Iri ku kɔ̃ 66 - Bibeli do fee

Ka saabu Ilaaɔ̃ woo faabau

1 Iriu ihɛ̃ ti inɛ ngboi woo kɔ̃ iri ŋai.

¹ Iriu ihɛ̃ ti inɛ ngboi woo kɔ̃ iri ŋai. Iŋɛ inɛi andunya ŋa fei, i dɔ̃ anu do inɔ didɔ̃ ŋa na Ilaaɔ̃.

² I kɔ̃ iri i naa bɛɛrɛ ŋa, i kɔ̃ iri i cũu i naaò bɛɛrɛ ŋa.

³ I sɔ̃ Aɔ̃ Lafɛ̃ɛ i ni ŋa, icɛi awɔɛ ŋa í to njo. Na gbugbã nlaɛui í jɔ̀ mbɛɛɛ ŋa à ya naa a sɛɛbata si wajuɛ.

⁴ Inɛi ilɛ ŋa fei aa sɛɛbatai si wajuɛ nɔ a maa cĩɛ. Ntɔ ntɔ inɛi ilɛ ŋau fei aa maa kɔ̃ irii a maa saabuɛ. Kusĩmi.

⁵ I naa i cɔ icɛ iyi Aɔ̃ Lafɛ̃ɛ í ce ŋa. Mii nla nla ŋa iyi í ce bi amanɛ ŋa í to njo.

⁶ Í jɔ̀ tenku í kpɔò ilɛ ngbɛ, nɔ à kua ido nlau do kutɛ. Bɛi à nɛ siɛ inɔ didɔ̃ nla nla.

⁷ Do gbugbãɛui í jɛò bomma hee do ajɔ fei. Wa cɔ inɛi andunya ŋa fei do laakai, ku ba woo kɔ̀ ide ŋa a maà tɔɔ fufu. Kusĩmi.

⁸ I cĩ Ilaaɔ̃ Lafɛ̃ɛ nwa ŋa. I jɔ̀ a gbɔ imu nŋɛ hee lele.

⁹ Nŋui í jɔ̀ à ba kuwɛɛ, nɔ í jɔ̀ a kù koosɛ.

¹⁰ Ilaaɔ̃, ì wusɛ wa, ì cɔ laakai nwa bɛi à ya cɔ isɔ a ba a mà jiida ku jɛɛ.

¹¹ Ì dasi wa bitandi. Ì kã nwa aso kuwo iyi wa tɛ bũu nwa.

¹² Ì jɔ̀ inɛ ŋa à kpã wa iju ntɔ ntɔ. À nɛ si ina do si inyi, amma ì nya wa, nɔ ì mu nwa amani nla nla.

¹³ An bɔ si kpasɛ̃ɛi do kuwee ŋa iyi à ya jo si ina fei sãa sãa. An kɔ̃ kuwãm ŋa iyi ǹ ceɛ,

¹⁴ kuwã ŋa iyi ǹ fɔ ideɛ si waati iyi ǹ wa si wahalau.

¹⁵ An ceɛ kuwee ŋa iyi à ya jo si ina fei sãa sãaui do angudã ku nɛ ikpo ŋa. An ceɛ kuweeui do kɛtɛ kombo ŋa do iwo kombo ŋa má. Kusĩmi.

¹⁶ I naa i gbɔ ŋa, iŋɛ iyi ì waa jirima Aɔ̃ Lafɛ̃ɛ ŋa. An fɔ mii iyi í ceem si kuwɛɛm.

¹⁷ Ǹ dɔ̃ siɛ anui do gɛlɛm nɔ ǹ fɔ kulaɛ.

¹⁸ Bii í jɛ ǹ ce lasabui laalɔ gɔ si idɔm wo, Lafɛ̃ɛm kaa gbɔ kutɔɔm.

¹⁹ Amma Ilaaɔ̃ í gbɔɔm, í de si kutɔɔm itĩ.

²⁰ Saabu ku jɛ ti Ilaaɔ̃, nŋu iyi kù kɔ̀ kutɔɔm ku gbɔ nɔ kù jɔ̀ jiida ku jɛɛ kù jĩim.