akãi í ce maamaake nkpɔ nkpɔ.

¹⁹ Saabu ku jɛ ti Aɔ̃ Lafɛ̃ɛ ilu amboe hee do ajɔ fei, nɔ andunyau fei ku kɔ̃ do amboeɛ. Ami. Ami.

²⁰ Ihɛ̃i í jɛ kɔɔi kutɔɔi Davidi amai Izaiu.