Iri ku kɔ̃ 64 - Bibeli do fee

Igũ ku jɛi Aɔ̃ Lafɛ̃ɛ si ilu gɛlɛ sãmi ŋa

¹ Iriu ihɛ̃ ti inɛ ngboi woo kɔ̃ iri ŋai do Davidi.

² Ilaaɔ̃, gbɔ imum waati iyi ǹ wa n weewea. Mu kuwɛɛm na njoi mbɛɛu iyi ǹ wa n ce.

³ Nyam hai si sɔɔlui zamba iyi inɛ laalɔ ŋa à waa dĩim do hai si wuai woo ce laalɔ ŋa.

⁴ À teese gɛlɛ nŋai bɛi taakuba. Ide nŋa ŋau à nɛ acĩi bɛi afa.

⁵ Do afaui à ya manji a taò inɛ dee dee. À ya taai do zamba, a ci ya nɛ zigiidai nkãma.

⁶ À ya maa mua njɛ gbugbãi si ide laalɔ ŋa. Idei cɛkũm ŋa iyi à lé à singa ŋau, à ya fɔi à maa ni yooi á yɛ ŋa.

⁷ À ce sɔɔlui zamba nŋa à tã. Nɔ à ni sɔɔluu í jĩa mam mam. Idɔi amanɛ í jĩisa, nɔ lasabuɛ í la.

⁸ Ilaaɔ̃ í ta ŋa afa do zamba, nɔ afau í mɛɛ ŋa.

⁹ Gɛlɛ nŋai í jɔ̀ à koosɛ, nɔ inɛ ŋa iyi à yɛ ŋa fei, à ya maa gbugbã irii.

¹⁰ Amanɛ ŋa fei zigi nŋa í da, à waa fɔ iyi Ilaaɔ̃i í coo, nɔ à waa lasabu si.

¹¹ Si Aɔ̃ Lafɛ̃ɛi inɔ didɔ̃i inɛ dee dee í ya wa. Nɔ bi tɛɛi í ya ba bi ku manji. Inɛ ŋa iyi à nɛ idɔ iyi í tɛ fei, aa maa wɛɛò inɔ didɔ̃i.