Iri ku kɔ̃ 70 - Bibeli do fee

Aɔ̃ Lafɛ̃ɛ, naa i sobim gbãa gbãa

¹ Irii gigi ku yeu ihɛ̃ ti inɛ ngboi woo kɔ̃ iri ŋai do Davidi.

² Ilaaɔ̃, naa i faabam. Aɔ̃ Lafɛ̃ɛ, ce ńya i naa i sobim.

³ Jɔ̀ inɛ ŋa iyi à waa dɛ ku kpam ŋau, a yɛ anyɔ do inɔ kufɔ. Inɛ ŋa iyi à waa dɛdɛm do laalɔ, jɔ̀ a nyi do anyi si biti nla nla.

⁴ Inɛ ŋa iyi à waa nyaanyim, jɔ̀ a nyi do anyi si anyɔ.

⁵ Jɔ̀ inɛ ŋa iyi à waa dɛdɛɛ ŋa fei, a nɛ inɔ didɔ̃ nla nla siɛ. Inɛ ŋa iyi à bi ideɛ, awɔ woo faaba nwa, jɔ̀ a fɔ a maa ni, Ilaaɔ̃ í la.

⁶ Amu ilu inɔ kufɔi nɔ n kù nɛ gbugbã. Ilaaɔ̃, si didɔ̃ɛ naa i faabam gbãa gbãa. Awɔi ì jɛ woo faabam do woo yám, Aɔ̃ Lafɛ̃ɛ, maà kpɛ.