Iri ku kɔ̃ 7 - Bibeli do fee

Kutɔɔi inɛ dee dee iyi à waa kpã iju

¹ Irii inɔ kufɔu ihɛ̃ ti Davidii. Í kɔ̃ɔa Aɔ̃ Lafɛ̃ɛi si gãmɛi Kusi dimii Bɛnzamɛɛ.

² Aɔ̃ Lafɛ̃ɛm, awɔi ì jɛ bi ku manjim. Faabam nɔ i nyam hai si awɔi inɛ ŋa iyi à waa kpãm iju.

³ Bii kù jɛ bɛɛbɛ aa gagagam nii bɛi muusu nla, nɔ aa nɛɛm nii inɛ gɔ kaa faabam.

⁴ Aɔ̃ Lafɛ̃ɛm, bii ǹ ce mii gɔ iyi kù sĩa, nɔ bii ǹ ce laalɔ do awɔm ŋa,

⁵ bii ǹ cea inɛ iyi wa jɛ kuwɛɛɛ si laakai ku sũ do amu laalɔ, bii ǹ gba mii ndii mbɛɛm nɔ kù jɛ si ntɔ,

⁶ mbɛɛu ku lelem ku mum, nɔ ku tɛɛsɛ kuwɛɛm ilɛ, nɔ ilùlù ku bii bɛɛrɛm. Kusĩmi.

⁷ Aɔ̃ Lafɛ̃ɛ, dede si idɔɔkɔ̃ɛ. Dede si idɔɔkɔ̃i mbɛɛm ŋa. Awɔi ì ya jilɛ asaiya, jĩ hai si iri njoo na irim.

⁸ Aɔ̃ Lafɛ̃ɛ, awɔ iyi ì waa buba hee lele si kitãi bommaɛ, jɔ̀ dimi ŋa a tɔtɔɔ wa a kaakoɛ.

⁹ Aɔ̃ Lafɛ̃ɛ, awɔ iyi ì ya kiiti inɛ ŋa, jɔ̀ n ba ntɔ si dee dee ku jɛm do si taale hai cem.

¹⁰ Leekĩ laalɔ iyi ilu inɔ kukã ŋa à ya maa ce. Ilaaɔ̃, awɔi ì jɛ dee dee, awɔ iyi ì ya wusɛ lasabui amanɛ nɔ i mà asiiɛ, muaa inɛ dee dee ŋa gbugbã.

¹¹ Ilaaɔ̃i í jɛ bɛi tɛli iyi wa degbem, nŋui í ya faaba inɛ ŋa iyi idɔ nŋa í má.

¹² Ilaaɔ̃i í jɛ woo kiiti dee dee, waati kãma fei idɔɛ í ya kɔ̃i na laalɔ.

¹³ Bii ilu inɔ kukã kù kpaasi idɔ, Ilaaɔ̃ í ya kpã taakubaɛi, ku ce sɔɔlui afaɛ iyi á taaò.

¹⁴ Na iriɛi í ya ce sɔɔlui jĩnɛ ku kpa inɛ ŋa, nɔ ku dasi afaɛ ŋa ina.

¹⁵ Wee ilu inɔ kukã í lɔsi icɛ laalɔ ku ce, wa ce dulum, nɔ wa bíaa ibo ku sɔ.

¹⁶ Í tuaa araɛ isa nla nla nɔ í cuku si isa iyi í tuu.

¹⁷ Laalɔɛ í cuku si iriɛ, nɔ inɔ kukãɛ í cuku si ikpoɛ.

¹⁸ An saabu Aɔ̃ Lafɛ̃ɛ na dee dee ku jɛɛ. An kɔ̃ irii n saabuɛ hee lele bii í wa.