Iri ku kɔ̃ 63 - Bibeli do fee

Jiida ku jɛɛ í re kuwɛɛ

¹ Iriu ihɛ̃ ti Davidii. Iriu wa fɔ idei waati iyi Davidi í wa si gbaai Zudaa.

² Ilaaɔ̃, awɔi ì jɛ Lafɛ̃ɛm. Ǹ wa n dɛdɛɛ. Ǹ wa n ce bɛgɛɛ nɔ ǹ nɛ bukaataɛ bɛi ilɛ ngbɛ hai nɛ mandi í ya nɛ bukaatai inyi.

³ Si bɛɛbɛi ǹ wa n cɔɛ si kpasɛ̃ɛ, ku ba n yɛ gbugbãɛ do amboeɛ.

⁴ Ntɔi jiida ku jɛɛ í re kuwɛɛ, nɔ an maa n cĩɛi.

⁵ Na nŋu, si kuwɛɛm fei, an maa n saabuɛi. Nɔ na iriɛi an wu awɔm ŋa lele.

⁶ Hundem á yoi bɛi inɛ iyi í ba iŋa ku nɛ ikpo í ŋɔ. An dɔ̃ anui do inɔ didɔ̃ nla nla n maa n saabuɛ.

⁷ Waati iyi ǹ wa n sũ idũ, ǹ ya n maa n ye gigiɛi. Siɛi lasabum í ya wa idũ.

⁸ Awɔi ì jɛ woo sobim. Ǹ ya n nɛ inɔ didɔ̃i waati iyi ǹ wa si ikpaɛ ŋa.

⁹ Siɛi ǹ wa n masi dim dim. Awɔ njɛɛi í ya maa mum.

¹⁰ Amma inɛ ŋa iyi à waa dɛdɛ a ce nfei kuwɛɛm, aa cukui, nɔ a nɛ hee bi kuwai iku ŋa.

¹¹ Aa kpa ŋai do taakuba, nɔ a jɛ sɔndai ajaako ŋa.

¹² Ilaalu á ba inɔ didɔ̃i si Ilaaɔ̃. Inɛ iyi í ce kugbasi do irii Ilaaɔ̃, á maa tɔɔ fufui, domi gɛlɛi woo sɔ ibo ŋa á cĩmboi.