Iri ku kɔ̃ 68 - Bibeli do fee

Iri iyi á kòò Aɔ̃ Lafɛ̃ɛ waatii iyi í jɛ igũ

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Aɔ̃ Lafɛ̃ɛ í dede, mbɛɛɛ ŋa à fangaa nɔ inɛ ŋa iyi à cóo ŋa à sa hai si wajuɛ.

³ Bɛi cua í ya fangaa, bɛɛbɛi à fangaa. Ilu inɔ kukã ŋa à ce nfei si wajui Ilaaɔ̃ bɛi akai nyikɔ̃ í ya yɔ si ina.

⁴ Amma inɛ dee dee ŋa à wɛɛò inɔ didɔ̃ ntɔ ntɔ. Do inɔ didɔ̃ nla nlaui à fo à waa dingaa si wajui Aɔ̃ Lafɛ̃ɛ.

⁵ I kɔ̃a Ilaaɔ̃ iri ŋa, i kɔ̃ iri na bɛɛrɛɛ ŋa. I teesea kpãa ŋa, nŋu iyi í gũ acĩ wa baa hai jĩijĩ. Aɔ̃ Lafɛ̃ɛi í jɛ iriɛ. I wɛɛò inɔ didɔ̃ ŋa si wajuɛ.

⁶ Ilaaɔ̃ iyi í wa si kpasɛ̃ kumáɛu, nŋui í jɛ baai kɔyɔ ŋa, nɔ nŋui wa kɔ̀ò jaaɔ̃ ŋa.

⁷ Ilaaɔ̃i í ya muaa inɛ ŋa iyi à wɛɛ aŋa akã kpasɛ̃. Í ya jɔ̀ inɛi piisɔ̃ɔ ŋa a nɛ inɔ didɔ̃ si ara ku nɛ nŋa. Amma hai jirima ideɛ ŋa à ya wai si inya ngbɛ.

⁸ Ilaaɔ̃, waati iyi ì fita ì waa cuaa inɛɛ ŋa, waati iyi ì waa nɛ si gbaau, Kusĩmi.

⁹ ilɛ wa yaya, nɔ inyi wa jo wa hai lelei Aɔ̃ si wajuɛ awɔ Ilaaɔ̃ Lafɛ̃ɛi iri kutai Sinai, Ilaaɔ̃ Lafɛ̃ɛi inɛi Izirɛli ŋau.

¹⁰ Ilaaɔ̃, ì jɔ̀ ijĩ nla í wɔ. Nɔ inɛɛ ŋa iyi à gbɛɛjiu, ì mu nŋa gbugbã má.

¹¹ Ilaaɔ̃, ì cea inɛɛ ŋa bi kuwa. Si jiida ku jɛɛi ì ce sɔɔluɛ na inɛ ŋa iyi à waa wahala.

¹² Ilaaɔ̃ Lafɛ̃ɛ í fɔ ide gɔ nɔ inaabo woo sisi laabaau jiida ŋa à dede nkpɔ nkpɔ bɛi sooge ŋa.

¹³ Ilaalui sooge mbɛɛ ŋau à sa do kutɛ gbãa. Nɔ inaabo ŋa iyi à gbe ide à kpɛ̃ amani nŋa ŋau.

¹⁴ Si bɛɛbɛ ì koo ì waa sũ ŋa si bi ku jɛi mɛɛmu ŋa. Nɔ à yɛ ankasiidi gɔ í wa bɛ, isɔ fũfũ í bii ikpaɛ ŋa nɔ ntoɛ í yɛ bɛi wura ila igbaagba.

¹⁵ Waati iyi Ilaaɔ̃ ilu gbugbãu í fangaa ilaalu ŋau, kutai ijĩ í cuku wa si iri kutai Salumɔɔ.

¹⁶ Iri kutai Basãa, iri kuta kumái Ilaaɔ̃i. Iri kutai Basãau, í nɛ afe nkpɔ nkpɔ iyi í gboka.

¹⁷ Awɔ iri kuta iyi ì nɛ afe nkpɔ nkpɔ iyi í gboka, na mii í jɔ̀ ì waa ce igu do iri kuta bii Ilaaɔ̃ í bi nŋu ku wau. Ntɔ ntɔ, bɛi Aɔ̃ Lafɛ̃ɛ í ce bi kuwaɛ hee do ajɔ fei.

¹⁸ Ilaaɔ̃ í nɛ sarɛtii igũ ŋa dubu dubu. Ilaaɔ̃ Lafɛ̃ɛ í wa anini nŋa. Iri kutai Sinaiu í wa si ile kumáu.

