Iri ku kɔ̃ 67 - Bibeli do fee

Inɛi andunya fei ku saabuɛ

¹ Iriu ihɛ̃ ti inɛ ngboi woo kɔ̃ iri ŋai. À ya kɔ̃ɔi do mɔɔlɔ.

² Ilaaɔ̃ ku ce nwa didɔ̃ nɔ ku wee nwa. Ku cɔ wa do jiida ku jɛ. Kusĩmi.

³ Si bɛɛbɛ, inɛi andunya ŋa aa mà kpãaɛ nɔ si dimi fei inɛ ŋa aa mà faabaɛ.

⁴ Ilaaɔ̃, jɔ̀ dimi ŋa a maa cĩɛ. Jɔ̀ dimi ŋau fei a maa saabuɛ.

⁵ Jɔ̀ inɛi andunya ŋa a maa dɔ̃ anu do inɔ didɔ̃, domi ì ya kiiti inɛ ŋai si ntɔ. Kusĩmi. Awɔi ì waa gbã ŋa si ilɛu ihɛ̃.

⁶ Ilaaɔ̃, jɔ̀ dimi ŋa a maa cĩɛ. Jɔ̀ dimi ŋau fei a maa saabuɛ.

⁷ Ilaaɔ̃ Lafɛ̃ɛ nwa í jɔ̀ ilɛ í ce amaajɛ nɔ í wee nwa.

⁸ Ilaaɔ̃ í wee nwa, nɔ inɛ ŋa iyi à wa kɔɔi ilɛ ŋa fei à mà bɛɛrɛɛ.