Iri ku kɔ̃ 65 - Bibeli do fee

Ilaaɔ̃, ntɔ ntɔ ì to a cĩɛ

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Ilaaɔ̃, awɔ iyi ì wa Siɔ̃ɔ, ntɔ ntɔ ì to inɛ fei ku cĩɛ, nɔ inɛ fei ku kɔ̃ kuwã ŋa iyi í ceɛ.

³ Awɔ iyi ì ya gbɔ kutɔɔ, inɛ fei á naa bi tɛɛ.

⁴ Ntɔ ntɔ, kuwoi kuraram ŋau í caa sim. Awɔi aa kpa idei kurara nwa ŋau.

⁵ Ilu inɔ didɔ̃i inɛ ŋa iyi ì cica ì jɔ̀ à maai siɛ ku ba a wa si inɔ kpasɛ̃ɛ. Didɔ̃i kpasɛ̃ɛu do kumáɛu á to wa.

⁶ Ilaaɔ̃ woo faaba nwa, awɔ inɛ dee deei. Ì ya jɛ nwa si kutɔɔ nwa ŋai do maamaake nla nla. Inɛ ŋa iyi à wa hee kɔɔi ilɛ do hee icei tenku hee jĩijĩ fei, siɛi naanɛ nŋa í wa.

⁷ Aɔ̃ Lafɛ̃ɛ, ì nɛ gbugbã. Do gbugbãɛui ì jilɛò icui iri kuta ŋa.

⁸ Ì ya jɔ̀ ibai tenku ŋa ku coko. Ì ya leekĩ ibai inyi nla ŋa, nɔ ì ya jɔ̀ wakatai inɛ ŋa ku leekĩ.

⁹ Inɛ ŋa iyi à wa si kɔɔi andunya zigi nŋa wa da na nyindaɛ ŋa. Awɔi ì ya jɔ̀ inɛi nunui daakɔ do inɛi nunui alɛ ŋa fei a maa dɔ̃ anu do inɔ didɔ̃.

¹⁰ Awɔi ì ya maa gbɔa ilɛ. Ì ya muaa inyi nɔ i jɔ̀ ku ce amaajɛ nkpɔ nkpɔ. Awɔ Ilaaɔ̃, idoɛ í kɔ̃ do inyi. Awɔi ì ya mua inɛi andunya ŋa amaajɛ. Do yaase bɛi ì ya ceò sɔɔlui ilɛu wee.

¹¹ Ì ya fãsi fiii ilɛ ŋa inyi nɔ ì ya yɔ kanga ŋa. Awɔi ì ya jɔ̀ dimi ku gbɛ̃ ŋa a ba gbugbã a fita.

¹² Ì jɔ̀ adɔ̃u í nɛ amani ntɔ ntɔ. Nɔ kubai wa cã si kpãaɛ bɛi inyi.

¹³ Amaajɛ í wai hee do si gbaa bi ku ce degbe ŋa fei. Nɔ anu ku dɔ̃i inɔ didɔ̃ í wa si iri kuta ŋa.

¹⁴ Bi ku degbe ŋa à kɔ̃ do angudã do iwo ŋa. Lɔɔma ŋa à kɔ̃ do bilee ŋa, nɔ à kɔ̃ iri à waa saabuɛ do anu ku dɔ̃i inɔ didɔ̃.