¹⁹ Aɔ̃ Lafɛ̃ɛ, ì gũ lele nɔ ì jɛ mbɛɛɛ ŋa igũ, ì mu ŋa aru. Nɔ ì ba amua ŋa hai bi amanɛ ŋa hee do bi woo kɔ̀ ide ŋa fei, nɔ ì koo ì ceò bi kuwaɛ Siɔ̃ɔ.

²⁰ Ka saabu Ilaaɔ̃ Lafɛ̃ɛ ajɔ fei. Nŋui wa so aso nwa, Ilaaɔ̃i í jɛ Ilaaɔ̃ woo faaba nwa. Kusĩmi.

²¹ Ntɔ ntɔ Ilaaɔ̃i í jɛ Ilaaɔ̃ woo faaba nwa. Aɔ̃ Lafɛ̃ɛi í nɛ kpãaɛ ku nya wa hai si iku.

²² Ntɔ ntɔ, Ilaaɔ̃i á lɛgɛ irii mbɛɛɛ ŋau, do ilu ntoi iri sisɔ iyi isɛɛnɛɛ kù sĩa fei.

²³ Aɔ̃ Lafɛ̃ɛ í ni, an baaò ŋa wa hai Basãa. An nya ŋa wa hai lɛlɛi tenku,

²⁴ ku ba isɛɛ ku mile si njɛ, nɔ ajaɛ ŋa a ba ikui mbɛɛ ŋau a ŋɔ.

²⁵ À waa yɛ isɛɛnɛɛ, Ilaaɔ̃. Isɛɛnɛi Ilaaɔ̃ Lafɛ̃ɛ nŋu iyi í jɛ ilaalum si kpasɛ̃ kumáɛu.

²⁶ Woo kɔ̃ iri ŋa à waa cua, woo cã jĩnɛ ŋa à wa do anyiɛ. Mudɛ̃ɛ ŋa à wa anini à waa cã ama gãgã.

²⁷ I cĩ Aɔ̃ Lafɛ̃ɛ bii inɛ ŋa à tɔtɔɔ ŋa. I cĩ Aɔ̃ Lafɛ̃ɛ, iŋɛ iyi ì jɛ icãi dimii Izirɛli ŋa.

²⁸ Bɛnzamɛɛ iyi dimiɛ í kere í reu, nŋui wa cua. Nɔ inɛ ngboi Zudaa ŋa do inɛi anyi nŋa ŋa à waa tooɛ. Si anyi nŋai inɛ ngboi Zabulɔ̃ɔ ŋa do inɛ ngboi Nɛfitali ŋa à wa.

²⁹ Ilaaɔ̃, nyisi inɛ ŋa gbugbãɛ. Gbugbãɛu í ce nwa mii nla nla.

³⁰ Si ilui Zeruzalɛmu, ilei kpasɛ̃ɛui í gboka í re. Bɛi ilaalu ŋa aa maa naaɛ amua ŋa wa.

³¹ Ilaaɔ̃, kpã mɛɛmui inɔ inyi ŋau iju do kɛtɛ gaa ŋa do ama kɛtɛi zamaa ŋa iyi à naa à sɛɛbata si wajuɛ do fia kpɛkɛlɛ ŋa. Fangaa inɛ ŋa iyi igũ ku cei í ya maa dɔ̃ nŋa siu.

³² Inɛ nla ŋa à waa naai hai ilɛi Ezibiti. Inɛi ilɛi Etiopi ŋa à sɛi à waa tò awɔ ikpa bi Ilaaɔ̃.

³³ Iŋɛ bommai ilɛ ŋa, i kɔ̃a Ilaaɔ̃ iri ŋa. I kɔ̃ iri i na Ilaaɔ̃ Lafɛ̃ɛ bɛɛrɛ ŋa. Kusĩmi.

³⁴ Inɛ iyi í wɛɛ hai ku kpɛu, nŋui í ya maa nɛ lele, nŋu wee à waa gbɔ imuɛ do gbugbã.

³⁵ I jɔ̀ i mà gbugbãi Ilaaɔ̃ ŋa. Yiikoɛ í wa si Izirɛli nɔ lele í jɔ̀ à waa yɛ zaka bɛi gbugbãɛ í to.

³⁶ Ilaaɔ̃, ì to à ce njoɛ si kpasɛ̃ɛ. Awɔ iyi ì jɛ Ilaaɔ̃ Lafɛ̃ɛi inɛi Izirɛli ŋa, awɔi ì ya mua inɛɛ ŋa gbugbã do bomma ku jɛ. Ilaaɔ̃, saabu ku jɛ titɛɛ.